Zumh A Har Tuk E; Ka Nau Kawi Tluang Rak Ka Ngaithiam Hram Ko Mu!!

Kawi Tluang aw na missed call kha ka rak thei lo cu ka ngai thiam mu
==========================
Kawi Tluang ka nau na thawng theih cu zeibang bia hme, zumhawk a har ko ee. Ka ngaihchiat tuk hringhran ee ka celh bak lo ee. Kawi​ Tluang, Kawi​ Tluang​ zei​ ton hme kan ton ka nau. Salai Elisa he nan i hmu tong cang lai le Thantlang kan innlo vialte an ciamh dih kong le neh hnu kong nan i ruah len cang lai mu.

Rak kal chung ko ne law ka nau Kawi Tluang aw Salai Elisa he nan rak kan don te lai mu. Kannih zong tuan le tlai nan hnu in kan rak ra ve cio te ko lai. Ka nu le pa (kanu Dong le kapa Van) bel na sia an herh tuk ve ko lai mu. Kan tum Vanram tu ah kan leng tti than te hna lai. RIP!!! Mangtha mu Ka Nau!

Na liam a tuan tuk ai ee . Kawi Tluang ni kum pu Van Cin Mang te khua i BBQ kan rawh len lio ah khan cun na pa tling tuk ko dawk aw. Maw vawlei then nak can nih an phak cang mu . Ngeih a chia kho tuk .Kawi Tluang aw na missed call kha ka rak thei lo cu ka ngai thiam mu yiah kan rak tlawng lai na ti cu na thawng ka theih ah cun ee ka zumh kho lo ee.

Sianginn hmai tlangbo bawlungkun pawng nan um lio, na bawlung kan rak chuih tawn le nan inn i kan rak luhchuah tawn kha ka mitthlam ah a cuang. Nih bu le kheh bu in kan rak tlonlennak, a rawk dih cang mi Thantlang khua le a rak sining le kan sianginn le a khan tete zong mitthlam ah an cuang chih.

Nifatin sianginn khan pakhat chung i a rak tthu tti balmi, Khar caan ah chunnitlak a rak i lengkai balmi hawikom hna hi vawlei in nan liam thawng theih cu a tuar a har ko. Lung a leng, ngaih a chia, a rawk cangmi Thantlang khua te mitthlam i a cuan chih caah lunglen a faak khun. A buai tukmi Vawlei cu nang cu na kal taak cang.

Kawi Tluang, Midang thinlung le duhning chim thiam pa. Na kal tuan tuk ee. Table tennis kan tuk tawn i na kan tei tuk buin nai titer i na kan fak tawn kha philh um lai lo ee. Chimh na ngai huaha lo nain hawile nih tlaihchanmi na si zong kha na rak mak reng.

Na kan kaltak chung cu kan in siang lo nain zeiti ttha. Kan kal cio tenak ding ah na rak kal chung mu. Bye ti pin cun chim ding ka thei ve lo. An si cio ko lai dah. Nan Kan kal tak cu I zumh har tuk ee, hawi kom tleih Chan thiam tuk mi, sian na um loh ee, neh le nang vialte tuanbia ah an cang dih lai ee.

A poi tuk ti hlei chim ding bia a um lo e Kawi Tluang aw. Ngmah bantuk mitha le mi nuamter thiam mi hna hi cu caan saupi tian na kan nunpi ding a si nain muh. Mino tuk asi, Thantlang ah a hngachia deuh lio muithlam a cuang. A va pam ve ee.

Relchap,Mawlamyine Ah Misual Pahnih Nih Inn Pakhat Luhhnawh In Nu Pakhat An Thah! Nihin, August 18 zinglei ah Mon ramkulh, Mawlamyine khuapi, Aungtukhah(အောင်သုခ) sang i inn pakhat cu misual nih an luhhnawh i nu pakhat an thah, tiah theih a si. Aho si theih lo mi pa pahnih cu an hmai i hup in, cu inn hnu lei kutka ah cun an i thup i, nu pakhat nih kutka a hon lecangka in innchung ah an lut.

kum 44 tluk nu pakhat cu a hngawng ah namte hmuahchih in an thah, tiah theih a si. Cu hnu ah innchung ah lut in, inn ngeitu nu pakhat cu nam in an hmuah ṭhan i, a sui ṭhi, tumbul le banhrolh pawl cu an chuh, tiah theih a si.

“Thah a tongmi nu cu inn ngeitu siloin inn rian bawmtu ding ah umpitu chungkhat, khuate lei mi a si. Inn ngeitu cu nam in an hmuah i, a sui thilri cu an chuh,” tiah Mawlamyine um mi bawmchantu phu chungtel pakhat nih a chim.

Cu thil a can cu nihin zinglei suimilam 5:30 hrawng ah a si i, luhhnawh a tongmi inn ah cun rianbawmtu nu telh in minung 4 khua an sa. Thah a tongmi nu cu Mawlamyine sizungpi ah an kalpi, tiah theih a si.

Karenni Ramkulh, Hpruso Peng kahdohnak Ah SAC Ralkap 4 An Thi! Karenni ramkulh, Hparuso peng Sulyiako(ဆိုလျားကူး) khua pawng umhmun khuarmi SAC ralkap hna cu Central Special Operations, KNDF le Loikaw PDF phufonh nih August 14 le August 16 ah an kahdoh hna. Cu kahdohnak ah cun SAC ralkap 4 an thi, tiah theih a si.

August 14 kahdohnak ah SAC ralkap pakhat a thi i, August 16 kahdohnak ah SAC ralkap 3 an thi, tiah Central Special Operations phu nih cathanh an chuah. Nawlngeihnak latu SAC ralkap hna cu an hram cah tiang ṭangrual phufonh nih kan doh hna lai, tiah Central Special Operation nih an thanh.

Yuangan Peng Ah Minung 3 Cu SAC Ralkap Nih An Khangh Hna!: Shan ram thlanglei, Danu Self-administerd Zone hmunram chung Yuangan(ရွာငံ) peng Taeluh(တဲလု) khua le Taung U(တောင်ဦး) khua kar ah August 17 ah miruak 3 mei in khangh mi cu kan hmuh, tiah tualchung mi nih an chim.

Miruak an hmuhnak hmunhma cu August 16, ah SAC ralkap nih an rak cawlcanghnak hmunhma a si i, khuami cheukhat zong bia an hal hna, tiah Taeluh(တဲလု) khuami pakhat nih a chim. “Cu ka hmun ah cun August 17 ah meithal thawng theih a si, zinglei i SAC ralkap an kal hnu ah minung ruak mei in khangh mi cu hmuh a si. An tai cung an khangh dih hna caah mizei an si theih a si rih lo,” tiah a chim.

Gangaw Peng Ah Sianginn Cachimtu Dalan Sayamah Pahnih Cu CDF-KKG Nih An Thah Hna!, Magway ramṭhen, Gangaw peng Min khua sianginn cachimtu dalan sayamah pahnih cu, CDF-KKG Battlion-5 Gangaw Region nih kan thah hna, tiah nihin August 18 ah cathanh an chuah. Sianginn cachimtu nu pakhat cu siangniamrun chimtu Myint Myint San le tuition sayamah Ya Min Aye an si, tiah theih a si.

“Kan lung cu a ṭha hrimhrim lo. Pakhat hi ca a rak kan chim balmi a si. Dalan a si i, fimhlawm lo awk a ṭhat lo caah kan fimhlawmnak a si,” tiah CDF- KKG chungtel pakhat nih a chim. Cachimtu pahnih nih kan cawlcangh ning vialte cu SAC ralkap an chimh lengmang hna caah kan thah hna hi a si, tiah a chim chap. “Message in kan kuat tawn ko hna, phone zong in kan chawnh lengmang ko hna. Pumpak zong in atu le atu kan va ton ko hna. Sihmanhsehlaw an ngai duh lo, an thah mi hna tu cu fiang tein kan thei lo,” tiah tualchung mi pakhat nih a chim.

Gangaw peng nichuahlei ah dalan an si, tiah an timi hna zung rianṭuantu hi an tampi rih. An min le an umnak dik thliar tein kan hngal kho rih hna lo, tiah a chim chap. SAC nih uknak an laak hnu in dalan tiah ruahmi an thahmi hna le SAC ralkap nih a ruang um loin an thahmi hna fonh ah a thong leng an si cang.

Rohingya Pawl Cu Myanmar Ram Ah An Kir Ṭhan A Hau, Tiah Bangladesh PM Nih UN Palai A Chimh! Myanmar ralkap tuahsernak ruangah Bangladeah ah a zaam mi Rohingya pawl cu Bangladesh Prime Minister Sheikh Hasina nih Myanmar ram ah an kir ṭhan a hau, tiah UN nuhrin covo Commissioner Michelle Bachelet a chimh. Michelle Bachelet cu a luancia August 14 ah khan Bangladesh a phan i, Myanmar ramri Rohingya pawl umnak zong a va phan, tiah theih a si.

Rohingya ralzam hna cu Myanmar rammi an si i, an umnak hmun ah kan kuat ṭhan hna lai, tiah Bangladesh Prime Minister Sheikh Hasina nih cun a chim. Myanmar ralkap pawl nih hmunhma thianhhlimnak an rak tuah kum 2017 lio ah Rohingya minung 700,000 leng cu ramri an tan i, Bangladesh ram ah an rak zaam. Atu lio dirhmun ah cun Rohingya hna hi an umnak hmunram ah kuat ṭhan ding cun a si kho rih lo, tiah Michelle Bachelet nih thawnglatu pawl cu a chimh hna.

August thla hram thawk ah Tuluk ramleng palai Bangladesh a tlawn lio ah, Bangladesh nih Rohingya hna cu an umnak hmun i an kir khawh ṭhan nakhnga Tuluk cu bawmh a rak hal, tiah theih a si.

Matayar Peng Ah PDF Nih SAC Ralkap Motor Cu Bomb An Puahhnawh Hna I, Ralkap 6 An Thi! Mandalay ramṭhen, Matayar peng ah SAC ralkap motor cu, nizan August 17 zanlei sml 4:25 hrawng ah PDF nih bomb an puahhnawh hna, tiah theih a si. Motor 8 in a ra mi SAC ralkap 200 leng cu Matayar peng Nguangngoh le Kyaukselay khua kar ah bomb lung 5 in kan puahhnawh hna, tiah Natsu PDF in ṭuanvo ngeitu Bo Nat Su nih a chim.

“Motor 8 in an ra i, Nguangngoh le Kyaukselay khua lei an kal lio ah bomb lung 5 in kan puahhnawh hna. Motor pakhat cu khalh awk ṭha ti loin a rawk dih,” tiah a chim chap. SAC ralkap pawl cu Sagaing ah umhmun khuarmi Ta Ma Kha 33 an si lai, tiah an zumh. Cu kahdohnak a dih in SAC ralkap pawl cu Kyaukselay khua ah an riak i, a thimi ruak cu an vui hna. Hliamtuarmi ralkap pawl zong an thlopbul hna, tiah theih a si.

A luancia August 17 zing sml 8:05 ah hmunhma thianhhlimnak tuah ding in a kalmi SAC ralkap 30 leng cu, Matayar peng Taungkan le Muang-U khua karah Natsu PDF nih bomb lung 4 in an rak puahhnawh hna caah ralkap 4 an rak thi.

Pale Khua Chung In A Chuak Kho Lo Mi CDM Ralkap 2 Cu PDF Nih An Chanhchuah Khawh Hna, Sagaing ramṭhen, Pale khuachung in a chuak kho lomi CDM ralkap 2 cu nizan August 17 zan sml 8:00 in 9:00 karah PDF nih an va chanh khawh hna, tiah theih a si. Kan va chanh hna lio ah cun SAC ralkap he kan i kap. CDM ralkap 2 cu lam dang in kan kalpi hna i a himnak hmun ah kan va chiah hna, tiah Southern YSO PDF Bo Aye Thaung nih a chim.

“CDM tuah kan duh, tiah ralkap 2 nih an rak kan chawnh caah PDF phu hnih nih kan chanhchuah hna. Atu cu a himnak hmun ah an um cang,” tiah a chim chap. CDM ralkap 2 cu Southern YSO PDF, Pale Battalion 4 hna i bawm in an va chanhchuah hna, tiah theih a si. August 16 lio zong ah Pale khua chung Administrative zung ah umhmun a khuarmi ralkap pawl cu Southern YSO PDF nih hriamngan in an rak kah hna caah ralkap 1 a thi i, 4 sii-inn an rak phan.

PDF An Bawmh Hna Caah KIA Hriamnam Seh Zung Bomb Thlak Ding In Bullet Hla Shwe Nih SAC A Forh: Nizan August 17, Naypyidaw ah thawngfianternak tuah lio ah, USDP Party chungtel le MP hlun Bullet Hla Shwe nih atu bantukin KIA hriamnam seh zung cu bomb thlak ding in ralkap cu a forh hna. KIO nih SAC ralkap a dohtu PDF cu hriamnam a pek hna caah KIA seh zung cu bomb thlak ding in timhtuahnak nan ngei maw, tiah Bullet Hla Shwe nih SAC sinah halnak a tuah.

Bullet Hla Shwe biahalnak cu SAC ralkap chimphuannak nawlngeitu Zaw Min Htun nih a let lo nain, KIA nih PDF cu hriamnam an bawmh hna caah KIA cu tapung an si, tiah Zaw Min Htun nih a chim. “Tapung cu tapung in kan hmuh peng cang hna lai. Ralhrang bawmtu KIA cu tapung an si,” tiah Zaw Min Htun nih cun a chim.

Demoso Peng Kahdohnak Ah SAC Ralkap 6 Hrawng An Thi, Karenni ramkulh, Demoso peng, Konethar khua ah nizan August 17 zanlei ah SAC ralkap le Karenni Revolution Union(KRU) kahdohnak a chuak i, SAC ralkap 6 hrawng an thi, tiah KRU nih cathanh an chuah. Nizan August 4 zanlei aml 6:30 tiang sml 2 chung, hriamngan he hriamhme he kaphnih kar kahdohnak a chuak. KRU lei in ralkap 1 hliamhma a pu ko nain thinphan awk a um lo, tiah theih a si. SAC ralkap nih inn pakhat an khangh caah a ciam dih. Hriamngan in an kan kah tuk caah hnu kan kir ṭhan, tiah KRU nih cathanh an chuah.

Monywa-Chaung-U Lam Ah Pyusawhti Bomb Puahhnawh An Ton Caah 4 An Thi: Sagaing ramṭhen, Monywa- Chaung-U lampi ah SAC ralkap kuttang Pyusawhti cu, nizan August 17 zing sml 6:00 hrawng ah PDF nih bomb an puahhnawh hna caah ralkap 4 an thi i, 2 hliamhma an pu, tiah theih a si. Pyusawhti pawl nih Chaung-U peng Tawpu khua in Monywa- Mandalay lampi ah khual a tlawngmi hna cu tangka an hal hna caah PDF nih bomb an puahhnawh hna, tiah theih a si.

Cu kahdohnak ah cun PDF-South Monywa, Monywa Ranger Group – Truth Army, Black Hunter People’s Task Force le Anyar Defence Force hna i bawm in an kah hna. Kanmah lei in a thimi le hliamtuarmi kan um lo, tiah PDF – South Monywa nih cathanh an chuah.

KNU Brigade 5 Hmunram Kahdohnak Ah SAC Ralkap Le BGF 43 An Thi: KNU Brigade 5 hmunram, Mutaw pengkomh August 1 in 15 tiang SAC ralkap, BGF le KNLA kar kahdohnak a chuak. August 1 in 15 tiang ah Kahdohnak voi 53 a chuak i, SAC ralkap le BGF 43 an thi, 17 hliamhma an pu. Kanmah lei in KNLA ralkap 1 a nunnak a liam ve, tiah KNU nih cathanh an chuah. SAC ralkap le BGF nih khuate lei hoih in hriamngan an kah pin ah lei rianṭuannak hmun zong ah timh ciammam tein hriamngan tam ngai an kah caah tualchung mi 2 hliamhma an pu, tiah an langhter.

Sagaing ramṭhen, Taze peng zong ah kahdohnak voi thum a chuak i, SAC ralkap a thimi le aa hliammi an tam, tiah theih a si. Kanpauk le Kutaung khua a khaangtu Tatma 99 kuttang Kha Ma Ya 113 ralkap hna cu, Taze PDF nih voi thum tiang an kah hna i, SAC ralkap pawl cu a thimi le aa hliammi an tam caah Kanpauk le Kutaung khua pahnih fonh ah inn 20 an khangh. Cycle zong tam ngai an khangh hna, tiah tualchung mi hna sinin theih a si.

Be the first to comment

Leave a Reply

Your email address will not be published.


*