Zumtu hrawkhrol a hmual phoh lawlaw

Zumtu hrawkhrol: a hmual phoh lawlaw ning, Nihin kan vawlei ah a lar bikmi cu “fakthanh” {cawngia/advertise} hi a si. Fakthanh timi cu midang nih an herh an herh tuk nain an herh hmanh an rak i hngalh lomi thil pawl cawk awk bawi an hngalh khawh nakhnga an herh zia va hngalhter khi a si. Cucaah fakthanhnak a um lo ahcun mi nih kan thil ngeihmi an herh zia an hngalh lo caah thil zuar khawh a si lo.

Cucu nihin kan vawlei ah fakthanh a lar emem nak a ruang cu a si. Vawleicung fakthanhnak tuahtu ngan bik a simi Google nihkhin vawlei mipi nih an sin i fakthanhnak an rak tuah man lawng bak in kum khat ah US dollar 147 billions an hmuh. Anmah a hun changtu hi Facebook a si i kum khat ah 84.2 billions an hmuh ve. Vawlei minung dihlak nih 2020 kum khat chungah khan Fakthanh {cawngia/advertise} nak ca lawng i kan hmanmi phaisa dihlak hi US dollar 586.5 billions a si.

Cu tluk cun Fakthanh hi nihin kan vawleipi ahhin a biapi. Fakthanhtu cheukhat cu an hrawkhrol tuk ve. Voikhat le bang cu Keden “savun taktak, a fek, a zaang, a tanglei a nem” tiah ttha tuk in fakthanhnak an tuah i kaa cawk sual cu zei bia a hei chiat khawhning, a denh hrimhrim kaa denh duh lo.

Wholesale thil zuarnak pakhat le bang cu tam taktak kan order i nikhat a tlawm bik voithum cu an rak put peng nain a dik lomi, hrawkhrol thil lawngte a si caah kan rak cencel zungzal. Kan cancel a tam tuk caah kan nu phone number le bang cu an block phah! TV cable ngeitu pawl nih an kan lakter lio ahcun nau umh in a kan um dingmi bantuk in an i chim nain kan TV rawh tikah call zongah an chuak ti lo.

Internet wifi petu hna nih an kan bunh piak lio ahcun rul buu zelh in dahra an kan zelh peng lai ti awk in an i chim nain kan wifi rawh taktak ahcun call len ah an chuak ti lo. Thil kan order hna lio ahcun na tining thlap, na tining thlap bak in kan kuat ko lai, tiah an ti cio nain thil a phanh i ziah ka tining si ttung lo, hun ti ahcun “minung cu hohmanh a tlingmi nan um cio lo cuh” tiah kanmah tu an rak kan sik diam ai.

Khah, a fiang lai dah~bantuk fakthanhnak a tuahning in a tuah tuahtlinh taktak lomi company le minung kan hei huat hna ning khi nan mithlam ah cuang cio ko lai. Kanmah hi kan huat tukmi “Fakthanhtu Hrawkhrol” cu na si. Zeicatiah Pathian nih a fapa Khrih cu vawlei mi vialte nih a sining taktak an hngalh i an zumh duh khawh nakhnga, fakthanhnak tuah piaktu dingah sahring thi luanh tein a kan fial, ttuanvo a pekmi kan si.

Kan nun ah mipi nih Khrih zumhtlak a si zia, Khrih a nun duhnun zia, a dinfel, a thianhlim zia, a dawtnak ngeihmi a thuh zia, a mi zaangfahnak hmual a ngan zia vialte hmu hna sehlaw mi vialte nih Khrih hi cohlang hna seh, ti a duh. Cu a duhnak kan tlinh khawh nakhnga kan herhmi hriamnam le hmanrua~Thlarau laksawng phunkip le teitu chungnung Thlarau a kan pek dih.

Nain Khrih fakthanhtu kan si kan i philh tawn. Midang nih an zumh duh nakhnga Khrih fakthanhtu ttha kan si khawh lo lengah micheu khat cu ahohmanh nih an zumh duh tinak hnga lo, kan nunzia le tuahsernak tthalo hmang in customer vialte sinah Khrih zumhtlak a silonak vahpitu le fakthanhtu tu ah kan cang tawn.

Na order loningpi in na thil cahmi an phanh caan le an chimning in tuah piak lo le hlenthawinak na ton tikah, aw kei zong nih ka nunzia in Khrih ka hlen ve. An fakthanhning bantuk in a um lomi lawng mi hrawkhrol tiah an thangchiat le an hmualphoh loin keimah zong “Zumtu Hrawkhrol” bak pei ka rak si hi, timi hmuh i kan hmual phonak i hngalh kan hau ve. Khrih caah fakthanhtu ttha si cang hna u sih. Lawmhnak he. Hrambik Lian