Zualko; Mipi ralkap pakhat nih ram le miphun caah a nunnak a peek than e!!

SAC Ralkap Camp Kahnak Ah Zero Pah- Kah- Phah In RPG TlaiTu 1 A Nunnak A Liam
=======================

Sagaing ramțhen, CuaiPung khua um SAC ralkap sakhan cu nihin July 22 zing ah PDF nih an kah i SAC ralkap le PyoSawHtee 9 an thi i mizapi vengtu ralkap ZERO phu in RPG tlaitu pakhat a nunnank a liam tiah ZERO ralkap phu nih an thanh. RPG tlaitu Aung Kyaw Zin cu dothlennak kan thok in a thih tiang ah hin SAC ralkap le PyoSawHtee 140 leng a thah khawh hna . A mah cu ram le miphun caah nunak pek tiang a dirtu pasal tha a si , Upatnak sangbik kan pek tiah an langhter.

Nihin July 22 zing Sml 4:09 hrawng ah Sagaing peng CuaiPung khua um SAC ralkap le PyoSawHtee sakhan cu Sagaing pengkomh PDF Battalion 2 he i bawm in kan kah hna i kahdohnak cu Suimilam 2:30 hrawng a rau i SAC ralkap le PyoSawHtee 9 an thi tiah cathanh chung ah an langhter.

Salingyi Ah Palek 4 Thah An Tong, Sagaing ramțhen, Yinmapin pengkomh, Salingyi market pawng i lakphakti dawr ah nihin July 22 zingka ah lakphakti a ding lio mi palek 4 kahthah an tong tiah tualchung mi sin in theih a si. ” Nihin zing Sml 7:30 hrawng ah market hnu lei lakphakti dawr ah lakphak a ding lio mi palek 4 cu mawtaw pakhat in a ra mi minung 7 nih meithal in an kah hna i an kir colh,” tiah mit hmutu tlualchung mi pakhat nih a chim.

Thah a tong mi palek 4 kong he pahtlai in Salingyi palek nih ” Salingyi ah duty a tuan lio mi palek thar 2 le camp i palek 2 cu zingka dawr an kal ah thah an tong, an phaknak zong a sau rih lo,” tiah an chim. An ruak cu Slingyi siizung ah an kal pi tiah theih a si. Salingyi palek zung ah nikum, 2022 October thla ah khan palek bawi pakhat tel in palek 3 cu mithi kong an hlathlai i an kir lei ah bomb an i pal i an thi.

Relchap, Falam-Hakha karlak kahdohnak kong he pehtlai in CJDC biachimnak nawl a ngeitu Salai Pawluh le Khonumthung Burmese biaruahnak “Kanmah lei nih thinlung lei le hmunhma lei in kan tei deuh hna” Sagaing ramṭhen, Kalay peng in SAC ralkap mawṭaw 27 le SAC ralkap thazang 200 hrawng cu Chin ramkulh ah an rak kai i Falam le Hakha karlak lamcung thluangthluan ah Chin hriamtlai phufonh nih an kah lengmang hna i SAC ralkap a thimi an tam.

Falam-Hakha lamcung kahdohnak he pehtlai in Chinland Joint Defense Committee (CJDC) biachimnak nawl a ngeitu Salai Pawluh Khonumthung Burmese nih biahalnak a tuahmi The Chinland Post nih Laica in aa tlakning in leh chin mi a si.
Khonumthung Burmese : Falam in Hakha lei ah a rak kaimi SAC ralkap le Chin hriamtlai phufonh karlak ah kahdohnak a chuak. A thimi an tam tiah kan theih. Kahdohnak sinning na kan chim kho hnga maw?

Salai Pawluh : Kalay in Falam lei ah a rak kai mi SAC ralkap 250 leng kha CJDC phufonh nih kan kah hna. July 8-16 tiang ni 8 chung kan kah hna, kahdohnak a fak ngaingai. Zaan ah kahdohnak ningcang kan ser. Lam thluangthluan vialte SAC ralkap pawl harnak pek le an mawṭaw hrawh ding in kan kah hna nain kan hriam le kuan dirhmun zohchih buin ni 8 chung kan kah hnuah kan kir ṭhan.

Khonumthung Burmese : Kahdohnak hi zeibantuk in dah nan tuah? Ambush (ṭha tein i bawh hnuah kahmi ) in maw nan kah hna? Salai Pawluh : Atutan kahdohnak hi Ambush in a si lo. Hmaichuah (Offensive) bak in kan kah hna ruangah SAC ralkap pawl an tuar khunnak hi a si. Lam thluangthluan hmunkhat lawng in kah si loin, Defensive phun si loin, Offensive bak in kan kah hna.

Khonumthung Burmese : Kahdohnak chungah Bomrap le Drone pawl nan hman tiah kan theih. Voi zeizah dah hi thilrii hmang in nan kah hna? Salai Pawluh : Kanmah lei nih Drone kan hman ko, Drone in bom kan thlak mi hma a kal fawn. Drone hma a kal ruangah SAC ralkap pawl zong an tuar khun. Kanmah lei nih Drone 10 hrawng kan hman. SAC ralkap nih Drone thlaknak hriam an i put caah Drone 3 cu an kan thlakpiak. Drone kan hman mi nih kan rian hma a kalpi ngaingai.

Khonumthung Burmese : Falam-Hakha lamcung kahdohnak ah SAC ralkap pa zeizah dah an thi? Chin hriamtlai phufonh in tah pa zeizah nih ram caah an nunnak an pek? Salai Pawluh : Kanmah lei in hriamtlai 2 nih ram caah an nunnak an pek. Hliam a pumi 14 an si. Pahnih hi cu an hma a fak ngai i thinphang a si. A taangmi 12 hi cu phan awk an um lo. Kan ral hna lei in kan fehter khawh mi hi 50 leng an thi, Hakha an phak hnu ah 4 an thi chap i 54 an thi lai tiah kan fehter. Hliam a tuarmi hi 20 hrawng an um lai.

Khonumthung Burmese : Falam-Hakha karlak kahdohnak ah zeiruangdah SAC ralkap a thimi an tam khun? Salai Pawluh : Anmah lei a thimi le hliam a tuarmi an tamb khunnak a ruang cu ram sinning le hmunhma ruangah a si, kanmah lei zong pehzulh in commando trainning kan tuah. SAC ralkap nak in hmunhma le fingtlang theihngalhnak ah kan thiam deuh. Tutan kahdohnak ah tampi thi ding in kan kah khawh mi hna hi kan i bochan bakmi Special Force phu ruangah a si.

Cucaah thinlung lei, taksa ṭhawnnak lei in tampi training kan pek hna. Cubantuk trainning kan pek hna tikah thinlung lei le hmunhma lei in kan tei deuh hna, offensive (hmaichuah) in kan kah hna tikah kan tei khun hna. Adang pakhat cu nikhua caan ruangah kan ral lei nih vanlawng bawmhnak an hmang kho lo. Ni 8 chung pehzulh in kan kah hna lioah SAC nih vanlawng bawmhnak a pe kho lo. Cun Special Force pawl nih kan kah hna lioah CNDF, CDF-Hakha, CDF-Thantlang, CNA zong an rak i bawmh caah thazang lei zong in a zaa kan si caah tutan kan ral lei in an tuar khunnak hi a si.

Khonumthung Burmese : Atu ahcun Hakha ah SAC ralkap mawṭaw tampi an lut cang, thlanglei Laitlang zongah Pakokku in Mindat ah SAC ralkap mawtaw an lut cang. Cucaah Chin ramkulh kahdohnak dirhmun hi zeidah a lawh? Salai Pawluh : SAC lei nih thazang tam deuh a hman khawhmi a si. Atu zong an hman cuahmah ko. Dothlennak thazang a ṭhawnnak Chin ramkulh ah thazang a hman chin khawhmi a si caah kanmah lei zong in timhtuahnak ṭha tein kan ngei ve.

Cucaah Chin ramkulh ah kahdohnak a chuak chin khomi a si. Chaklei Laitlang ah thazang a chap khun hi hmuh khawh a si. Thlanglei Laitlang Mindat zongah thazang a chap caah Chin ramkulh ah atu nak in kahdohnak a chuak khun kho tiah ka ruah. Khonumthung Burmese : Paletwa lei ah hmun 3 in an rak kai tiah kan theih. Khoika in dah an rat i khoika lei dah an kal lai? Atu hi khoika dah an phak cang i SAC ralkap thazang zeizah hrawng dah an si hnga?

Salai Pawluh : CDF-Paletwa battalion 1 le battalion 3 hmunhma ah a biapi in an raa, Paletwa ah hmunhma an khuarnak battalion 289 an phan. Hmun 3 in an rat caah Sami tiva kam khua a simi Saungwa pawngkam ah hmunhma an khuar lai. Mahkha hmun in thilsinning an ngiathlai. Mipi hna zong hramhram in an auh hna i an lem hna tiah theih a si. Adang pakhat cu Mi tiva lei a si. Mah lei khua lei ah SAC ralkap nih mipi 25 an rak tlaihnak Panwa khuate pawngkam ah SAC nih sianginn awn ding in timhtuahnak a ngei. Cucaah SAC ralkap pawl hmunhma khuar dawh an si.

Cuka hmunhma pawl a raami SAC ralkap hi hmun 1 ah thazang 100 leng an si, hmun 3 in an rat caah thazang 300 leng an si lai tiah kan ruahdamh. Kahdohnak zong a chuak kho. A biapi in SAC rianṭuannak a kal khawhnak hnga an i zuam i khatlei ah dothlennak phu le mipi karlak ah i ṭhencheunak pawl zong an thlah chih tiah ka ruah.

Khonumthung Burmese : Adang betchap le chimchap na duhmi um maw? Salai Pawluh : Atu ahcun CJDC Special Force training zong a voikhatnak an i lim cang. Chin ramkulh chungah hmual a ngeimi thazang zong dirh kan i zuam. Khatlei ah SAC rianṭuannak a kal khawhnak hmunhma pawl ah mipi hna nih va kal loin dothlennak kan tei khawhnak hnga lawng thazang chuak in dothlennak ah i teltum ding a herh.