Ralhrangbu nih nawlngeihnak an lak hnuah USDP chungtel pawl cu mi leirawitu (dalaan) a si tiin an thah mi 60-70 an si cang. Rampi huap in tha tein cazin kan lak ahcun 100 hrawng an si cang lai. Mah hi cu minung i huatnak lei deuh a si cang tiah USDP chimhnak nawlngei Dr. Nandar Hla Myint nih a chim.
Dr. Nandar Hla Myint nih ralkap nih nawlngeihnak a lak caah Dalaan kan si nak ding a ruang a um lo. A ruah zong kan ruat lo, kan tuahnak ding lam zong a um lo pin ah tuah dingin a kan fial mi zong a um lo a tibantukin Pago USDP chungtel pakhat zong nih an mitkem deuhmi poh dalaan tiin an thah hna. Kan chungle tiang hnahnawhnak an pek, USDP kan si ahcun thi dingin timh cia a hau tiah a chim.
Ralhrangbu nih uknak a lak mi ruang cu 2020 thimnak ah NLD nih mefung an fir ruangah a si a ti mi cungah USDP zong nih a dirpi mi a si.
G-Z pakhat nihcun USDP pawl kan thah mi a si lo. Fiang tein thawng kan thei mi cungah kan tuah mi a si. Tha te kan hlat tikah tam deuh hi cu khuabawi le USDP chungtel pawl an si ko tiah a ti ve.
Mongyua pa pakhat nih mipi cawllcanghnak le an duh mi vialte thawng an pek hna caah mipi pawngah an um ngam ti lo, mah caah an i thuh hi a si. USDP le Ralhrangbu cu hmunkhat an si caah zumh ding an si lo tiah a chim.
USDP nih an party minung pakhat a thah ahcun sing 5 le hliamhma a pu mi sing 3 kan bawmh, an nunnak caah tinung mi pawl zong an himnak kan tuak piak hna tiah Dr. Nandar Hla Myint nih a ti.
USDP cheukhat thah an si ve bantukin ralhrangbu nih an kah, an tlaih an hremnak ah nunnak a liam mi 860 leng an si cang tiah AAPP nih a thanh.
The Chin Post
Leave a Reply