SAC Hriamngan Kuan Nih Hniarlawn Khua, Pu Thla Chum Inn A Khen Caah A Nupi Pi Chia Hnem A Nunnak A Liam!
================================================
Nihin August 10 zing sml 9:00 hrawng in Hakha Chin ramkulh, SAC kuttang Ministers umnak inn pawng hrawng le Hakha thar meithat zung pawng hrawng ah kahdohnak a chuak. Cu kahdohnak ah cun SAC ralkap nih hriamngan an kah caah Hniarlawn khuami Pu Thla Chum a inn ah hriamngan kuan a tla i, Pu Thla Chum nupi, Pi Chia Hnem, kum 56 hrawng cu a nunnak a liam.
Hniarlawn khuami pakhat nih, “Hriamngan kuan lung hnih a tla i, pakhat cu Pu Thla Chum inn cung ah a tla. A inn cu a rawk dih, a nupi cu tappi kam ah a ṭhut lio a si i, an inn cung ah hriamngan kuan a tlak caah a nunnak a liam,” tiah a chim.
Hriamngan kuan nih Hniarlawn khuami Pu Za Hnin fapa Obed, kum 14 zong a baan ah a hliamh, tiah theih a si. A luancia July 25 lio zong ah tualleng siangngakchia a zaam kho lomi va chanh ding ah a kalmi Hniarlawn khuami Salai Mang Lian Sang cu SAC ralkap nih an rak kah thah.
SAC Ralhrang Hriamnam Kahnak In Hniarlawn Khuami Pi Chia Hnem (60) A Nunnak A Liam, Nihin, August 10 zingka ah Halkha hmunkhuar ralhrang hriamngan kahmi nih, Hniarlawn khua Pi Chia Hnem te Inn an Coka a khen caah , ralhrang hriamnam in Pi Chia Hnem a nunnak a liam tiah theih si.Pi Chia Hnem hi kum 60 hrawng a si. Taantak mi chungkhar le khuami Bawipa nih inhnem ko hna sehlaw.
Apoi tuk hringhran e kan in siang lo tuk e. Zei ti awk atha lo mu vanram tu in kan don te law RIP.Maw ka pi khua ka tlun can ah chawnh biak tu an um ti lai lo e. Ka nu te Aw zei ton maw kan ton than ee. maw ka pi te mitha te kan celh hrim lo ee bochan mi ka pi aw. ka nu a poi tuk ee kan khuale kan um nak hi him nak a um hrim ti lo ee.Chungkhar dih lak P.T tu nih in hnem ko hna seh muuu. Kapi mitha ton than caan um ti lai lo mu. Cu ka thin cu.poi kho tuk aw. (Tantakmi chungkhar Kan i tuarpi ve tuk hna e, Pathian tu nih tuarin khawhnak pee hram ko hna seh.)
Mizoram Ah Myanmar Mi Pakhat Sin In Bing Ks. Sing 850 Leng Man An Tlaih!, India ram, Mizoram ramkulh, Aizawl khuapi ah Kalaymyo mi pakhat sin in nizan August 9 ah bing 63.46 gram a ritmi cu palik nih an tlaih, tiah theih a si. Kum 35 hrawng a simi Lalhruailiana cu inn a hlannak ah palik nih an luhhnawh i, checkhlatnak an tuah tik ah bing cu an hmuh i, an tlaih. Bing an tlaihmi cu Rupees sing 32 man a si i, Myanmar in kyats sing 890 leng man a si. Lalhruailiana cu rithaisii upadi le ramdang mi upadi(Foreigner Act) in taza an cuai, tiah theih a si.
Myanmar Ralzaam Hna Ca ah Dollar Sing Li Leng Man Sii-inn Thilri Cu Mizoram A Phan Cang! US ram in Mizoram um Myanmar ralzaam hna le BN Hospital Research Centre ca ah dollar sing 420,000 man sii-inn hman ding thilri cu, nizan August 9 ah Aizawl a phan cang, tiah theih a si .
Cu thilri hna cu US ram phan Myanmar mi hna nih, Project-Mizoram min in an pekmi a si i, Mizoram ramkulh Myanmar ralzaam zohkhenhtu phu nih, ṭuanvo laak in an phawtzamh lai. Nihin August 10 ah Aizawl khuapi ah, cu thilri cu pekchanhnak an tuah lai. Cun, a dang sii-inn hman ding thilri zong US ram in a phan chap ding a um rih, tiah theih a si.
Kalaymyo Tlanglawng Dinhnak Pawng Ah Nuva Hna Cycle Cu Hngalh Lomi Hriamtlai Nih An Chuhpiak Hna! Sagaing ramṭhen, Kalaymyo tlanglawng dinhnak pawng ah nizan August 9 zanlei sml 4:00 ah aho hngalh lomi hriamtlai phu nih, nuva nih an i citmi cycle cu an chuh hna. A nupi cu meithal in an hmuah chih i, a vapa cu pistol in voi li an cumh, tiah anmah he naihniam mi pakhat nih a chim.
Cycle chuh a tongmi nuva hna cu Myohla sang i an dum va thianh ding in an kal lio ah hriamtlai phu nih atu bantuk in cycle an chuh hna hi a si. Cycle cu an i kalpi i, nuva hna cu ke in an ṭin,” tiah nuva he naihniam mi pakhat nih cun a chim. Cycle chuh an ton lio ah a vapa nih kan laakpiak hlah u, tiah a nawl chih ko hna nain, hriamtlai pawl nih a nupi cu meithal in an hmuah i, a vapa zong pistol in voi li an cumh caah a lungmit, tiah a chim chap.
SAC nih nawlngeihnak laak hnu in Kalay peng cu firnak le sualnak a tam chinchin caah tualchung mi cu thinphang ngai in an um ko, tiah theih a si. Wetlet Peng Ah Rallam A Sialmi SAC Ralkap Bomb Puah Nakin Ralkap 25 An Thi: Sagaing ramṭhen, Wetlet peng Mindi khua lei ah rallam a sialtu SAC ralkap pawl cu, PDF nih bomb kan puahhnawh hna caah ralkap 25 nak tlawm lo an thi. Pyusawhti 3 zong a hmun ah an thi, tiah Nattaung Naga(နတ်တောင်နဂါး) PDF nih an langhter.
August 5 ah Shwebo peng in Wetlet peng Mindi khua ah SAC ralkap motor ngan 2, motor hmemi 1 le cycle 2 in rallam an sial. Bomb lung 18 in kan puahhnawh hna caah ralkap 25 an thi i, tam tuk hliamhma an pu, tiah Nattaung Naga PDF nih an chim. Cu bomb puahnak ah Pyusawhti hruaitu Kyaw Ngunt le a dang pahnih zong a hmun ah an thi colh. Pyusawhti pakhat hliamhma a pu. Cu kahdohnak ah cun Nattaung Naga PDF, Nattaung Naga Companny(2) Zarmani PDF le Mahuya Min Yaing(မဟူရာမြင်းရိုင်း) PDF i bawm in an kah hna, tiah theih a si.
Nihin August 10 Yee Oo Peng Kahdohnak Ah SAC Ralkap 30 Hrawng An Thi, Hriamnam Zun 25 An Chuh Hna, Sagaing ramṭhen, Yee Oo peng Kungthar le Yamaikthar(ကုန်းသာရွာနှင့် ရမိတ်သာ) khua kar kahdohnak ah SAC ralkap 30 hrawng an thi i, hriamnam zun 25 an hna, tiah theih a si. Nihin August 10 zing sml 7:00 in SAC ralkap pawl cu khuate thianh hlimhnak kan tuah an ti i, inn le lo an hrawh lio ah PDF nih an kah hna. SAC ralkap cu a tlawm bik 30 an thi i, hriamnam zun 25 an laak piak hna. Cucaah Monywa ummi Helicopter le Mi35 nih an rak kah hna pinah bawmtu ralkap zong an chap, tiah theih a si.
August 9 zanlei ah SAC ralkap pawl cu Yee Oo peng kungthar lei ah rallam an sial i, nihin zingka ah kahdohnak a chuak colh. Cu kahdohnak ah cun Yee Oo PDF le Depeyin PDF hna i bawm in an kah hna. “Nihin zingka ah kahdohnak a chuak. An Battalion ning ti awk in an thih caah Monywa Na Ma Khah in Helicopter le Mi35 in an kan kah i, hnu kan kir chung. Kanmah lei in ralkap 2 an nunnak a liam ve,” tiah PDF hruaitu pa nih a chim.
“Ralkap pawl cu zahan zan sml 10:00 hrawng ah hmun pakhat, Moesone(မူးဆုံ ) lei ah a chiah hna. Cuka in hriamngan tam ngai an kah. Zinglei ah Kungthar lei an kal i ralkap 30 hrawng an si lai, an dihlak in an thi dih,” tiah tualchung mi khat nih a chim.
Hproso Peng Kahdohnak Ah SAC Ralkap 11 An Thi: Karenni ramkulh, Hproso peng, Sulaku khua lei ah nizan August 9 ah rallam a sialmi SAC ralkap pawl cu Central Division Special Operations Group(CDSOG) le PDF ṭangrual phu hna nih an kah hna caah ralkap 10 nak tlawm lo an thi, tiah theih a si. Cu kahdohnak ah cun Central Division Special Operations Group nih sniper in SAC ralkap 11 kan thah hna, tiah CDSOG nih cathanh an chuah.
SAC Ralkap Le SNA Nih Hpakant Peng Seyin Khua An Khangh! Kachin ramkulh, Hpakant peng, Seyin khua inn 400 hrawng cu SAC le Shanni Nationalities Army(SNA) i bawm in an khangh, tiah khuami hna nih Media ah an chim. Nizaan August 9 zaan sml 11 hrawng in vanlei kahdohnak an tuah hnu ah mei in an khangh, tiah theih a si.
Seyin khua cu inn 400 hrawng umnak khua a si i, a khua ning ti awk in a ciam. SAC le SNA i bawm in an khangh mi a si. Vanlei kahdohnak an tuah pin ah SNA cu an ra i khua chung thilri; cycle le motor tibantuk pawl cu an khomh hna i hmunkhat ah an khangh dih hna, tiah khuami hna nih an chim chap. Seyin khua pawng i SAC le SNA sakhan cu KIA le PDF tangrual phu hna nih an lak hnu in kahdohnak faak ngai a chuak i, cu kahdohnak ah cun SAC le SNA lei in 15 hrawng an thi. Cu hnu ah Seyin khua an khangh hi a si, tiah khuami hna nih cun an chim chap.
Leave a Reply