Vawleicung laksawng sungbik Nobel Peace Prize a hmutu hna lakah ngakchia cem a si mi Pakistan nungak Malala Yousafzai nih Afghanistan ah thil si ning cu ka lung a tha lo ngai, Afghan ngakchia nu hna dirhmun cu lung rethei ngai a si, vawleicung ram hruaitu hna nih rianrang in hmalak dingin a nawl.
Yousafzai nih Afghan mi hna himnak caah US president Joe Biden nih tuan ding tampi a ngei, a herhmi cu raltha tein tuan dingin le Afghanistan mipi hna nih bawmhnak le thazaang pek an herh tiah BBC newsnight ah a chim.
Kum 23 lawng a si rih mi Yousafzai hi nu hna cacawnnak thanchonak caah tan an laknak a duh lo mi Pakistani Taliban hna nih 2012 ah khan a lu ah an kah.
Amah hi kum 11 a si in Pakistan i Taliban hna uknak tangah nun a har ning cu BBC caah min thup in blog pakhat ah a rak tial tawn mi a si. A lu ah an kah hnuah England ah caan saupi zohkhenh a si i, Oxford University in Philosophy, Politics le Economics in degree a la mi a si.
‘Afghanistan thil a cang lio mi ruangah ka lung a rawk ngai.A hleikhun in ka nu hawi hna ka zaangfah tuk hna. Afghanistan ah Nu covo he pehtlaihin cawlcanghnak a ngei lio mi hna he kan inm chawn kho. Anmah zong an lungrethei ngai. Zeitindah kan um lai ti an theihthiam ve hlei lo’ tiah a chim.
Yousafzai nih Pakistan prime minister Imran Khan cu Afghan ralzaam hna cohlan ding le, ralzaam ngakchia hna cu ca an cawn khawhnak ding le an himnak ruah piak dingin a nawlnak cu NDTV nih a chim.
The Chin Post
Leave a Reply