US nih ASEAN ram hna sin ah COVID-19 rai dohnak ah a bawmh ning

The United States of America (US) nih Associations of South East Asia (ASEAN) ram hna ah ngandamnak lei zohkhenhnak caah COVID-19 zawtkhamhsii 23 millions le tangka in $ 158 millions tluk a bawmh cang tiah, US missions to ASEAN website ah an langhter.

US le ASEAN ram hna nih hin 2022 kum ah vawleicung raipi COVID-19 hi dih dongh ter ding in an i tim i, an i zuam hna. Cu caah vawleicung ah ngandamnak zohkhenhnak lei ah a der mi ram hna ah COVID-19 zawtkhamhsii chunh ding, hi ram hna nih poipang an ton mi harnak kong ah bawmhnak pek ding, Vawlei pi nih chawlehthalnak kong ah sunghzatlaknak a ton mi chung in chanhchuah ding le vawleicung mi vialte nih COVID-19 rai in i ralrin, i khamh le hmailei ah hi bantuk zawtnak tha lo a chuah ti lo ding in runvennak caah timhtuahnak tiang in an ngei.

COVID-19 rai doh tinak ah dirhmi bu The Global Alliance fo Vaccines and Immunisation (Gavi) timi bu ah US nih tangka $ 2 billions a thawh ve, hi program nih hin chungkhar tangka lut (family income) tlawm te lawng a ngei mi hna caah himbawm tein COVID-19 raikhamhsii chunh khawhnak a bawmh. COVId-19 Vaccines Global Access (COVAX) timi vawlei cung minung vialte nih raikhamhsii chunh khawhnak program caah US nih raikhamhsii 80 million tluk a thenphawt cang hna. Hi raikhamh sii hi ASEAN member a si mi Cambodia, Indonisea, Laos, Malaysia, Philippines, Thailand le Vietnam ram hna an phak ter cang. Myanmar, Singapore le Brunei ram belte ah an phan hna lo.

COVID-19 i zohkhenhnak kong ah a thazaang a der mi Myanmar ram ah ralkap nih uknak a lak caah rai i zohkhenhnak kong ah a thazaang a der chin vima. US nih hin Myanmar ram ah COVID-19 thlopbul zohkhenhnak kong ah $20.3 million a bawmh cang. Hi a bawmh mi hi zawtnak checknak he aa pehtlai mi thilri, zawtnak tawlrelnak kong le mizapi hngalh ding chimh cawnpiaknak hna ah hman an si. Cu pin ah Myanmar ram hi tampi bawmh chap a hau. Myanmar ram mi nih an ton cuahmah mi ngandamnak zohkhenhnak lei chambaunak kong ah Ramkip in kan riantuan tti hawi hna he a thabik in bawmhchanh khawh ding in kan i zuam cuahmah lio a si, tiah US missions to ASEAN website ah an langhter.

(Hi capar hi US missions to ASEAN websites ah US nih ASEAN ram a bawmhnak kong alanghter mi kha a tlakning in leh mi a si.)

The Chin Post

Be the first to comment

Leave a Reply

Your email address will not be published.


*