Nizaan May 24, Cawn ni hnih ni ah kum 18 upa Uvalde High School siangngakchia pa nih meithal in a kah hna caah Siangngakchia 19 le Saya te 2 an thi tiah nawlngeitu nih an langhter. Tuan ahcun ngakchia 14 le Saya 1 an nunnak a liam, asinain hliam tuar mi cheukhat Sizung ah an nunnak a liam tthan caah a thi mi dihlak hi siangngakchia 19 le Saya te 2 an si tiah thawng an thanh tthan.
A kaptu tlangval no te hi Law enforcement hna nih an kah ve tiah an langhter. Hi bantuk in Sianginn ah ra riangmang in a rak kah hna hlan deuh ahhin a pi a kah ta hmasa tiah Abbott nih cun a langhter. Nain a pi kong ah zeihmanh chim chap mi a ngei lo. Abbott nih a chim ning ahcun ” a min ah Salvador Ramos a si i, kum 18 upa mi a si, amah hi Pistol a ngei, cun Rifle zong a ngei” tiah a chim.
Thawngfiang a si mi cu,”USA, Texas State chung San Antanio City nitlak lei Uvalde khua i Robb Elementary School ” Bienvenidos” ah tuchun Suimilam 11:30 Am hrawnghrang ah khan Arab-American Salvador Ramos(18) High School kai lio pa nih Auto-Rifles meithal pahnih hmangin Sianghngakchia te te cu a kah thluahmah hna i, Sianghngakchia -19 pinah an nunnak a liam pinah, Saya/Sayamah -2 a hmunah an thi i, hngakchia zeimawzet cu Si-Inn ah hliam tuar in an chiah hna. Misual Lainawng Ramos cu Palik maw, mizeimaw nih thi lakin an kah ve. Texas Governor Greg Abbott le President Biden nih ngaihchiatnak tuarmi chungkhar le America Mipi sinah an tuarhpi nak an chim. Hi kong hi FBI nih thil sining an hlathlai lio asi.”‘ tiah theih a si. Ngaihchia tuk asi..thlacamnak in bom cio hna usih.
Magwe ramtthen ah ralhrang nih biatak tein kahdohnak a tuah ruangah le innlo an khangh piak dih hna ruangah ralzaam in a um mi cheukhat hna cu Facang ei ding an i thaat lo caah Thingbahra an ei tiah irrawady news nih a langhter. SAC ralhrang ih nichiar pehtlaiin khangh le duah a tong mi Magwe ramtthen Seikphyu, Saw, Pauh tibantuk peng le khuate tampi in ralzaam mizapi hna cu rawl ei ding an harsat ruangah ramlak Thingbahra an ei hna tiah a langhter.
Hi hmun hrawng hi PDF le SAC ralhrang hna biatak tein an i kahnka hmun a si, a liamcia thla 3 hrawng khan a si cang i, ralhrang nih an dum hna, an innlo an khangh piak dih hna ruangah a zaam mi an si hna. Hi hmun hrawng ahhin Sii-ai le rawl zong rikhiah ngei lawng in phurh khawh a si caah ralzaam cheukhat cu an harsa ngaingai i Facang ei ding an i daih lo caah eisual a um mi Thingbahra phunkhat cu an cheu an cheu i an pho hnu ah an chumh i an ei hi a si.
Ral an zaam chung zong a sauh pah cang caah le ralzaam dang an rak i chap lengmang caah ei din le si-ai an harsa ngaingai. Kum 2021 February 1 in 2022 April 30 tiang ah khan Magwe ramtthen lawng bak SAC ralhrang nih inn 2000 leng an khangh cang tiah Data For Myanmar nih a langhter.
Chin ramkulh, Mindat ah tleirawl pakhat cu May 16 Kyaukhtu ah cycle remh dingin a kal lio lampi ah SAC ralkap nih an tlaih i an thah, a ruak cu ek khur chungah an hlawnh tiah theih a si. SAC ralkap kut in nunnak liammi ruak cu Mindat-Kyaukhtu lam Kyauktawng(ကျောက်တောင်) lam thennak ah May 24 ah CDF-Mindat nih an hmuh i, a ruak an vui tiah theih a si. Nunnak liammi a ruak cu a hmai a rawkdih cang i, a keng lei ah meithal hma hmunhnih in hmuh a si tiah khuami hna sin in theih a si. Mino pakhat thah a ton ni May 16 ah Mindat in Kyaukhtu lei ah a kalmi SAC ralkap motor cu Chin ralkap nih bomb ah puahhnawh hna caah SAC ralkap 40 an rak thi tiah theih a si.
Vawlei cung tleirawl hna lak ah a niambik tiah Nepal pa te cu Guiness World Record pek a si., Dor Bahadur Khapangi timi pa te cu a liamcia March 23, 2022 ah khan vawlei cung tleirawl hna lakah a niambik a si tiah Guiness World Record certificate pek a si. Anih hi kum 2004, November 14 ah a chuak i, tu ahhin a chuah thla in tuah ahcun kum 17 lawng a si rih. Khapangi hi pe 2ft le zung 4.9 (2ft 4.9in) lawng a sang mi pate a si. “Ka unau pa nih Guiness World Records cerficate a co ruangah kai lawm taktak” tiah Khapangi a unau pa Nara Bahadur Khapangi nih a chim.
Khapangi hi Media nih biahalnak an ngeih lio ah a ning a zak i, a unau pa nih cun bia a chim piak. Nepal ram khualipi Kathmandu in Meng 81(miles) ai hlatnak ah khua a sa mi a si i, cu khua ahcun sianginn a kai lio mi a si. A upa nih cun hi bantuk in World Records a ngah ruangah hin hmailei ah Khapangi fimcawnnak caah bawmtu a si lai tiah a chim.
Tuan deuh i Vawlei cung pa tleirawl lakah a niambik pa cu Nepal mi thiam a si ve i, a min ah Khagendra Thapa Magar ti a si. Anih hi 2ft 1.8in lawng a sang mi a si. Kum 1992 lio ah a chuak mi a si i, vawlei a si bang kum 2020 January 17 ni ah a nunnak a liam. Khagendra hi Khapangi nakin a niam deuh mi a si, asinain a um ti lo hnu a miphun hawi Khapangi cu vawlei cung tleirawl pa lakah a niambik tiah World Record co tu a hung si.
2022, May thla ni 23, Tuni zaan lei suimilam pa 6:00 hrawngah Sagaing ramthen, Shwebo pengkulh, Ma Khoh Khuate pawng kahdohnak ah SAC ralhrang nih kahdohnak hmunhma thianhhlimhnak an tuah lio ah mipi kan ralkp minung pa 5 ruak an char tiah theih a si. Cu pinah SAC ralhrang hna nih PDF hriamnam kutin tuah mi meithal zuun khat, kuatin tuah mi bomb lung 10 le hraimanm dang an laak piak chap hna tiah theih a si.
Hi Mipi kan ralkap minung pa 5 SAC ralhrang nih an char mi hna hi, chungkhar chung ah an peek le peek hnga lo timi hi theih fiang a si rih lo. SAC ralhrang nih zeitinddah an tuah hna, mei in an khangh hna hnga maw tiah ruah a si.
Leave a Reply