Falam-Hakha Kar SAC Le Chin Ralkap Hna kahdohnak Ah CDF-Matupi Ralkap Pakhat A Nunnak Liam!
=================================
Chin ramkulh, Falam peng Ramthlo le Dokṭhek Kar SAC Ralkap le Chin Ralkap kar kahdohnak ah CDF-Matupi Ralkap in Salai A Lawng, kum 21 a nunnak a liam, tiah thawng kan theih. Nihin Kahdohnak ah SAC Ralkap lei in a thimi an tam nain fiang tein theih khawh a si rih lo. Chin Ralkap nih SAC Ralkap hriamnam cheukhat zong an laak khawh, tiah theih a si.
Nihin Kahdohnak ah Falam SAC Camp nih Lamhlat kahnak hriamngan in an rak bawmh hna, tiah Tualchung mi hna nih an chim. Falam- Hakha Kar SAC ralkap le Chin ralkap hna kahdohnak ah Chin ralkap lei in CNA, CNDF, CDF-Hakha, Thantlang, Matupi hna i bawm in SAC Ralkap an doh hna.
June 27 in Falam khua in Hakha lei ah SAC Ralkap pawl an rak rat hnu in, SAC ralkap hna nih Ṭaal khua inn 29 le Tlangzar khua inn 6 an khangh cang.
David San; A Lai ah a dir mi khi mei mah ka si. Ahmsa bik ah kei mah Ralhmai pakhat ah bomb kaa pah sual caah Mizo ah i thlop dingin ka kal i ni 4 a rauh hnu ah siizung ah ka phan. Sizung a caan hman tein ka phank khawh caah ka dam than. A sinain ka kee khat lei cu ka sung. Cun Thla 3 hrawng a rauh hnu ah ka upa ralhmai ah bomb aa lamh sual caah Mizoram an kal pi colh lamsur a that lo caah lampi ah a nunnak aliam.
Zetin a si zongah na rian na tuanvo na na lim cang, R.I.P ka u. Ukpatnak sang bik kan peek. Cun tuni ah keh lei ka u nih bomb kaa lamh sual lio ah na thazaang der hlah seh nangmah caah kan mah nih kan i doh piak lai tiah a ka ti. Dohthlennak a dih tikah kan zaa piin teinak puanzar kan thlai te lai a ka ti. A sinain a tu kahdohnak ah a nunnak a liam cang tiah thaawng ka theih. Ka bia chim ding a tangti lo kum hngakchia tein nan nunnak nan peek.Ukpatnak sang bik kan peek hna ee.”tiah a u le pa 2 ukpat peknak ah David San nih a facebook cahmai ah a langhter. An nih pathum hi aa daw taktak mi hoikom an si tiah theih a si. Unau bantuk in a um ti mi le a kal timi dohthlennak a tuah timi an si tiah theih a si. A tu ah aa kom tuk mi hoikom minung pa 3 cu an i then ruang mang cang, Pakhat lawng a tang cang e. Zeitluk in dah a tuar lai, ruah ah hin lungfah celh a si lo e.
Mizoram, Lunglei pengkomh ah a um mi Thaizawl Refugee Camp ah ralzaam dirhmun in a um mi Salai Ram Joe (Cu) cu tuni July ni 11 ah ramlaak ah rua a hau cuamah lio ah Thaizawl khuami dum ngeitu pakhat nih lungin a cheh i “ka dum chungah rua hau hlah” tiah a dum chungah hau lo dingin a chimh tiah theih a si.
Mah pa nih cun ” Ka theih lo ruangah ka hau mi a si.” tiah ngaihthiam a hau than tiah theih a si. Cu hnu ah inn ah a tin i, inn atin hnu ah dum ngeitu pa nih cun camp a umnak tiang a val kal hnawh i a kut ah namte in a tuk tiah theih a si i a kutdanwg zungli cu a tuk i a tu ah sizung ah an kal pi tiah theih a si. A tu hi Lunglei Civil sizung ah an thlop cuahmah lio a si tiah theiha si. Namte sawh a tongmi pa cu Matupi pengkulh, Thaai khuate in a ra mi a si tiah theih a si.
Facebook Ah Live Thlah In PDF A Hrocertu Pa Le A Nupi Thah An Tong!N: ihin July 11 suimilam 12:00 hrawng ah Kalaymyo, Pinlung Lanmadaw(ပင်လုံလမ်းမတော်) kam, YaNanthTit(ရနံ့သစ်) lakphakti dawr ah a ṭhumi nupa hna cu hriamtlai phu pakhat nih an kah hna caah an thi, tiah Kalaymyo ummi pakhat nih Delta News Agency ah a chim. Thah a tongmi pa Sein Lin nih cun facebook ah live thlah in PDF a rak hrocer tawn hna, tiah tualchung mi nih an chim.
Tualchung mi pakhat nih cun, “Rawl kan ei lio ah meithal kah thawng voi 6 hrawng kan theih i, leng ah chuak in kan va zoh tikah YaNanthTit(ရနံ့သစ်) lakphakti dawr ah nupa pahnih cu meithal kah nak in an nunnak a rak liam,” tiah a chim.
Thah a tongmi Sein Lin nih cun SAC ralkap nih nawlngeihnak an laak hnu February, 2021 khan SAC ralkap uk duhlonak langhter in lamzawhtu hna thawng cu SAC ralkap sin ah a thanh tawn hna caah Kalaymyo, AungMinGalar sang in ṭhawl a rak tong bal, tiah Kalaymyo khuachung ummi pakhat nih a chim.
Tu zanlei tiang ah thah a tongmi nupa hna cu zei hriamtlai phu kut in thah an ton ti theih a si rih lo. Nupa hna thah an ton hnu caan rau lo te ah SAC ralkap hna cu an phan i, an ruak cu an kalpi hna. Chekhlatnak an tuah nain tlaihkhih a tongmi cu an um lo, tiah theih a si.
Mandalay Ah Nu Pakhat Thah A Tong I, A Phaisa Kyats Sing Thongli Hrawng Firpiak A Si! Mandalay, ChainMyaTarsi(ချမ်းမြသာစည်) peng Manaw Hari(မနော်ဟရီ) 110/50 lam ah a ummi nu pakhat cu nihin July 11, chunhnu ahkhan a umnak inn ah misual nih luhhnawh in a phaisa sing thongli hrawng an chuhpiak lengah amah zong an thah beh, tiah palik he naihniam in um mi nih an chim.
“Thah a tongmi nu cu Palik nih a ruak zohfelnak an ngeih lio a si, an laakpiak mi phaisa hi kyats sing thongli hrawng a si,” tiah palik he naihniam in ummi pakhat nih cun a chim. Hi nu a thattu kong ah SAC Palik le tualchung PDF nih thawngthanhnak a tuah mi a um rih lo.
SAC Ralkap Nih An Tlaihmi Nu Pakhat Cu Palik Pakhat Nih A Zaam Pi, Mandalay ramțhen, Myiktrila pengkomh, MaHliang peng palik sakhan ah PDF hna cu phaisa na bawmh hna tiin an tlaih i puhmah 50 in sual an phawt i thong an thlak mi nu pakhat cu palik sakhan um palik pakhat nih nizaan July 10 ah a zaampi tiah theih a si. Thong tlami nu cu chikhat leng a chuah kar te ah palik pakhat nih a zaampi i a tu tiang a tlaih țhan kho rih lo tiah khuami hna sin in theih a si.
Nizaan July 10, Hakha-Falam karlak Ramthlo khua kahdohnak ah SAC ralhrang minung pali an thi i, miphun ralkap CNA, CDF le CNDF lei in a nunnak a liammi an um lo, tiah thawng kan theih. Ramthlo phak hlan Tlangzar khua pawng kahdohnak ah belte ah CNA ralkap pahnih an i hliam.
Mandalay khuapi ah Ramkkhel a hmuh caah a thatnak khawh chungin khua khan piuaktu le tuanvo a laa tu sihni pawl cu SAC ralhrang nih tlaih ding in an kawl hna i cheukhat cu an tlaih hna. June thawkin tuni tiang ah minung 20 deng an tlaih cang tiah theih a si. July ni 9 zongah Tun lay upadi zungin zung an thut lio ah Ko Htun Htun Zaw MA Aye Mya Suuh hna cu an tlaih hna. Khuaikaa ah an kal pi hna i khuaika dah an khumh hna ti zongin theih a si lo tiin Mandalay sihni pakhat nih a chim.
A luan cia mi July ni 2 zongah Taza Hluttaw sihni U Aung Min Htu le Daw Than Than Lwin hna cu SAC ralhrang nih an inn cia ah luhhnawh in an tlaih hna tiah theih a si. MAndalay ah SAC ralhrang nih ramlkhel cawl canghnak ah tuanvo latu sihni pawl cu tlaih dingin an hmuihtinh mi an si ii an tlaih mi hna zong zeiruangahdah an tlaih hna timi zong theih a si lo bantuk in khuaikaa hmunah dah tlaih an si lo tiin sihni sinin kan theih tiah The Irrawaddy-Burmese Editor nih a tial.
A tu lio ah SAC ralhrang nih ramkhel leiin a thawtkhawh chungin khuakhang piak tu sihni minung 17 an tlaih cang hna ii tambik cu thongdan kum 10 le thih hlanlo thongdan peek khawh nak pohma-50(ည) in a hmuh an peek hna tiah theih a si.
Sri Lanka President Cu A Inn In Mipi Nih An Dawi Hnu Ah A Rian A Dinhtak! Sri Lanka President Cu A Inn In Mipi Nih An Dawi Hnu Ah A Rian A Dinhtak!: Rampi chawlehthalnak lei ah buainak a tong cuahmah mi Sri Lanka President cu nizan zarhte ni ahkhan Sri Lanka mipi nih an umnak inn ah luhhnawh in an dawi caah a zaam i, president inn a chuahtak suimilam tlawmpal ah President rian in aa phuahnak kong media ah a thanh.
Mibu thong tampi hna nih cun Sri Lanka khualipi Colombo ah president umnak inn cu chuahhnawh in, cozah lutlaitu president cu ramchung chawlehthalnak(economy) sunghzawtlaknak kong i mawhphortu ah an puh i, duhlonak langhter in a inn ah an luhhnawh. Mibupi nih president inn kulhnak hna cu an baoh i, tiliaunak(swiming pool) le innkhan kip i, an luh lio hna cu media ah hmuh ding in cheukhat nih live an thlah i, president inn cu an sawksam.
Mipi nih president inn a luhhnawh lio ahhin tilei ralkap navy hna nih president cu an hruai i, Sri Lanka thlanglei tipi ah an zaampi. Hi an zaampinak hmun hin an rian a dinhtak kong President Rajapaksa nih cun a thanh. Buainak a chuah lio ah hin buainak a linhsat tuk caah President chuahpi ding in amah vengtu ralkap hna nih mibupi ṭhawlnak ah meithal zong an puah. Colombo khuapi buainak ruangah siizung a phan mi zeimawzat an um nain nunnak a liam mi an um theih a si rih lo.
Sri Lanka hi ramchung chawlehthalnak a ṭumchuk tuk caah tukum hramthok khan buainak tampi an rak tong i, cozah lutlai zeimawzat hna zong nih an rian an rak dinhtak. Ramchung ah eidin tirawl a har i, oil man a fah tuk tikah mipi nih celh ti loin President cu buainak vialte mawhphortu ah puh in an luhhnawh nak hi a si.
Myanmar Ram Pumpi In July 10 2022 (Nikhat Chung) Kahdohnak Ah SAC Ralkap 46 An Thi! + Monywa Ah Pyosawtee 6 Fimtawl An Si, Kyonhpinkok Le Pyoiboi Khuabawi Thah An Tong! Monywa Ah Pyosawtee 6 Fimtawl An Si, Kyonhpinkok Le Pyoiboi Khuabawi Thah An Tong!: Sagaing ramṭhen Monywa ah SAC ralkap nupi pakhat tel in pyosawtee training a dih mi minung 6 cu UG (Mongywa) nih July thla thok ah khan an tlaih hna i, an fimtawl hna tiah Mongywa pengkomh UG hruaitu Bo Taihka(ဗိုလ်တိုက်ဂါး) nih Yangon Khit Thit media ah a chim.
Thah a tong mi hna hi Mongywa pengkomh PDF hmanthlak pawl SAC ralkap sin ah a hmuhsak i thawng a petu an si caah fimtawl an sinak a si, tiah theih a si. Thawngpetu hna cu YGA PDF, FFA PDF i bawm in an fimtawl hna i, minung 3 an tlaih mi hna zong zohfelnak an tuah dih hnu in an thlah ṭhan hna, tiah theih a si.
Atu zong Mongya pengkomh PDF le SAC ralkap kar kahdohnak a chuah caah meithal kuan cawk a hau. Khuanfang pakhat ah 8000 kyats a si caah hrimthil zalhnak ah phaisa a herh i Monywa Generation Tigers phu sin ah bawmhnak pek khawh a si, tiah Monywa Generation Tigers nih an thanh.
Cun, Pago ramṭhen, Kyonhpinkok(ကြို့ပင်ကောက်) peng Waikye(ဝိုင်းကျေး) khuakomh Kyinetaw(ကိုင်းတော) khua ah inn 100 uktu khuabawi Tin Maung Lwin(တင်မောင်လွင်) le a nupi cu khuami hna serhsat phun in an um ruangah le PDF thawngpang an hlat i SAC ralkap sin ah thawng an pek hna ruangah July 9 zaan Sml 7:30 ahkhan Thayawadi(သာယာဝတီ) pengkomh PDF batallion 3801 tat-khuai(တပ်ခွဲ) 1 nih an thah hna, tiah PDF theih a si. Mandalay ramṭhen Pyoiboi(ပျော်ဘွယ်) peng Shwe Pyi Yan Aung(ရွှေပြည်ရန်အောင်) sang ah a um i SAC ralkap thawngpetu Win Kyaing(ဝင်းကြိုင်) i a nupi Yin Yin Aye(ယာဥ်ယာဥ်အေး) zong nizaan (July 9) zaan Sml 7 ah a inn ah an kahthah tiah theih a si.
Myanmar Ram Pumpi In July 10 2022 (Nikhat Chung) Kahdohnak Ah SAC Ralkap 46 An Thi!: Myanmar ram pumpi in dohthlennak tuah hnu July 10, 2022 nikhat chung kahdohnak ah SAC ralkap 46 an thi, tiah Yangon Khit Thit nih a thanh. Cazin ning ah SAC ralkap a thi mi hi Sagaing ramṭhen Mawlait(မော်လိုက်) ah 4, Kanhbalu(ကန့်ဘလူ) ah 6, Inndaw(အင်တော်) peng Meza(မဲဇာ) palek sakhan ah 35, Kachin ramkulh Moe Kaung(မိုးကောင်း) ah 1, an dihlak 46 an si i Meza sakhan kahdohnak ah PDF 1 a nunnak liam.
Leave a Reply