US ram Lai khuapi timi Indiana Polis nawlngeitu hna nih tleih dingin kan herh an timi Pu Siang Hnin cu Indiana Polis nawlngeitu nih herhmi ka si ti thanwg a theih cangka in amah tein a va kal zawkzawk i tuni in an herhnak a konglam vialte a thiang dih cang. Indiana Polis nawlngeitu hna nih Pu Siang Hnin an herhnak a ruang bik cu a luancia caan ah zurit buin thil a tuah sualmi ruangah a si. Tutan hi amah Pu Siang Hnin zong nih ka kong an ka ceih piakmi a thiang dih cang tiah ka ruat ko cu teh tiah a lau ngaingai. Pu Siang Hnin hi mi tha mi tluangtlam a si. Indiana Polis ah a nupi le fa le he chungkhar nuam tein khua an sak lio a si ko. Pu Siang Hnin kong ah thinphang ding a um ti lo. Chan Cung Hnin Hlawnceu
September 3 zaan suimilam 8 ah KNDO le DKBA fonh in Karen ramkulh Myawady, Sukalih peng Sukalih le Wawlei lamton ah a um ralhrangbu Ukarihthah (အူးကရိထ) riahbuk cu an lak hnuah mei in an khangh dih tiah theih a si. Hika hrawng Karen hriamtlaibu pahnih Karen National Defence Organization (KNDO) le Major Saw Kyaw Thet hruaimi Damocratic Karen Budhist Army (buchuah) hna an cawlcanghnak hmun a si. Karen thawngthanhnak pakhat nih a chim ningah KNDO le DKBA fonh in ralhrang riahbuk an lak, mei in an khangh dih. Thi le hliam mi zeihmanh kan theih rih lo tiah a chim. Ralhrangbu nih Karen ramchungah cawlcanghnak tam deuh an tuah ruangah i kahnak zong a chuak pah lengmang.
September 2 ah KNU/KNLA ramchung Dwelo peng, Lutaw peng le Buto pengah kahdohnak a chuak. September 2 ah KNLA le ralhrangbu i kahnak ah ralhrang 6 an thi, 4 hma an pu. Dwelo peng an i kah hnuah ralhrang bohmu Lin Htet Soe hruaimi khah-lah-yah 97 nih Watolaw khuachungah hriamngan lung 5 an kah tiah Kawhtoolei special force nih a chim. Nizaan September 3 zaan ah ralhrang le KNLA brigade 1 hna fak ngaiin an i kap than i, ralhrang 3 an thi, 5 hman an pu tiah KIC nih a tial.KNLA brigade 6 chung zong nizaan ah hmun 3 ah an i kap. Kaphnih in thazaang an i chap cuahmah tiah theih a si. Ref; KMTE, The Chin Post
Ralhrang hna a do tu zei bantuk phu he poh i bawm in dothlennak ka tuah lai tiah KNU ca thanh Hramhram in nawlngeihnak la tu rallokap a dotu zei bantuk phu he poh he hmunkhat ah tang tiin uknak tha lo cu kan doh lai tiah KNU nih a thanh. KNU cu Federal Democracy ser chuah khawh ding in a fek mi biakamnak cu pehzulh in ka tuah rih lai tiah September 3 ah cathanh a chuah. KNU nih cun rallokap hna nih hrem le dawi a tong mi hna bawmh a herh mi hna poh cu a si khawh chung in kan bawmh hna tiah a chim.Cun kum saupi a cang mi ram chung ral i kahnak a thok nak hram cu fianter ding le a dik mi deih nak,rampi nih kan herh mi a dang fianhternak lam thar zong pehzulh in kan kawl ko lai tiah an langhter. KNU cu cozah he ram chung i kahdohnak ngolh ding in lungtlinnak minthut (NCA ) ah min a thut mi phu an si nain rallokp hna cu KNU hmunchung ah rilonh in an rak luh caah kaphnih kahnak hna a chuak. The Chin Post
KNU hmunhma ah a luancia mi August thlakhat chung ralhrang he i kahnak ah ralhrang lei in 166 an thi tiah KNU September 2 ah an thanh. KNU hmunhma a simi Dutathu pengkomh Brigade 1,Tawbgngu Brigade pengkomh 2,Ngianlaypin pengkomh Brigade 3,Mutaw pengkomh Brigade 5 le Dupalazia pengkomh Brigade 6 ah rallei cawlcanghnak ruangah i kahnak a chuah hi a si. KNLA,KNDO le ralhrang i kahnak voi 210 leng a si i cu chubgah Brigade 5 hmunhma ah voi 180 leng a si. Hi i kahnak ah ralhrang lei in 166 an thi i 101 hlian an si,ralhrang kut in mipi 3 an nunnak a liam tiah KNU nih an thanh.
Leave a Reply