Ngaihchiatnak Thawngpang Fonh
===============
Mandalay Ramṭhen, Sint Kaing LPDF Chungtel 4 Cu SAC Ralkap He An I Ton Caah 3 An Thah Hna!, Mandalay ramṭhen, Sint Kaing(စဉ့်ကိုင်) peng LPDF ralkap 4 cu rianherh ngei in khual an tlawnnak lam ah, SAC ralkap he an i ton caah ralkap 3 an thah hna, tiah LPDF (Sint Kaing) nih nihin August 16 ah cathanh an chuah. August 12 ah Sint Kaing in Yuangan(ရွာငံ) lei ah a kalmi SAC ralkap hna cu tualchung hriamtlai phu he hmai tonh in an i ton caah, tualchung ralkap 4 chung ah 3 cu an i tonnak hmun ah an kah thah hna, tiah an langhter.
Tualchung hriamtlai phu chungtel 4 hna cu SAC ralkap nih hmaitonh in an karceh hna i, a nungdam mi ralkap pakhat cu an tlaih, tiah theih a si. SAC ralkap kut in nunnak a liammi PDF chungtel 3 hna cu Sint Kaing LPDF ṭangrual phu Black Brothers PDF in an si i, pakhat cu Sint Kaing LPDF chungtel a si.
Yinmabin Peng Ah CDF Mindat Ralkap Pakhat A Nunnak A Liam! Yinmabin peng Yinpaungtaing khua ah SAC ralkap nih vanlei kahdohnak an tuah ruangah CDF Mindat in ralkap pakhat a nunnak a liam, tiah theih a si. A nunnak a liam mi Salai Thang Ṭan ruak cu nihin August 16 ah Mindat peng hmun pakhat ah an vui, tiah theih a si. Kahdohnak cu SAC ralkap sin ah a thli in thawngpetu an um ruangah a chuak i SAC nih vanlei kahdohnak an tuah caah August ni 14 kahdohnak zong ah CDF Mindat ralkap pakhat hliam a rak tuar, tiah theih a si.
Sagaing Ramṭhen, Khin-U Peng Ah Mino 7 Cu SAC Ralkap Nih An Thah Hna!, Sagaing ramṭhen, Khin-U peng, Winkyi(၀န်းကြီး) khuami mino 7 cu SAC ralkap nih an tlaih hna i, an thah hna hnu ah an ruak cu lamkam ah an hlonhtak hna, tiah Winkyi khuami nih media ah an chim.
SAC nih an thahmi hna Winkyi khuami mino 7 cu, Kyaw Thu Hein (ကျော်သူဟိန်း) kum 19, Ko Zaw Hein kum 15, Ko Min Ko kum 20, Ko Min Ngi(ကိုမင်းညီ) kum 14, Ko Phyo Ngwe Soe(ကိုဖြိုးငွေစိုး) kum 19, Ko Nyaing Nyaing kum 22 le Ko Thura Htun(ကိုသူရထွန်း) kum 21 hna an si.
Mino 7 cu August 14 zinglei ah Winkyi khua in Shwetwe (ရွှေတော) khua lei ah Shwebo motor in rianṭuan ding in an kal. An kal pah ah Shwebo-Kyaukmyaung lam number 2 sianginn hmai i check gate ah SAC ralkap nih an check hna i an tlaih hna hnu ah, mino 7 cu SAC ralkap training sianginn, number 8 ah an kalpi hna i, an tukvelh hna hna hnu ah an thah hna. Yahthar(ရသာ) khua nitlaklei Beauha(ဗျူဟာ) lam pawng ah an ruak cu an hlonh hna i, an ruak cu nizaan August 15 ah an hmuh hna i, an khua ah an kuat ṭhan hna, tiah khuami nih cun an chim.
Haimual Khua Ah Tlaih A Tongmi Unau Cu An Ruak In An Hmuh Hna! August 14, zaanlei suimilam 4:30 hrawng ah Tedim peng, Haimual khuathar cu SAC ralkap nih an rak khangh hnu ah unau pahnih mino tete cu SAC ralkap nih an rak tlaih hna. “Tlaih a tongmi hna hi unau an si. A u (kum-18) hi CDF chungtel a si i, SAC ralkap nih an tlaih lio ah CDF uniform he an rak tlaih, a naupa hi kum 15 hrawng a si. An unau ruak cu Haimual sianginn lam ah August 16 ah hmuh an si,” tiah tualchung mi pakhat nih The Chin Post ah a chim.
Pale, Yesagyo Le Myaing Kahdohnak Ah SAC Ralkap 33 Hrawng An Thi, PDF Ralkap 5 An Nunnak A Liam, Sagaing ramṭhen, Pale peng khuate cheu khat a khaangtu SAC ralkap le PDF cu August 13 le 14 ah an i kap i, SAC ralkap 22 hrawng an thi, tiah M.R.D.A. phu sinin theih a si. August 13 zanlei sml 2:12 hrawng ah Wyathit khua tlaklei ah rallam a sialmi SAC ralkap cu M.R.D.A. phu nih lamhruang in an bawh hna i, an kah hna caah SAC ralkap 3 an thi, tiah theih a si.
August 14 zanlei sml 1:20 hrawng ah Pahtuthar(ပုထိုးသာ) khuathar inn khaangtu SAC ralkap pawl cu Kabaryet khua pawng ah M.R.D.A phu nih an kah ṭhan hna caah SAC ralkap 5 hrawng an thi, tiah theih a si. Cu ni zanlei sml 6:00 hrawng in kahdohnak a chuak ṭhan i, SAC ralkap 14 hrawng an thi. M.R.D.A lei in ralkap 5 an nunnak a liam ve. Cu kahdohnak ah M.R.D.A, Yinmarbin pengkomh Battalion 1, Royal Eagle, Pale Joker phu le ṭangrual PDF hna i bawm in an kah hna, tiah theih a si.
Rallam a sialmi SAC ralkap nih Pale peng khuate hna cu an khangh pinah August 13 le 14 kahdohnak i a thimi ralkap hna ruak cu, inn ah an pon hna i mei in an khangh hna, tiah theih a si. Yesagyo peng khuate a khaangtu SAC ralkap pawl cu August 13 le 14 zanlei sml 3:00 hrawng ah PDF nih kan kah hna i, ralkap 8 nak tlawm lo an thi, tiah PDF sinin theih a si. Magway ramṭhen, Myaing peng Teykyi le Neytat khua karah riahcaw chantu SAC ralkap motor 2 cu, nizan August 15 zanlei sml 1:17 ah Myaing peng PDF nih voihnih bomb kan puahhnawh hna caah ralkap 3 an thi, tiah Myaing PDF nih an langhter.
Relchap, Vanruah Bang in Kuan le Bomb thlah hnawh a herh lo. Ka ti ning tein Raldoh khawh ahcun Zarh 2-thla khat ah kan tei hna lai.
MAH Te Ralhrang thluk awk ah a thi khar kan pemh rih rua lo. Saram paoh hi meithal in kan kah paoh ah le kan hliam khawh poah ah an thih ve lo. Saphu cu a Thalhma na hngalh lo ahcun thah khawh asi lo. Meithal in na kah zong ah a thi khawh lai lo. A Thalhma na hngalh ah cun Lungtum le thingtan in thah khawh mi Saphu asi.
MAH te ralhrang Rallokap hi a Thalhma hngalh usih law, kan khenh khawh ve ahcun zarhnih (or) thla hnih ah thluk khawh an si. Tehte: American nih Iraq Saddam Hussein Cozah kha zarh hnih bak ah an thluk khawh. American nih Rili cung ah aadin mi, Raltuknak Tilawng nganpi cung in, lam hlat piin, Iraq nih hriamnam an chiahnak vialte cu Dungci in man cikcek in an kah dih hna. Meithal le kuan chiahnak vialte cu Dungci in an kah caah mei ah an ciam dih. American ke ralkap an lut tikah, Iraq rampi cu zarhnih bak ah an lak dih ko.
Jet fighters, Helicopters chiahnak le an rawn ding diesel le datsi chiahnak hi hrawk khawh I zuam ding asi. Hriamngan, RPG, Launcher, 60 MM, 70 MM, 120 MM, an chiahnak vialte hrawk dih awk asi. Rallokap nih raldohnak ah an hmang bik mi hriamnam cu cunglei langhter mi hna hi an si. Drone in bomb thlak kan thiam cang caah hrawk an fawi ko lai tiah ka zumh.
Launchers le RPG, Dungci, 60 MM, 120MM, tbk hna I cawk ve in kah ding asi ko. Kan hrawk khawh tuk lai, Nain Kawl Khualipi hna le Hriamnam le Vanlawng chiahnak hmun ah aum mi PDFs hna nih, CHINLAND, Kachin, Karen, Karenni, Sakai le Makui tbk in ral an doh ve cang a herh ve lai. MAH te ralhrang cu Sipuazi phih ding, Hriamnam zuar lo ding tiah UN, USA, EU, UK, Australia, Japan tbk le Vawleipi nih an kan zuam pi ko nain, Russia le Tuluk ruang ah kan hlawhtlin ti lo.
Singapore, Japan, Australia, EU ram hna telin Vawleipi minthang, hriamnam Co. Ltd 116 nih MAH cu hriamnam an zalh piak hna. Anmah tein an cawk khawh lo mi hriamnam zong tampi in an cawk piak hna. NUG nih aa zuam set len ve ko nain, Sipuazi Phihkarhnak le Hriamnam zuar lo awk ti lei ahcun an ti khawh bak ve ti lo. Can tawite ah, a rauh hlan ah MAH thluk duh ahcun Hriamnam stored room vialte hrawk awk ah hriamnam I zalh hram thawk cang usih, Ahmun um mi PDFs Raldoh ve cang hna seh, Cuti hrawk khawh ding in Tindan pek ve usih.
Paucan Dohthlennak hruaitu kip nih kum 5-7 ah MAH kan thluk lai ti cio asi. Rallokap Weapons’ Stored room kan hrawk khawh ahcun kum 2-3 a rauh lailo. A thla lawng in kan rau lai. Hriamnam chiah nak le Diesel chiahnak kan hrawk khawh lo ahcun, fawi tein kan thluk khawh hna lailo.
Rallokap hi anmah le duhning in Raldoh mi an si lo. Nawlpek tu an um. Command le order pektu hi phun (2) an um. To buin le Raldoh buin Nawl pektu an um. To buin Nawl pektu cu HQ (နမခ) asi. Amah ai ah order pek ding in (ဒကစ) Dakasahmuh a um. Monywa (နမခ) zung tangah Kalay Dakasahmuh aum. Namakha tang ah Ṭatma pakhat (33), Dakasa tang ah Biuha (3) le Ṭatzing 10 an um. Rallokap 1000 thih nakin 2-3 thih le thah hnu lawng ah an kut tang Rallokap cu surrender a tuah ding an si.
Rallokap hi Namakha ah hriamnam le Helicopters, Jet Fighters tbk hi an chiah deuh hna. CHINRAM, Sakai, Makui ah raldohnak TEI cikcek kan duh ahcun: Monwya Namakha kha Launchers, RPG, 60MM in cikcek in den a herh lai. Cuhnu ah Dakasa umnak Kalay kha I den ṭhan seh, Kalay kan tei in, Hakha le Matupi Biuha kha den a herh. Cutin kan tuah khawh ahcun Tatzing hi cu an mipi sin ah an I fonh cang men lai ka ti. An I fonh duh lo ahcun; a lak an fawi tuk cang lai.
Rangoon le Nipidaw kan lak ahcun adih tiah NUG nih an tuak mi hi a palh deuh ko rua. Kawlram ah Tatma 10 aum caah Namakha bantuk 10 aum ti nak asi. Taisit zung an um nak vialte lak dih lo ahcun Nipidaw le Rangoon lak men ah ral a dih lo. PDF Monwya le PDF Sakai nih Namakha le Dakasa hi ṭuanvo lak hna seh, a dang zong nih mah he aa peh tlaih mi Namakha, Dakasa, Biuha le Tatzing kha ṭuanvo lak cio a herh.
Nipidaw, Chinland, Karen, Karenni, Kachin, Sakai le Makui lawng kan lak ah Ralhrang kan thluk khawh ri hna lai lo. Ralhrang Rallokap nih hriamnam an chiah nak (Weapons Stored Room) hi hmun 25 aum. Hi hmun 25 hi kan hrawk khawh ahcun, doh an herh tilo. MAH te an tla bak ko. Kawlram Chaklei caah hmangrua hriamnam cu Mandalay deuh ah an chiah hna. Cucaah Mandalay, Monywa PDF, LDF, UG nih biatak tein Raldoh ve cang hna seh, Hriamnam an chiah nak vialte hrawk I timh seh, Mandalay in Monwya an kuat, Cuhnu ah Tatzing ah an kuat hna.
ပပန၊ ပခန ၊ (စနခ 747) tbk zung ah an chiah hna. Hriamnam an chiahnak Tatzing min zoh tikah, a lai Nambar 4 an um dih. 141, 242, 343, 444, 545, 646, 747 tbk hi hriamnam chiahnak Tatzing an si. Hriamnam an chiahnak, Jet Fighters / Tanks / Helicopters, Diesel, Datsi, an chiahnak vialte hrawk awk ah thlakhat ah kan I limh men lai ka ti. Cu ti kan hrawk khawh ahcun Tatzing le Biuha lei kha cu mipi sin ah an ra tengteng. Crd-Zingtincuai Cinzah
Leave a Reply