Sagaing Ah Mithahnak Voi 5 A Chuak
=======================
Sagaing ramthen ag July ni 28-28 nihnih chungah mithahnak voi 5 a chuak i minung pa 7 an nunnak a liam tiah theih a si. July ni 29 chunlai suimilam 12:00, MonYwa pengkulh, AlungTat khuapi, KhaWayCin khua ah mi thahnak ah U Khine Maung Myine le an nu Daw Aye Htay an nunnak a liam tiah theih a si.
July ni 28, MinMuu pengkulh, KaRuhCee khuate ah khuaukbawi hlun U Myint Zaw thah a tong tiah theih a si. Cu pinah Sagaing pengkulh, LynZin khuate ah kum 52 a si cang mi U Win Aung meithal kahnak in a nunnak a liam tiah theih a si. Cu hnu july ni 28 thiamthiam, Sagaing pengkulh, NgiangPyinWon khuate, MonYwa-Mandalay lamah motor mawng U Zaw Naing Win (U Ba Jin) meithal in kahthah a tong tiah theih a si.
YinMarPyin pengkomh, PaLay pengkulh, ThatThaYa khuate sianginn ah cachimtu saya U Sai Min Laat cu namtein sawh a tong i a hliam a fah tuk caah siizung ah an thlop tiah theih a si. Cun Shwebo pengkomh, KhinU pengkulh, Sitha khua ah U Sing Htay (62) le U Myo Hlaing Win thah a tong tiah theih a si. Sagaing ramthennak mithahnak voi 5 a chuak i minung pa 7 an nunnak a liam tiah theih a si.
Aung San Generation Monywa nih cun a herh ning in cawlcanghnak kan tuah peng lai, tiah an cathanh ah cun an langhter. Aung San Generation Monywa le tualchung hriamtlai phufonh hna nihhin July 27, zaan suimilam 8:30 hrawng zong ahkhan Butalin(ဘုတလင်) palik sakhan cu kutser bomb an chehhnawh hna i, SAC ralkap 8 hliam an tuar, tiah theih a si.
ThanLyin Khuapi Navy Headquarters In SAC Ralkap Ralbawi Pakhat BawLa Khe PDF Sin Ah CDM A Tuah , Yangon ramțhen, ThanLyin ( သန်လျင်) khuapi Navy Headquarters in SAC ralbawi pakhat cu kan sin ah CDM a tuah tiah BPDF nih nihin July 29 ah cathanh an chuah. ” Job For Kayah” in a rak kan pehtlaih i a rak ra mi a si. Atu ah cun a himnak hmun ah kan kuat cang tiah an langhter.
Yee Khuachung Palik Sakhan An Kah, Palik Pali An Thi, Mon ramkulh, Yee( ရေး) khuapi laifang ah a ummi palik sakhan cu hriamngan, hriamhme hna in kan kah i kan luhhnawh hna tiah Yee Monsters Phu hruaitu sin in theih a si. July 28 zing Dalan kan fimtawl dih hnu kan țin pah zanlei Suimilam 2:30 ah kan kah pah mi a si tiah Monsters phu hruaitu nih a chim.
” Kanmah lei nih ruahlo piin kan kah hmasa hna, anmah lei nih cun an kan kap ve lo i him tein hnu kan tolh kho ” tiah a chim chap. 40 mm le hriamhme hna hmang in kan kah hna caah 4 an thi i 5 hrawng hliam an tuar tiah a chim. A Luancia July 19 zongah SAC ralkap gate pakhat cu kan rak kah i 2 an thi tiah a chim chap.
Pakokko Peng Khuate Pakhat Ah Umhmun Khuarmi SAC Ralkap Kah An Ton Caah 5 Nak Tlawm Lo An Thi Magway ramṭhen, Pakokko peng Ashibungkan(အရှေ့ဘုန်းကန်) khua ah umhmun khuarmi SAC ralkap pawl cu, PDF nih July 28 zanlei sml 5:00 hrawng ah kan kah hna i, ralkap 5 nak tlawm lo an thi, tiah Earthquake People’s Defence Force (UG) sin in theih a si.
SAC ralkap nih umhmun an khuarnak cu Earthquake People’s Defence Force၊ PKU North PDF le Royal Defence Force PKU hna nih an kah hna i, King Cobra People’s Defense Force nih hmunhman humhimnak an lakpiak hna. Cu kahdohnak ah SAC ralkap an i thuhnak(bunker) pakhat le an umnak phungki sianginn an lak khawh. Cun, 60mm lung thum in kah an bawmh hna, Pakokko in bawmtu motor pakhat le Inpin lei in bawmtu ralkap an rak phanh caah hliam tong lo tein PDF cu hnu an kir, tiah theih a si.
Myinmu Peng Ah SAC Ralkap Pawl Drone In Bomb An Thlak Hna I 3 An Thi, 3 Hliam An Tuar. Sagaing ramțhen, Myinmu peng , NgiangPinWin( ညောင်ပင်ဝန်း) palik sakhan hmai ah checking a tuahtu SAC ralkap hna cu nizan July 28 zanlei Sml 4:00 hrawngah Drone in bomb kan thlak hna i 3 an thi 3 hliam an tuar tiah MyinChan pengkomh, Battalion 7 ZERO phu nih cathanh an chuah.
Thantaungkyi Peng Ah SAC Ralkap Motor Cu KNLA Ṭangṭi Phu Nih Bomb An Puah Caah Ralkap 10 Hrawng An Thi, Motor Pahnih Rawk, Karen ramkulh, Thantaungkyi(သံတောင်ကြီး) khua le Palikhi(ပလေခီး) khua karah SAC ralkap motor cu KNLA Brigade 2 nih nizan July 28 zing sml 9:30 hrawng ah bomb an puahhnawh hna caah an motor 2 a rawk. Ralkap 10 nak tlawm lo an thi, tiah theih a si.
Taungngu(တောင်ငူ) in Thataungkyi ah riahcaw a chantu SAC ralkap motor panga cu, KNLA nih bomb in an puah caah ralkap 10 hrawng an thi, 5 hrawng hliamhma an pu. A thimi chungah ralbawi pakhat aa tel. Suimilam cheu chung kan i kap i, a thimi an hriamnam char manh a si lo. Bawmtu an rat caah hnu kan kir tiah KNLA Brigade 2 nih an langhter. Bomb puah an ton hnuah SAC ralkap bawmtu an ra i, pawngkam cu hriamngan in an kah thluahmah tiah KNLA sinin theih a si.
Taze, Intaw Le Kantbalu Kahdohnak Ah SAC Ralkap 23 An Thi, A Nung In Pakhat An Tlaih, Sagaing ramṭhen, Taze peng ah rallam a sialmi SAC ralkap le Kanhtuma(ကံထူးမ) palik camp cu July 27 ah Taze PDF ṭangṭi phu hna nih voithum an kah hna caah SAC ralkap le palik 15 hrawng an thi kho, tiah Taze PDF sinin theih a si.
Taze peng Ye Oo Kone(ရေဦးကုန်း) khua pawng ah rallam a sialmi SAC ralkap pawl cu, July 27 zing sml 10:50 hrawng ah Taze PDF ṭangṭi phu hna nih hriamngan le hriamhme in minutes 10 chung hrawng an kah hna. Ralkap a thimi an tam. PDF ralkap pakhat hriamngan nih a khen caah hliamhma hme a pu, tiah theih a si.
SAC ralkap pawl cu July 27 chun sml 12:00 hrawng ah Chaungsone(ချောင်းဆုံ) khua lei ah an kal i, PDF ṭangṭi phu nih an kah ṭhan hna. Cu pinah Taze peng Kanhtuma palik camp cu July 27 zan sml 10:50 hrawng ah PDF Battalion 6 nih hriamngan in voinga an kah hna i, palik a thimi an tam lai tiah an zumh.
“Nikhat chungah voithum kan i kap. Ralkap pawl cu a thimi an tam caah Kywinlay(ကျွန်းလည်) khua in motor nih a rak don hna. Kanmah lei in ralkap pakhat hliamhma hmete pumi a um ve,” tiah PDF pakhat nih a chim. Taze peng July 27 ah kahdohnak voithum a chuak. Taze PDF, Shwebo Battalion 6,7,8, peng Pah Kah Phah le PDF hna i bawm in an kah hna tiah Taze PDF sinin theih a si.
Cu ṭhiamṭhiam in July 27 zanlei ah Sagaing ramṭhen Intaw peng KTV pakhat ah SAC ralkap pahnih cu KIA le PDF nih an tlaih hna, tiah Indaw Revolution nih a langhter. Intaw peng Mawlu le Naba karlak ummi, KTV ah zu a dingmi ṭatma 88 kuttang Battalion 416 in ralkap Chan Aye le Sergeant Thura Aung cu KIA le PDF nih an kah hna i, Thura Aung cu a thi. Chan Aye cu an tlaih tiah theih a si.
July 28 ah Sagaing ramṭhen, Kantbalu(ကန့်ဘလူ) peng Ongchauklung(အုန်းခြောက်လုံး) khua pawng ah KLPDF B 1, Kawlin peng Pah Kah Phah, Kantbalu pe Pah Kah Phah hna i bawm in zanlei sml 4:30 hrawng ah SAC ralkap cu bomb kan puahhnawh hna caah ralkap 7 an thi, tiah Kawlin Revolution KR nih a langhter.
Leave a Reply