Nihin Kahhdohnak ah SAC Ralhrang Minung 43 An Thi I Mipi Ralkap Lei In Minung 10 Nih Ram Le Miphun Caah An Nunnak An Peek
==================================
Nihin Magwe ramthen, Myaung pengkulh chungah SAC ralhrang le mipi kan ralkap hna karah kahdohnak a chuak i mipi kan ralkap leiin minung pa 2 nih ram le miphun caah an nunnak an peek tiah theih a si. Bogo ramthen,YeThaSi ah SAC ralhrang le mipi kan ralkap hna karah kahdohnak a chuak u mipi kan ralkap leiin minung pa 2 nih ram le miphun caah an nunnak an peek tiah theih a si.
Cun Sagaing ramthen, KhinU pengkulh ah SAC ralhrang le mipi kan ralkap hna karah kahdohnak a chuak i mipi kan ralkap leiin minung pa 1 nih ram le miphun caah a nunnak a peek tiah theih a si. Sagaing ramthen, MinMuu pengkulh, Manthalay khuate pawngah SAC ralhrang le mipi kan ralkap hna karah kahdohnak a chuak i mipi kan ralkap leiin minung pa 3 nih ram le miphun caah an nunnak an peek tiah theih a si.
Cun bantuk thiamthiam in KhinU pengkulh, LawngSi khuate pawngah SAC ralhrang le mipi kan ralkap hna karah kahdohnak a chuak i mipi kan ralkap leiin minung pa 2 nih ram le miphun caah an nunnak an peek tiah theih a si. Nihin kan Kawlram chungpumpi kahdohnak ah SAC ralhrang leiin minung 43 an thi i minung pa khat tliah an si. Mipi kan ralkap in pa 10 nih ram le miphun caah an nunnak an peek.
American nih Ukraine cu Dollar 54 billion an bawmh cang. NUG nih PDF an bawmh mi hi 45 million Dollar lawng asi. Hriamnam cawk nak ah hmang dih asi lo. Ralkap le a herh hai mi le Humhimnak caah an pek mi asi. American bank ah chiahmi 1000 million (1 billion) tal cu ankan bawmh lo tal ah NUG kut ah pek sehlaw, Meithal le kuan kan chambau ee ti hi aum tuk ve lai lo. 1 billion cu kan pe sehlaw, Ukraine nakin let 54 a tlawm deuh.
45 million he cun let 4500 in aa thlau. Paucan Dohthlennak ah American holh ter uh, luphum in I tel ve ding in kan chimh rel piak uh kan ti lengmang mi hi a ruang aum. Vawlei pi cu American a holh lo ahcun: buaibainak a chuak I, American a hloh ah Vawleipi cu an I za dih. American aholh ahcun: ahnu zulh ding mi a Hawikom ram an tam tuk, an thawngṭha tuk caah, an kan bawmh cio lai. American a lungtluang seh law, kan ram le miphun siṭhat zungzal seh ti an duh caah American bang in an kan bawmh ve te lai.
An dih mi cu USA nih covo pelte an pek ah, let tampi in an hmuh ṭhan lai/ an hmuh ṭhan tawn. Paucan Dohthlennak cu kan lim tuan ve lai, Tutan hi cu NUG le Mipi nih rampi kan uk cang lai. Ralhrang thluk cikcek asi fawn lai, kan chanchung ah, kan techin fapar chan ah Ralhrang Anaasin (Rallokap + Civil) an um ti lai lo. Paucan Dohthlennak ah American I tel ve ding, hruaitu si ding in NUG nih rianrang tein ṭuan a herh tuk hrinhran. Riandang le Ramdang cu um rih ko hna seh. Hlan lio legitimacy full an kan pe tu le an kan bawmh tu zong American a holh tuk caah,
American nih kawlram buainak a papek lo caah, an ṭulh ṭhan dih. Rallokap he an I pehtlaih ṭhan. Sipuazi an tuah ṭi ṭhan, an I chawnbiak ṭhan. Hlanlio ṭuancia nak le Hlawhtlinnak vialte zawn parathlei kan hluan cang ko. An pamtuk te aw. American loin Ramdang an holh hi cu Ram ui ah an ruah ko hna. NUG nih American tawn biaruah ah asinpi deuh lo ahcun American um mi CHINMI kan pa le rual le kan mifim hna zong fial ding an si ko. American NUG Special Envoy caah Dr. Hre Kio (or) Chinmi kan pa anih tiah papek in fial ah an ṭha cang lai. NUG minung in cun ei a chuak ti lo caah.
Misual Damiah Lainawng pa cu Miṭha bangin kan chawnbiak zungzal ah hin a lem cang. Saupawt in aa lak cang MAH nih. Damiah le misual cu Damiah le Misual sining bak in chawnhbiak an herh ve cang. Damiah cu Damiah bang in le Gangstar asi ning in lehrulh a herh. Mifim bang in chawnbiak ah asi khawh ti lo tiah Mr. Derek Chollet nih a ti. Annih hi American Ramdang Zung Ruahnak petu asi. Ramkip nih miṭha bangin kan chawnh biak mi nih Kawlram a dam ter khawh ti lo. Kawl Ralhrang Rallokap cu Misual bik Damiah phu (A Bunch Of Thugs) tiah Mr. Derek nih min a pek hna. Phihkarh nak lawng in a za ti lo, Man cikcek in den an herh a ti duh nak asi. Mr. Derek hi NUG nih an kawmh khawh ahcun; Pau Dohthlennak ah USA cu kanmah lei ah aum khawh mi asi. Ka hnabei asei ngai ko.
Bunch timi biafang cu afak ngai. Rolung a bunh hna. Banhla thlar khar ah aa thlai mi Banhla bantuk in Misual le Damiah an si nak cu: Banhla thlar bangin a buin aa thlai lulh mi Ralhrang le Damiah Kawl Rallokap an si a ti ko hna, Mr. Derek nih. American le Nitlakram hna nih Ralhrang an chawnbiak ning cu, a sual mi Siangngakchia pa Cawnpiak bantuk asi. Nikhat khat ah a fim te lai timi ruahchan nak he Saya/ma te nih an Cawnpiak. Cukocu American le a Hawikom ram rual nih Ralhrang SAC cozah an chawnbiak ning cu asi.
American le Nitlak ram hna nih MAH an chawnhbiak ning cu: Sipuazi phih, an ram lut phih, an mual pho; an thangchait (Ramfim nih an ṭih bik mi cu an ṭih ve lai tiah an ruah); Mipi caah kan thinphang tuk lawmmam; Statement an chuah zungzal; mipi he kan um ṭi zungzal; tbk lawng asi. MAH cu khua tuaktan khawh lo tiangin a Lubo mi le thluak chiat mi asi caah, a zeipoi lo. A hrik a thak lo. Hrikti de pakhat hmanh a kek ti lo. Kawlram cu ralhrang nih uk zungzal asi, Ralhrang kip cu an phihkarh ko hna nain, santlaih lo asi. Mipi tu kan si fak chin, anmah ralhrang le, chungkhar minung tu an rum chin. MAH he I pehtlaih tikah; kan lamthluan kan thlen a herh cang. Damiah bangin kan den lawlaw aherh cang tiah Mr. Derek nih a ti cang. American kha kawlram tuk ve awk ah; a lemsoi hna Bantukin ka theih. Ka duh tuk bia zong asi kho.
Kawlram Ralhrang Rallokap nih Nurhin covo an buarnak; Genocider an si nak; War Crimes le Crimes Against Humanity an buarnak vialte cu: Vawleipi hngalh asi. Kaa lawng in chimh ah aza ti lo. Practical an cawlcangh a herh tiah, UN meeting pi ah Mr. Thomas Andrew nih a phomh cang hna. Mr. Thomas Andrew cu UNCHR Kawlram Palai, Special Envoy asi. UN le International kha Damiah le Lainawngpa le Damiah bawipa MAH cu tuahserhnak in lehrulh a herh, Kaa chimh nak lawng in a zeipoi ti lomi Ralhrang Rallokap an si ati duh nak asi. Mr. Derek Nih Americana cozah le American mipi sin ah bia a chimh cang. Mr. Tom nih UN le International achimh ve cang hna. NUG nih hnuzulh lawng a tang cang. Azizut dantatnak cu Practical in kan tuah khawh lo I, kan kaa lawng in kan chimh zungzal, Statement lawng tein seikhat kan chuak zungzal ahcun: sualnak ngeih lomi kawlram mipi tamtuk an thah cang hna lai tiah Mr. Tom nih Khengchap in a nawlh rih.
UN, International, American, EU, NATO, ICC, ICJ, UNCHR, Geneva le Vawleipi nih MAH le Kawl Rallokap cu Misualbik Damiah in an hmuh dih ko hna. Nain Damiah bangin an chawnbiak hna lo mi hi kawlram a dam khawh lonak le piatana cu asi. Mr. Derek bangin A Bunch Of Thugs bak an ti khawh a herh. An ti bangin, phaisa le hriamnam he kan bawmh ve cang hna seh, Practical in mipi lei ah umbak cang hna seh, cutin kan si khawh ahcun: Kumkhat tlin hlan ah MAH kan thluk cikcek ko lai. UN le American koko nih Misual Damiah bang in an chawnhbiak lo mi a poicem bik asi ko. Anaa an lak ri in, 2021 thawkin Rallokap nih ralhrang Bantukin an cawlcangh nak vialte hngalh dih asi nain Damiah pa tiah an au hnawh ballo. An tuah mi thil vialte hi Ralhrang le Damiah aum bal mi hna nak in a zual deuh mi le a sual deuh mi Rallokap an si kha hngalh buin miṭha bang in I pehtlaih zungzal mi nih MAH lungthin a khon ter lehlam. Aphung asiko a ti men.
MAH nih uknak an kan chut ri in, nihin tiang ngeihchiat nak le tuksapur Lainawng nak thawngpang lawng te theih zungzal asi. Thawngṭha kan theih ni aum bal rihlo. Ni fatin in mipi tlaih, hrem, that, innlo le khuapi meiduah, Ram mipi vialte ni fatin hrem le that kansi. UNCHR cazin ahcun: Sualnak ngeih lo mipi 2000 leng an kan that cang. 14000 leng an tlaih hna. Innlo 20000 leng Rallokap nih mei khangh. 800000 leng cu Innlo le khuaram chuak takin Ralzam an si. Cazin ngai ngai cu hi nak in a tam deuh lai. Phone le internet cu Rallokap nih an phih dih caah, thawng dik kan theih khawh lo mi kan hngalh khawh lomi, kan bang khawh lomi hi a tampi rih lai. American le Nitlak ram hna phihkarh nak nih, MAH cung ah santlaih nak aum tilo. Mipi Thatnawn lo ding le meithal cawklo ding zong a khap khawh lo. A ingpuang I an kan that chin nak tu asi lehlam. American phihnak nih MAH cu ralhrang asi nak a ngawl ter khawh hlei lo.
Asi ahcun: American le Nitlakram hi kaachimh, Thanhca, phihnak lawng in maw kan dih ter rih ko lai. SAC nih mipi an kan that cuahmah mi cu; kan zoh sawhsawh rih ko lai maw? Mipi an kan ral I ni fatin an kan thatnak aruang cu mipi thimh mi cozah a thlak cang caah amah nih zungzal uk an kan duh caah asi. Nan hngalh dih ko. Mipi duhnak kha piasen hmanh zeirello tu asi caah uknak an kan chut. Mipi duhning hrawk cu maw Democracy ati rih Uicopa hi. Nan kan zoh sawh kar ah Mipi 55 million hi thah dih khawh kan si. MAH nih Russia a tlawn ah Chemical le Nuclear hmang awk ah (Mipi that dih awk ah), Russia ah Cuduh le rocket a hlan cang hna. Russia nuclear mifim hna le Aakaataa (Vanchum lei) mifim hna zong a tawn hna. Cucu news ah an phuang caah Putin nih Aakaataa (Vanchum lei mifim rual) Luzik pa cu aphuak ve.
Mipi thahnak caah a thli tein MAH nih a rak tawn lengmang cang hna ti nak asi. American le Nitlak ram hna nih Practical in an kan bawmh lo ahcun, 2023 thimhnak a tuah khawh lo ahcun, Kawlram mipi cu Chemical weapon in thah dih kan si cang lai. Nuclear hmanh in kah an kan timh cang mi Damiah MAH cu Miṭha bang in I pehtlaih nak a herh nak pelte hmanh aum ti lo. MAH cu a hlan tein Democracy hrawk a duh mi pa asi. Sithmandaw Democracy aa ti ter mi tham cu Rallokap nih zungzal kan in uk hna lai an ti duh nak asi. Federal Democracy aazuam cuah mah mi hna cu: MAH nih huat bik mi kan si. Cucaah Raldoh in thah lawng ai zaa ti lo. Cihmih an kan timh. Ral he aa pehtlaih lo mi mipi a thah hna, Innlo aduahmi cu: Federal nih mipi simh hna seh ati duhnak asi.
Cucaah MAH he PEACE tuah I, Federal kan ngah lai ti cu asi khawh lo ka tinak cu asi. Rallokap le kan chungkhar, kan techin fapar lawng nih kawlram hi uk zungzal usih, cuti si khawh ding ah Sithmandaw Democracy kan ti lai, Federal Democracy tiah amin in kan ti lai I, uktu Luzik cu Rallokap le kan tefa si zungzal hna seh ti aduh caah: Amah MAH aduhlo tu, a dohtu vialte cu hramhram in thah kan si nak cu asi. Vawleipi um a Hawikom ralhrang hna Bantukin, anmah duh ning le amah pakhat lawng nih Rampi Luzik si zungzal nak asi.
Kawlram si ti loin MAH pumpak ram dirh bantuk le, Rallokap le an tefa hna ram dirh bantuk asi. Annih ram an ngeih lo caah, ram ngeihtu mipi an kan that, an kan dawi dih, Israel mi nih Canaan mi an ram in an chuah dih hna I, Judah ram (Israel Kingdom) an dirh Bantukin MAH pennak dirh an duh. Rallokap le mipi raldohnak hi 1962 in aa thawk cang. A tu Bantukin thahnawnnak tuksapur le Genocide, Crimes Against Humanity le War Crimes timi Geneva Convention an buar nak hi Tlangcungmi cung ah asi cannak cu kum 70 leng asi cang. Kawlte umnak ah atu lawng hi asi.
Kum khat leng lawng kawlte nih an tuar rih. Tlangcung mi cu kum 80 leng kan temtuar cang. Aruang cu Rallokap le an tefa lawng nih SPH bangin Kawlram uk zungzal an duh caah asi. 1962, 1988, 2021 ah Anaa an kan chutnak aruang hi aa khat dih. Mipi nih kan vanhai bik mi le kan duh bik mi (Abikin Tlangcungmi Ramkhel kong): Zalonnak; Tlukruannak; Mah tein Khuakhan Lairelnak: Aa nuam I Duhdim nun he aa khat mi Zatlang nun le mibu sinak tbk, chunmang vialte Rallokap nih an hrawk zungzal ko. IT chan kan phak tiang in a simh khawh hna lo I uknak an kan chut rih: Mipi cu thimh awk lamdang kan ngeih tilo caah hriamnam tlaih in kan doh lawlaw cang hna. Ana lak piak le chut aa faksak mi cu GZ an si. CDF PDF CNDF an si dih cang.
1962 in nihin tiang American le International cu KAA policy lawng te an hmang ko. Democracy lei ah kan kal cuahmah lio ah Practical in an kan bawmh mi aum bal rih lo. 1988 uknak chut lio ah: KAA lawng tein an kan bawmh caah Hlawhtlinnak kan hmuh lo. Sipuazi le adang in Rallokap an phih mi zong a santlai lo. Cu nih Ralhrang a thluk khawh lo caah tutan hi an I thawh ṭhan. Tutan zong zei aa hlei lo. Policy thlen loin, BIAKA lawng in an kan Dirhkam caah asi. Rallokap bawi rual cu Nikhat hnu Nikhat in an sual chin lengmang. Mipi cu fak khawh chung in an kan hrem, an kan thah. Ni a liam deuh, an sual deuh chinchin, an I ning deuh timi aum ballo. June 2022 ah mipi an lungfak seh tiah teirul chamh Bantukin Mo Jimmy le Phio Zeyar Thaw telin mipi 4 cu thihdan a pek hna MAH nih: Mipi sirhlei le teirul an kan chamh mi bak asiko.
Kawlram le vawlei pumpi a hninh dih. An chungkhar sahlawh caah a fak lai ning hi tuak cio ko uh. Kan lungfak tuk ah kan daak I kan ṭap, cu hlei tuah khawh mi kan ngeih ti lo. American le Ramdang zong nih an kaa lawng in an kan dirhkam thotho rih. Na thah hna ahcun na cei lai ati tu ram kan ngeih hna lo. Kum 77 a chuak Camtuak a dih hnu, Ni 3 nak ah, Kanpi Suu Ci cu Rangoon a Inn in Nipidaw thong Inn ah a ṭhial. Mipi kha lungfak in thih hnaseh ati duh nak asi. Mipi tuahhram asi. Timh ciammam tein mipi an lung fak seh an kan ti nak asi. American le Nitlakram hna cu an zia Bantukin asi awk asilo ti le statement an chuak luklak I an dai ko.
American Ramdang lei chimhnak nawl ngeihtu Mr. Nibrights nih fak ngai a den hna. Democracy hruaitu hna thihdan pek cu a phung asi lo. Nuhrin covo nan buar. Rule Of Law zei nan rello.
Kanpi Suu telin sualnak ngeihlo mi le hramhram in nan tlai mi vialte chuak dih uh tiah a sik hna. A ka in a sik hna. Tuahserhnak le Practical nih a zulh ve ti lo. Kanpi Suu an ṭhial in Ni 4 nak ah Thong Inn ṭhial hi American nih kan doh, kan cohlan khawh lo tiah Mr. Derek Chollet amah Twitter account ah a ṭial. Kawlram Democracy kong ah an kan bawmh bik tu cu American an si ko. Democracy phu le American cu Unau Arsa ei ṭi kan hluan ko. Nain Kaa lawng te deuh in asi ve. Practical in Ngunsawm tawmpi le hriamnam he tiah Ukraine bangin an kan bawmh ballo. Cucaah Anaa an lak tir ah American an holh ah khan ka lungdong tuk cang. 1988 hnu ah hlan nak in American nih Democracy lamthluan a an kan bawmh deuh ngai.
Tutan Rallokap hremhnak ah, rampi a rawk cikcek: Mibu vialte kan rawk dih I kan vaivuan cikcek: Pumpak le chungkhar kan innlo zong an ciam dih: Nikhat hnu Nikhat an zual chin lengmang: Bawmhtu an um khawh ti lo caah bawmhtu vanhai in nithla kan rel: Nain American nih an Policy an thlen hlei lo. KAA Policy lawngte an hmang peng rih. Hlanlio Bantukin Rallokap an phihkarh mi cu sullam a ngeih ti lo. Rallokap nih phihnak le soisel nak cu zei ah a rel mi ansi lo. Amah American Pumpak cawlcangh loin: Tuah khawh nak le ṭuan khawh nak a ngeih lomi ASEAN tu kha Kawlram buaibainak daiter awk ah American nih an fial / a hnatlak pi ko.
Hi ka ah hin American hi palh hram ai thawk cang. ASEAN cu huham le rumra a ngeih mi an silo. Kawlram Rallokap nih zei an rel hna lo. Rallokap Bawi rual kha an lungthin a thlen khawh hna lo (Hlan lio tein). ASEAN biachahnak 5 zong MAH le Rallokap nih zulh an duh lo. ASEAN in kawlram Zawtnak le raldohnak ka daih ter lai ti cu a pit mi lam asi. Asi khawh lai lo. American nih a tu le tu an chimh mi “Kawlram mipi he kan um ṭi” timi cu tuanbia ngai nuam bantuk men khi asi ko, Kawlram mipi caah: Mipi kan nunnak, khuasak tintuk nak, vialte cu Rallokap hrawknak in American nih an kan khamh khawh ti lo. Ralhrang thluk awk ah Raldohnak ah American nih zei pipa an kan bawmh mi Aumlo. TEINAK hmuh awk ah American bawmhnak aum ti lo.
Ni fatin minung Sahrang sehin an kan sehthat zungzal; minung he I lawh loin, saram bang an kan hrem, an kan tlaih, an kan that, an eihmur le an firkhut nih si rih, kawlram ah Nikhat hmanh um aduh ti lo mi mipi kan tam tuk cang. Cucu American siseh, Valeipi siseh, an kaa lawngin siloin, biatak tein, luphum in an kan ṭanh pi a herh ko. Ukraine Bantukin tampi bawmhnak kan ti lem lo. Practical in Dohthlennak kan tei hlan lo, chawva le Dirhkam nak in an kan bawmh awk hrimhrim asiko. Anmah he pehtlaih in rianṭuan tu hi nan daithlang pah deuh ko rua. Nan Fimnak nih a phak lo I, nan pahrang asilo ahcun, kan in ngaithiam ko hna. Adang ruangah asi ahcun sualphawt nan si cang. Hmailei zong ah sual phawt zungzal nan si ko lai.
Kaa le thanhca (Statements) lawng in nan kan bawmh I, Practical in nan kan bawmh khawh lo mi cu: ralhrang Rallokap kha mithah nak Laisen pek bantuk asi. Damiah an si bangin le Lainawng mi an si Bantukin, Damiah bangin chawnhbiak, azizut, dantat, ti lei in an kan bawmh a herh cang. Culo ahcun Fawi le bai in ralhrang thlukin kan tei khawh hna lai lo. Crd-Zingtin Cuai Cinzah
Kalaymyo Ah Mibawmchantu Chungtel le CDM Sibawi Telh In Minung 4 Cu SAC Ralkap Nih An Tlaih Hna!: Kalaymyo ah SAC ralkap nih mibawmchantu phu chungtel Ko Kyi Yah Aung, CDM cawlcanghnak a tuahtu siibawi le khuami 2 an tlaih hna, tiah theih a si. Kalaymyo, Pinlung sang ummi Ko Kyi Yah Aung cu nihin July 28 zinglei ah SAC ralkap nih an tlaih, zeiruang ah an tlaih ti cu theih a si rih lo.
Nizaan July 27 zong ahkhan Kalaymyo Baeinn(ဘဲအင်း) sang ah inn hlang in khuasa mi CDM cawlcanghnak a tuahtu sibawi pakhat le inn ngeitu pafa hna cu SAC ralkap nih an tlaih hna, tiah sangchung ummi nih an chim.
“Inn ngeitu cu Nga zuar in a cawmmi an si, inn hlangtu cu CDM siibawi a si, a min le khoika ummi a si fiang tein theih a si rih lo,” tiah sangchung ummi pakhat nih a chim.
A luancia ni tlawmpal zong ahkhan Kalaymyo Aungtitsa(အောင်သစ္စာ) sang ummi pa 5 cu SAC ralkap nih an rak tlaih hna, tiah theih a si, nain an min le ho an si theih a si rih lo.
India Ram Ah Zu Din Sualnak In Minung 40 Leng An Thi Cang!: India ram nitlak lei ah zu(alcohol) dinsualnak in minung 42 an thi i, minung 100 fai siizung an phan, tiah ṭuanvo ngeitu palik nih July 28 ah an chim. Phunghram nih a onh lo mi zu a zuartu pawl cu tlaih ding in cozah nih nawl a chuah colh.
Gujarat ramkulh khua cheukhat ah an zuar mi zu pawl cu Methanol tam tuk aa tel i, zu ding pawl nih an i din sual ruangah tuzarh chung lawng ah minung tam ngai zawfak in an um, tiah theih a si. Zu dinsualnak hin Botad pengkomh in minung 31 an thi cang i Ahmedabad pengkomh zong in minung 11 an thi cang, tiah palik ṭuanvo ngeitu hna nih an chim. Mining 97 cu siizung ah an i thlopbul lio a si i minung 2 cu an zualhma ngai, tiah theih a si.
Prime Minister Narendia Modi a chuahnak Gujarat ramkulh cu India ram ah zu zuar le din zong an khapnak hmun pakhat a si. Ṭuanvo ngeitu hna nih Gujarat ramkulh i phung ning loin on mi zudawr vialte cu an hrawh dih i, a zuartu zong an tlaih hna, tiah theih a si. PDF Lemcang In SAC Ralkap Sin Thawngpetu Pakhat Cu Bago PDF Nih An Tlaih!: Bago ramṭhen, Bago peng ah PDF ralkap lemcang in SAC ralkap sinah thawngpang a thanhtu minung pakhat kan tlaih, tiah Bago PDF nih nihin July 28 ah cathanh an chuah. PDF nih an tlaihmi cu Civil-PDF in ṭuanvongeitu pakhat si mi ralkap San Shia a si, tiah an thanhmi ah cun an langhter.
San Shia cu Bago khuachung cawlcanghnak ah aa tel mi a si i, “Khuachung um a him lo” ti in July thla lai hrawng ahkhan Kayin ramkulh chung tlangcung hriamtlai phu umnak hmunram ah a zaam, tiah theih a si. Hmundang i a zaam tikah a hawile PDF nih an lunghrinh i checkhlatnak an tuah. San Shia nihcun Bago um hriamtlai phu hna cawlcanghnak vialte cu SAC lei ṭangmi Han Ngein Oo telegram channel ah thawng a rak peknak hmuh a si, tiah Bago PDF he naihniam in ummi nih an chim.
A luancia July 7 i Bago mino 9 tlaihkhih an rak tonnak zong, San Shia ruangah a si lai, tiah Bago PDF cheukhat nih cun lunghrinhnak an ngei. Bago PDF nih Bogo tualchung hriamtlaitu phu dang hna cu San Shia aa telnak CPDF he pehtlaihnak tuah lo ding in an chimhruah hna i, tlaih a tongmi CPDF chungtel San Shia cu dan kan tat lai, tiah Bogo PDF nih cun an langhter.
SAC Ralkap Nih Gangaw Peng le Zotung Lei ah Rallam An sial I Khuami 30 Hrawng An Tlaih Hna!: Magwe ramṭhen, Gangaw peng in Chin ramkulh Matupi peng Zotung ram lei ah SAC ralkap hna cu July 24 in hmunhnih ah rallam sial in khuami 30 hrawng an tlaih hna, tiah theih a si.
SAC ralkap hna cu Zotung ram, Zungnat (ယုံနက်) khua in Tilaw (တီလော) khua lei ah rallam hmunkhat in an sial; cun Gangaw le Zotung ramri Zipia(ဇီးပြား), Antta(အန့်တာ) le Ramsi (ရမ်စီး) khua lei ah lut in Ramsi (ရမ်စီး) khuami 30 hrawng an tlaih hna, tiah Supreme Council CDF-Zotung in ṭuanvo ngeitu pakhat nih a chim.
Ṭuanvo ngeitu nih cun, “Hmunhnih in rallam a sialtu SAC ralkap hna cu minung thazaang 80 hrawng an si i, phu khat cu Ramsi (ရမ်စီး) khua pawnghrawng chekhlatnak le thianhhlimhnak an tuah dih hnu ah Ramsi (ရမ်စီး) khuami 30 an tlaih hna, a dang phu khat cu Tilaw (တီလော) lei ah an kal,” tiah a chim.
“SAC ralkap hna nih rallam an sialnak lampi Zipia (ဇီးပြား) le Antta (အန့်တာ) khua kar ah aho si theih lo miruak 2 hmuh a si i, SAC ralkap kut in nunnak liammi an si lai. “Rallam sialtu SAC ralkap phu khat cu Ramsi (ရမ်စီး) khua pawng ah cawlcanghnak an tuah i, a dang phu khat cu Tilaw(တီလော) in Rezua – Matupi lei hoih in an kal lai tiah zumh a si,” tiin Supreme Council CDF-Zotung in chimphuannak nawlngeitu nih cun a chim.
Tualchung mi hna cu SAC ralkap rallam sialnak hmunhma ah khualtlawng lo ding in le um kallo ding in Supreme Council CDF-Zotung nih ralrin peknak zong an thanh cang. SAC ralkap hna nih cun a luancia July 20 in Gangaw le Htilin peng phone line le internet line an thah caah tualchung thawngpang le thil sining fiang in theih khawh a si lo.
Bago Ramṭhen Paungdae Peng Kahdohnak Ah SAC Ralkap 4 An Thi: Bago ramṭhen, Paungdae(ပေါင်းတည်) peng Thitpoke(သစ်ပုတ်) khua kahdohnak ah SAC ralkap ralbawi pakhat telh in ralkap 4 an thi i, meithal 2 le kuan zeimawzat kan lak khawh, tiah Paungdae(ပေါင်းတည်) PDF in chimphuannak nawlngeitu nih a chim.
July 28, chunhnu suimilam 1:30 ahkhan Paungdae (ပေါင်းတည်) peng Thitpoke(သစ်ပုတ်) khua i tower hngaktu SAC ralkap hna cu Paungdae(ပေါင်းတည်) peng tualchung hriamtlai phu hna nih an kah hna. Cu kahdohnak ah cun ralbawi 1 le ralkap 3 hna cu an thi. Tualchung hriamtlai phu lei nih MA 3 pakhat, pistol 1, phone 4 le ID card pakhat an lak khawh, tiah theih a si.
Tuluk Thonginn Nawlngeitu Nih Myanmar Rammi Minung 90 Myanmar Ah An Kuat Hna!: Tuluk(China) ram thonginn hmun dang cio ah an hren mi Tuluk ram um Myanmar rammi minung 90 cu Tuluk cozah nih July 27 ahkhan Myanmar ram ah a kuat hna, tiah theih a si. Tuluk thonginn i an hren mi hna cu Kachin ramkulh Waingmaw(ဝိုင်းမော်) peng, Kaanpaihthi(ကန်ပိုက်တီး) khuapi ah a ummi,
Myanmar le China pehtlaihnak tunnel in an kuat hna, tiah theih a si. “Kaanpaihthi(ကန်ပိုက်တီး) ah ummi ramhnih pehtlaihnak tunnel in an kan kuat. Tuluk siizung ah ni 40 le thonginn ah 20 kan um. Thong chung ah a taang mi cheukhat an um rih, thla dih ahcun an thlah khawh men hna,” tiah thonginn in a chuakmi pakhat nih a chim.
Myanmar rammi minung 90 hna cu Myitgyina an phan cang. Quarantine in ni 5 chung an um hnu ah anmah le umnak khua cio ah an kir lai, tiah theih a si. Nu pawl cu Myitgyina siizung ah an um i, pa pawl cu pengkomh letecelhnak hall ah an chiah hna. Myanmar rammi hna cu- 2020 covid rai a chuah hnu ah rianṭuan awk a ngei ti loin, phaisa a ngeih ti lo caah Tuluk palek sin ah an i ap i, mah umnak cio ah kir ṭhan ding in timhtuahnak an rak ngei, tiah theih a si.
Tuluk ram ahhin Myanmar mi minung 5000 fai an um i rammi (Tuluk mi) sinak an ngeih le ngaih lo embassy le ṭuanvo ngeitu nih an chek hna hnu ah Myanmar mi hna cu Myanmar ram ah kuat ding in tawlrel an si lai, tiah Muse hrambunh mibawmchantu phu in chungtel pakhat nih May tha thawkka ahkhan a rak chim.
Leave a Reply