‘Yangon ramṭhen, Cheif Minister Hla Soe, chawleh chawhrawlnak Minister Aung Than Oo le Yangon ramṭhen SAC Secretary Soe Soe Zaw cu, eihmuarnak upadi in dan tat an si hna” tiah nizan June 15 zanlei ah SAC nih cathanh an chuah.
Yangon ramṭhen peng 6 ah vawlei hmun 9, ekah 260 leng cu Hla Soe le Aung Than Oo nih an zuar caah kyats nuai 38000 kan sung, Soe Soe Zaw zong vawlei hmun kong he teltumnak a ngei,tiah SAC nih an langhter.
Hla Soe cu Yangon ramṭhen Cheif Minister a ṭuan chung ah vawlei hmun sing 2500 a ei. Aung Than Soe cu sing 5000 a ei i, Soe Soe Zaw cu vawlei hmun zuarmi a miak a ei dih caah eihmuarnak upadi in taza kan cuai hna, tiah an langhter.
Cu pin ah Aung Than Oo cu vawlei hmun tuahnak nawl a ngeimi hna sin ah pawngkam ṭhathnemnak ca ah tiah sing 9500 a laakmi hna cu SAC kut ah a pe lo i, a mah pumpak bank account ah a rawn, tiah theih a si.
Yangon ramṭhen Cheif Minister Hla Soe cu 2022 Febuary 1 in a rian in an dinhter i, chekhlatnak an tuah. Aung Than Soe cu March 23 ah an rak tlaih i, June 13 ah a rian in an dinhter. Soe Soe Zaw cu May 16 zanlei ah an rak tlaih i, eihmuarnak upadi in taza an cuai.
Eihmuar ruang ah Yangon ramṭhen Cheif Minister hlun Hla Soe le chawleh chawhrawlnak lei minister hlun Aung Than Oo cu, eihmuarnak upadi section 55 in taza an cuai hna. Yangon ramṭhen Secretary Soe Soe Zaw cu eihmuarnak section 55/63 le section 56 in taza an cuai, tiah theih a si. Cred : The Chin Post
Leave a Reply