Uico ralkap hna thaizing kan ralkap hna an hmunhma an luh tikah i kahnak um hraw loin kan miphun ralkap nih hrial ko hna sehlaw ka va duh dah. Victoria camp zong nunnak liam hraw lo tein kan ralkap nih hrial chung ko hna sehlaw ti hi tulio ka thlacam a si. I kap taktak ahcun uico ralhrang lei tampi an thi ko lai nain kanmah kan thisa unau tampi nunnak a liam ve lai.
Kan tahnak mitthli kan hnawt cawk lai maw? Kan miphun lungfahnak le ngaihchiatnak kan tuar kho te hnga maw? Hriamnam lei kan i ready hlan atu lio kan dirhmun in ral nganpi tuk kan i awt ahcun kan i tinhmi ‘ralkap cozah thlak’ or ‘Chinram in uico ralkap vialte thawl dih in mah tein i uk’ timi a si kho rih lai lo. Kan hriamnam pei ai thlau tuk rih cu. A theipar a chuak rih lo dingmi ral tuknak ah ka hawile le ka unau tampi nunnak a liam ding khi ka siang bak lo.
Victoria camp an lak zong ah CNF tinhmi an lak kho lai lo, kan nunnak le kan miphun dawtnak lungthin an lak khawh lo a biapi. Camp cu zakhat hmanh kan ser than te ko lai. Camp Victoria zamtak chung khi Chinram zam tak a si hrimhrim lo mu. Zeizong vialte a tlinter khotu kan Pathian tu nih kan ralkap hruaitu hna lungthin ah riantuan sehlaw kan miphun caah a tha bikmi biachahnak tuahter hram ko hna seh.
Kanmah le siaherhnak cu kan langhter cio ko lai nain hruaitu hna nan biachahnak tanpi ding cu kan dihlak kan rian a si ko. Nan kah hna zong ah siseh, nan hrial hna zong ah zakhat ah zakhat kan in tanpi ko hna mu. —Ka miphun ka dawt i ka siaherh tuk ve caah i sum kho loin ka vun tialmi a si. Keimah pumpak caah thahnemnak pakhat te tal hmanh a um lo ding le tampi nih nan ka huat ding, nan ka doh lai ding zong ka hngalh cia ko mu.
Kawl Ralhrang nih Tlangcung ah mah um tein a um ko mi hriamtlai kan cihmih an kan duhnak a sau tuk cang. 1940 lio ah ralhrang bawi pakhat nih a chim tiah an rak ti. 1949 in khan KNU hriamtlai cu a kah lengmang i a tu tiang a kah peng. A ruang cu KNU an ci kan hmih lai tiah an i ruah tiah Tlangcung hriamtlai nih an chim. A sinain, a tu chun, a tu ni zan tiang ah an ci an hmit kho hna lo. KNU cu an tlu lo.
2009 in Kokang army (miphun) a phomh than hna i caan saupi tiang a phomh hna. Nain, Kokang an ci hmit kho hlei hna lo. Kokang army an pur lo. 2011 ah khan Kachin (KIA) a thuat than hoi. A tu ni tiang ah an tei lo. An ci an hmit kho hna lo. Ara lai mi caan zong ah an tei naisai hna lai lo.2015 in ai thok than hoi i, Arakhan a tuk than. An ril lo.
A tu ni tiang an doh peng rih. 2021 in Chin mi a hun kan kah ve cang hi teh. A kan tei lai lo. Miphun ramkhel zumhnak thinlung cu hriam le nam in tei khawh phun a si lo caah a si.Kan hriamtlai nih ral an doh lai, mipi nih a nung Kan Pathian Sinah Thla Kan Cam Hna lai. U Htet Ni biabang in kan dihlak thla kan cam hna lai. Kawl ralhrang nih cun Tlangcung hriamtlai pohpoh phur dih le dai viar in tuah a ka timhnak caan a sau tuk cang.
Mah lawng si loin miphun hrimhrim in kan cihmih an kan duh. Kan miphun cihmih ding cu hofa hmanh nih kan duh cio lo caah kan ti khawh tawk cio in kan cawlcang hna lai. Ral a dohmi nih ral an thah lai, thla a cammi nih thla kan cam lai i Pathian nih teinak a kan pek hrimhrim lai ti hi zumhnak ngei cio hna usih law thazaang thar he hmai nawr cio hna usih.
KNU an tlu lo. KIA an pur lo. Kokang An ril lo. Chin mi akaam lomi miphun an kan tei lai lo. Kan sung lai lo. By; Salai Sang Bawi PREVIOUS Good News: Kawl Ralkap Paraltha Minthang Laksawng Tiang A Hmutu CDM A Tuah Cang
Leave a Reply