US Nih Taluk Kut A Phan Hnga Ding Hong Kong Mipi A Khamh US cozah nih Hong Kong ah kuat ahcun an nunnak caah a thinphan ding a um ngai mi, US ah a dor lio mi a thong renglo cu thla 18 chung US ah um khawhnak le riantuan khawhnak a pek hna.
US nih thla 18 chung temporary visa a pek mi hna zeizat dah an si ti fiang tein theih a si rih lo nain, sualnak ngan a tuah mi tel lo in US ah a dor lio mi 330,000 hrawng an si kho men tiah US cozah nawlngeitu sang pakhat nih a chim.
Hi kong he pehtlaih in White House chimnak nawlngeitu Jen Psaki nih Hong Kong ah democracy cawlcanghnak a tuahmi hna cu Taluk nih thla 14 chung a doh mi cungah US nih a ngeih mi ramdang policy ningin Hong Kong mipi hna cu US ah chihkhat i dornak le riantuan khawhnak kan pek hna lai American ruahchannak, tinhmi le a zuamnak vialte hi Hong Kong mipi hna cungah Taluk nih a namnehnak remnak caah a si tiah a chim.
Hong Kong hi Taluk kuttang in zalonnak ngah ding le democracy uknak a um khawhnak dingin a zuam lio mi a si.Nikum ah Hong Kong ah democracy cawlcanghnak a tuah mi minung 100 hrawng cu Taluk nih a tlaih hna tiah US president nih a chim.
US cozah nih Kawlram uknak ralhrangbu nih an lak hnu ralhrangbu cawlcanghnak ruangah US um mi Kawlram mi hna i dornak le himnak pek dingin May thla ah a rak thanh ve cang tiah VOA nih a tial.
The Chin Post
Leave a Reply