December 25 cu Jesuh chuah Ni a si, kan ti ruangah a si lo. Vawlei mi vialte tlanhtu pa, Jesuh a rak chuak, timi hngalh camcinnak puai tuah Ni tu a si deuh! Ziah, December 25 theng ahcun?? tiah mi cheu nih an ti. January 20 zongah tuah u sihlaw, ziah cu Ni theng ahcun? Cu Ni cu cu pei si cu, khi pei si cu, timi chim awk cu a um peng thiam ko lai.
Rome miphun nih Calendar ah Ni le thla min hna cu an pathian le khuazing min phunphun cherhchan in min an pek hna. Cucaah zei Ni le zei caan poh ah Christmas cu tuah si sehlaw, soiseltu caah biataw a pit hlei lai lo. Lai miphun nih ca kan rak thiam hlan, Japan ralpi hlan chuakmi tleicia ka pi cu a birthday kan rak tuah piak.
Ahohmanh nih ka pi chuah Ni taktak cu hngalh a si lo nain ka pi cu kan mithmuh le kuttongh khawh awk in kan sin ah a um taktakmi a si caah zeima caan le Ni pakhat khat ahcun a rak chuak hrimhrim tiah kan zumh bak. Ka pale unau vialte hringtu a si caah ka pi cu a rak chuak hrimhrim mi a si; a chuah Ni taktak tu kan hngal kho lo.
Cucaah ka pi Birthday cu tar hna nih a nuam an ti bik caan, khuasik tuk lo, khua linh tuk lo lio caan, September 10 ah kan rak tuah piak. Midang chuah Ni tuah he aa dannak cu, a chuah ni puai kan tuah ah a kum zat chim awk kan hngal bal lo! Christmas cu Vawlei ah mi khamhtu, Pathian fapa ngeihchun JESUH timi pa cu a rak chuak taktak,
A rak nung taktak i mi vialte caah a Nunnak a rak pek taktak timi hngalh camcinnak le sunghlawihnak puai a si. Christmas a rak tuah hmaisa tu hna nih an tuah Ni hi anmah lio caan le boruak zulh in aa tlaak bik lio caan a rak si ve ko lai cuh! Sunglawi tein hmang hna u sih.
Luklak lo te ah, hlennak khawr chungah lut sual hlah. Christmas tuah cu a herh hme maw? timi biahalnak na ton sual ahcun, “JESUH vawlei ah a rak chuak taktak timi zumh hi tah a herh ve maw?” tiah va hal chin hna. Kan thangthatmi cu a Ni a si lo, kan biakmi zong a Thla a si lo; van in vawlei ah a hung lutmi pa sunparnak kan pek tu a si! Hrambik Lian
Omicron zawtnak nih Europe le vawleicung hmundang a cul thluahmah lio caah vawleicung ngandamnak zohkhenhtu phu World Health Organisation(WHO) nih cun a ra lai mi chrismas le kumthar ah timhtuahnak an rak ngeih cang mi vialte cu thulh rih ding in nawlnak a tuah. “Tonpumhnak thulh hi nunnak liam nakin a tha deuh, Hrambik Lian
Timhtuahnak kan rak ngeih cang mi hna cu thial, silole thulh rih a hau ko,” tiah biakhiahnak harsa ngai an tuah kong WHO in tuanvongeitu Dr Tedros Adhanom Ghebreresus nih a chim. Omicron virus aa chawnh tam bik ram cu US an si lio i, covid zawtnak thar an hmuhmi lak ah 73% cu Omicron variant a si, minung pakhat nih a thihpi cang.
WHO tuanvongeitu nih cun delta variant nakin chawnh a fawi deuh leng ah raikhamsii aa chun cang mi le covid zawtnak in a dam cang mi hna zong nih fawi tein an i chawnh khawh, tiah a chim. Omicron hi a karh tuk cang caah ram zeimawzat nih cun an ram innka an khar thluahmah cang,
France le Germany zong nih an ram luh le chuah an siang ti lo. Netherlands zong nih chrismas le kumthar caah zulhphung a ser i, kumvui January thla tiang mizapi tlawnlennak le chawhlehnak hmun hna a khaar. India zong ah omicron zawtnak ngei 200 leng an kai cang,
Nain India Health Minister nih cun zawtnak a chuah hmasa le hmanung tan ah khan India nih an tuar tuk cang caah i timhtuahning an thiam deuh cang kong a chim. Delta variant a rak chuah lio ah khan Delhi khuapi ah a thongthong nikhat ah an rak thi. Omicron zawtnak rak dong ding in India cu ready tein aum cang kong Union Health Minister nih cun a chim.
Leave a Reply