Sagaing Ramṭhen, Monywa peng, Lezin Khua ah SAC Ralkap Nih Khuami 3 an Thah Hna! + Maungtaw Peng Ah SAC Ralkap Nih Hriamngan Kahnak In Tarnu Pakhat A Nunnak A Liam!
============================
Sagaing ramthen, Monywa peng, Lezin khua ah sualnak ngei lo khuami 3 cu SAC ralkap nih an thah hna, tiah khuami hna nih media ah an chim. Nizaan August 26 zinglei sml 6 hrawng ah SAC ralkap 50 hrawng cu Lezin khua ah an lut i, lentecelhnak angki(jersey) ai hrukmi pa pahnih cu an tlaih hna,
tiah mithmutu khuami hna nih media ah an chim. Lakphak dawr ah a ṭhumi cheukhat hna nih SAC ralkap thil tuahmi an hmuh tikah an lau tuk i an tlizaam hna. A tlizaam mi hna cu SAC ralkap nih meithal in an kah hna i
kum 50 tluk a simi U Awng Chit cu a lu, a ṭaang le a keeng ah an khen i a hmun ah a thi colh, tiah khuami hna nih cun an chim.
Pa pahnih an tlaih mi hna cu, an kut an leh hna i, Lezin pumpululh tual ah datsi an toih hna hnu ah an khangh hna, tiah Monywa thawnglatu hna nih an chim. SAC ralkap hna cu Lezin khua phungki sianginn ah an lut i cycle 2 le thilri dangdang zong an lak. Lezin khua cu atu le tu SAC ralkap an luhchuah pengnak khua pakhat a si, tiah theih a si.
Maungtaw Peng Ah SAC Ralkap Nih Hriamngan Kahnak In Tarnu Pakhat A Nunnak A Liam!: Rakhine ramkulh, Maungtaw(မောင်တော) peng nichuah lei Minkyi khua ah, nihin August 27 zing sml 9:00 hrawng ah SAC ralkap nih hriamngan an kah caah tarnu pakhat a nunnak a liam, tiah theih a si. A nunnak a liammi kum 70 tluk tarnu May Thar Sein fanu Oo Khin Than nih cun, “Ka nu ruak cu inn cung ah kan chiah ta i, khuami cu phungki umnak ah kan i thup,” tiah a chim.
Nihin August 27 zinglei ah hriamngan thawng cu voithum hrawng a thang i, cu tlawmpal ah hriamngan kuan cu Oo khin Than te inn i a tlak caah May Thar Sein cu a nunnak a liam, tiah theih a si. Minkyi khua cu chungkhar 80 hrawng a um i, milu 700 hrawng umnak khuate pakhat a si. Khuami hna cu an thin a phang i an khua phungki sianginn ah an i thup hna, tiah theih a si.
A luancia August 13 hnu in Maungtaw peng nichuah lei hmunram ah SAC ralkap le AA kahdohnak pehtlai in a chuak i, SAC ralkap an sakhan cheukhat zong AA nih an laak, tiah theih a si. August 25 zanlei ah Taungkauk peng, Chaungtung Khuah(ချောင်းသုံးခွ) khua lei ah SAC ralkap le AA kahdohnak a rak chuah i, SAC ralkap 14 nak tlawm lo an rak thi.
Rakhine ramkulh ah a luancia kum 2018 a dih lai hrawng in kum 2020 tiang ah Myanmar ralkap le AA kahdohnak ruangah tualchung mi 300 leng an rak thi, tiah theih a si.
China le Thailand Sin Gas Zuarnak In SAC Nih US Dollor 800 Million A Hmuh!, A luancia April -July thla tiang ah Myanmar ram chung chuak Gas cu SAC nih China le Thailand sin a zuarnak in US Dollar 800 million a hmuh, tiah August 25 ah SAC ngeihmi Myanmar Alin media nih a langhter.
SAC nih a bik in phaisa a hmuhnak Myanmar Oil And Gas Enterprise(MOGE) cu phihkharnak tuah ding in Myanmar Democracy lei cawlcanghnak a tuahtu phu hna nih nawlnak a tuah cuahmah lio ah atu bantuk in SAC nih an phaisa hmuh zat media ah a vun thanh.
SAC nih tukum a hmuhmi phaisa hi nikum a hmuhmi nakin US Dollor 60 million in a tam deuh. Myanmar ramchung Gas chuahnak hmun a si mi Yar-Tta-Na, Yee-Tta-Khun, Shwe le Zaw-Tih in an chuahmi a si i, a bik in China le Thailand sin ah a zuar.
US cozah zong nih uknak latu SAC phaisa hmuhnak bik a si mi MOGE rianṭuannak cu phihkharnak tuahpiak ding in SAC phaisa hmuhnak a tarlanghtu Justice For Myanmar nih nizan August 26 ah nawlnak an tuah. Cun ramchung ramleng zatlangbu 500 renglo zong nih MOGE cu phihkharnak tuahpiak ding in US President Biden sin ah ca an rak kuat.
Yar-Tta-Na, Yee-Tta-Khun, Shwe le Zaw-Tih hna ah Thailand cozah ngeihmi PTTEP Company nih Gas cu a chuah i Thailand le China nih an herhmi Gas zatuak ah 14 % a hmuh piak hna, tiah Reuters nih cun a tarlangh.
Russia Ralkap Thazaang Minung Singkhat Leng Kan Chap Lai – Putin!: Russia Ralkap thazaang cu minung singkhat leng in kan chap lai, tiah president Putin nih nawl a chuah. Ukraine tukdohnak ruang ah Russia ralkap cu an thih ngai ca ah a ra lai mi kum chung ah Russia ralkap thazaang minung 137,000 leng kan chap lai, tiah August 25 ah Putin nih minthutnak a tuahmi cu Russia cozah media hna nih an thanh.
Atu bantuk in Putin nih ralkap thazaang chap ding in nawl a chuahmi hi, thla 6 a rau cangmi ukraine tukdohnak ah a thi mi ralkap hna ai-awhter duh ah a si lai, tiah hlathlaitu hna nih cun an chim. Ukraine ram tuknak ah Russia ralkap a thimi le aa hliammi minung 80000 renglo an um cang, tiah US nih cun a thanh.
Yangon Khuapi Chung Myo U Kalar Sang Khuabawi Zung Bomb Puahnak Ah Minung 4 An Thi + Thawngpang Dang, Yangon khuapi, Myo U Kalar(မြောက်ဥက္ကလာ) peng No.12(ဌ) sang khuabawi zung cu nizan August 26 zan sml 9:09 ah Guerrilla phu hna nih lam hlat kut hmehmi bomb in kan puahhnawh hna, tiah Union Myanmar Civil Defense – UMCD sinin theih a si.
Cu bomb an puahnak khuabawi zung cu Waybaki le Hninsi(ဝေဘာဂီနှင့် နှင်းဆီ) lam palik sakhan pawng ah a ummi a si. Khuabawi zung chung ah thawngpang hlathlaitu, tiah ruahmi cilvil thuam in an um lio ah bomb puahhnawh an tong, tiah theih a si.
Cu bomb puahnak ah cun Union Myanmar Civil Defense – UMCD le anmah he ṭangṭi mi Rawt Malan HpyenLa – RMH hna he kan i bawm, tiah UMCD nih cathanh an chuah. Khuabawi zung bomb an puahhnawh dih in mizaw phortu motor le SAC ralkap cu khuabawi zung lei ah an kal i, Waybaki lam hrawng vialte cu an kham dih. Mi chokvai hna zong check hlatnak an tuah hna, tiah theih a si.
Wundwin Peng Ah SAC Ralkap Motor Bomb Puahhnawh Ruangah Ralkap 4 An Thi: Mandalay ramṭhen, Wundwin peng Hlawpin khua pawng ah nizan August 26 zing sml 9:00 hrawng ah SAC ralkap motor cu, bomb puahhnawh a ton caah ralkap 4 an thi, tiah PDF nih an langhter. August 26 ah Meikhtilar(မိတ်ထီလာ) pengkomh Wundwin peng Hlawpin khua pawng ah SAC ralkap motor bomb puahhnawh a ton caah ralkap 3 an thi, 4 hliamhma an pu i, sii-inn ah an kalpi hna.
Bomb puahhnawh an tonnak hmun ah SAC ralkap hna an taksa pelpawi le an thisen lawngte a si ko. Ralkap motor hnu in a kalmi tualchung mi pakhat nih, motor chung ah a thimi cu an i tlar ko, tiah a chim. Hliamhma pumi 4 chung ah pakhat a thi chap, tiah PDF nih cun an langhter.
Ceikhtu Ah Humhimnak A Lami SAC Ralkap Bomb Puahhnawh An Ton Caah 3 An Thi: Mon ramkulh, Ceikhtu(ကျိုက်ထို) peng, U Sit dum pawng ah nizan August 26 zing sml 6:00 hrawng ah SAC ralkap motor humhimnak a laak piaktu SAC ralkap pawl cu, bomb puahhnawh an ton caah ralkap 3 an thi, tiah tualchung mi hna nih an chim.
SAC ralkap pawl cu Ceikhtu peng ah a cawlcangmi Ko Ngal Lay Guerrilla, KNU, KNLA le PDF hna i bawm in an doh hna i, SAC ralkap 3 a hmun ah an thi, 2 hliamhma an pu, theih a si. SAC ralkap pawl cu bomb puah an ton hnu in pawngkam khuate ah lut in minung 10 an tlaih hna i, zanlei ah an thlah ṭhan hna. “SAC ralkap nih khual tlawng mi hna cu an tlaih hna i, ralphaw ah an hman hna. Nu an tlaihmi hna cu an thlah ṭhan hna. Pa pawl cu kal an ṭihnak hmun tiang ralphaw ah an hman hna,” tiah tualchung mi pakhat nih a chim.
Ceikhtu khua le Sittaung kar ah bomb puahhnawhnak le kahdohnak atu le atu a chuak. A luancia August 24 lio zong ah Mupalin khua pawng ah SAC ralkap motor cu, voihnih bomb puahhnawh a rak tong i, ralkap 5 hliamhma an rak pu, tiah Guerrilla phu nih cathanh an chuah.
KNU Hmunram Chung Kadohnak ah SAC 7 An Thi, Tualchung Mi Pakhat A Nunnak A Liam, KNU Hmunram Chung Kadohnak ah SAC 7 An Thi, Tualchung Mi Pakhat A Nunnak A Liam: August 25 ah KNU Brigade 5 le 2 ramri Ludaw(လူသော) peng Hpalakhu(ဖလာခို) hmunram ah SAC ralkap nih hmunhma kauh chap ding in umhmun an khuar caah KNLA Brigade 5 nih an kah hna i, SAC ralkap 7 an thi, 9 hliamhma an pu, tiah Brigade 5 sinin theih a si.
KNU Brigade 5 hmunram Mutaw pengkomh ah umhmun a khuarmi SAC ralkap le an kuttang BGF hna nih khuate lei hoih in hriamngan an kah tuk caah inn pakhat cu hriamngan nih a khen i, tualchung mi pakhat a nunnak a liam, tiah theih a si.
August 23 zan sml 7:00 hrawng ah SAC ralkap le BGF nih Mekalaw khuakomh chung hriamngan in an kah caah Delawpu(ဒေးလောပူ) khua inn pakhat hriamngan nih a tlak. Kum 56 tluk nu pakhat a nunnak a liam i, a vapa zong hliamhma a pu, tiah theih a si.
Cu pinah Hpapun le Kamamaung(ဖာပွန်နှင့်ကမမောင်း) khua kar ummi SAC ralkap kuttang BGF 1014 Battalion nih, Mekalaw khuakomh ah hriamngan an kah chap, tiah theih a si.
Pakistan Tilian Ruang ah Minung 1000 Renglo An Thi!, Pakistan ram tuanbia ah rak ton tuk theng bel lo mi dongcat lo in ruah a sur ca ah tilian a chuak i minung 1000 renglo an thi cang i, minung nuai 33 renglo harsaknak an tong, tiah nizan august 26 tuanvo ngeitu hna nih cun an chim.
Ramkulh 4 chung cu tilian ruang ah inn an rawk tuk hna, cucaah ramleng lei bawmhnak halnak zong pakistan cozah nih a tuah. Pakistan Prime Minister Shahbaz Sharif zong nih state of emergency phuan a timh, tiah PM Office nih a thanh ve.
Pakistan cozah le UN i bawm in tilian ruang ah harnak a tongmi hna bawmhchanhnak cu August ni 30 ah kan tuah lai, tiah PM Sharit nih cun a chim. Tilian a tuar mi chung ah nitlak thlanglei Balochistan le Sindh ramkulh hna hi an zual bik, tiah theih a si.
Leave a Reply