Ralhrang nih Timit hlei donh hram an thok cuahmah an ti maw? A theifiang nih comment ah hun tial te tuah uhlaw. Crd-Salai Williams Hlawnceu. Comments-An lim cang an ti. An lim diam cang an ti. SAC nih Timit hlei donnak thilri tling tein a hmun an phanpi dih cang rau hlan ah hlei an ser cang lai. An donh khawh cang tiin pei kan rak theih cu a si tak maw tak lo k thei lo.
Relchap, (Crd-The Chin Post) CDF Matupi Thangchiat Le Sualhawl Ai Zuammi Pu Roliana Ralrin Pek A Tong, CDF Matupi minchiat le thangchiatnak ding lam a hawl i hruaitu sualhawi ai zuam mi Aizawl khua ah dawr a tuahmi Pu Roliana cu CDF Matupi ralrin an pek i na thih nun kongah kan i ceih lo tiah ralrin peknak ca an chuah hnawh tiah theih a si.
Chin ramkulh, Matupi peng, Saungthia khuami, a tulio, Mizoram, Aizawl ah khua a sa i, Bawngkawn Bazar ah thil a zuarmi U Roliana cu, Myanmar ramchung ah SAC nih hramhram uknak an lak hnuin, kan miphun nih zalong tein mah te uknak nawl a ngeih khawhnak ding le Federal Democracy ngah khawhnak ding ah hriam a tlai i, ral a dotu CDF-Matupi cu, mipi hna sinah minchiatter ding ah a lam kip in a kan doh lawng si loin, CDF-Matupi hruaitu hna zong an limhang zor dingin Facebook cahmai ah a taarlangh hna caah U Roliana a nunnak kong ah le a humhimnak kongah CDF-Matupi kan i ceih lai lo.
Cucaah, hriam a tlai i ral a do cuahmahmi CDF-Matupi cu, hi hnu ah hi ti bantuk in, kan minchia dingin a kan tuah rih a si ahcun, U Roliana a chungkhar sahlawh rualchan hna zong CDF-Matupi nih a herh ning bantukin hma kan lak hna lai. Cun, zeibantuk hriamtlaiphu le zeibantuk minung an si zong ah CDF-Matupi a kan doh i minchia dingin a kan tuahtu vialte cu, a herh ningin hma kan in lak hna lai tiah CDF-Matupi nih nihin September 20 ah cathanh an chuah.
Yangon ah ral vennak a tuahtu SAC ralkap motor 2 bomb puahhnawh an ton ralkap 5 nak tlawmlo an thi. Yangon, Dagon Myotit ni chuahlei pengchung ah ral vennak a tuahtu SAC ralkap motor 2 cu nihin September 20, zinglei suimilam 10:00 hrawng ah kutcheh bomb puahhnawh in kan doh hna tiah Yangon Federal Army (YFA) in ṭuanvo ngeitu nih a chim.
” Bawi deuh nih an i citmi motor cu a luat nain, a hnu zul motor tu cu ṭha tein kan puahhnawh khawh” tiah Yangon Federal Army (YFA) in ṭuanvo ngeitu nih cun a chim. Cu kahdohnak cu YFA le Yangon hrambunh pah-kah-phah phu pakhat simi URNW phufonh hna nih an tuahmi a si i, pa-de-ta bomb le kutcheh bomb komh in kan hman, SAC ralkap lei a tlawmbik minung 5 hrawng an thi lai, an motor zong a rawk tiah Yangon Federal Army nih cathanh an chuah.
Tualchung hriamtlai phufonh lei hliamhma tuarnnak umlo in hnu an tolh kho tiah theih a si. Cun nihin September 20 chunhnu ah Yangon ramṭhen, Khayan peng Office of the General Administration cu Khayan PDF nih 40 mm bomb hmang in an kahdoh hna tiah theih a si.
Chin Mipi Kilvengtu CDF He Pehtlaihnak Tha Kan Ngei Ko – Khaing Thu Khah, Chin ramkulh mipi kilvengtu CDF hriamtlai hna he pehtlaihnak tha kan ngei ko tiah Rakhine hriamtlai AA in chimnak nawl ngeitu Khaing Thu Khah nih September 19 ni ah a chim tiah theih a si.
“Laymyo tiva lei kap ah a ummi CDF hna he naihniam tein pehtlaihnak tha kan ngei ko, asinain raltuknak kongkau ah i bawmin cawlcanghnak tucu a um lo” tiah Khaing Thu Khah nih cun a chim. Rakhine ramkulh chungah PDF an um lo, ramri in kan i pehtlaihnak Chin ramkulh, Magwe ramthen lei ah CDF/PDF hriamtlaiphu hna cu ngandamnak kong le thil dangdang ah bawmhchanhnak kan tuah mi zong a um tiah a chim chap tiah theih a si.
Kahdohnak um lo buin Mindat peng ah SAC ralkap nih vanlawng in bomb an thlak, Chin ramkulh, Mindat pengchung ah nihin September 20 zaanlei ah kahdohnak a chuak lo nain, SAC ralkap nih vanlawng hmang in bomb an thlak tiah theih a si.
SAC ralkap nih bomb an thlaknak hmunhma cu Mindat-Matupi meng 16 hmun hrawng a si tiah tualchung mi nih an chim. Nihin September 20, zaanlei suimilam 4:00 hrawng ah Mindat peng khua pakhat ah SAC ralkap nih ral tuknak vanlawng hmang in bomb an thlak. Bomb thlaknak ruangah a rawkralmi hna cu fiang in kan theihkhawh rih lo caah, kan hlaihlai chuahmah lio tiah Mindat zatlang uktu phu nih social media ah an langhter.
A luancia July 2 lio zong ah khan, Mindat peng Chat(ချပ်) khua ah SAC ralkap nih ral tuknak vanlawng 2 hmang in bomb an thlak caah, tualchung mi hna an umnak inn, Biakinn le sianginn hna an rawk. Cun CDF chungtel minung 3 an nunnak a liam i ngakchia, tar/upa le pum tlamtlinglo mi hna nih hliamhma an rak tuar tiah theih a si.
Pakokku pengchung kahdohnak ah SAC ralkap 4 an thi, 2 nih hliam an tuar, Magway ramṭhen, Pakokku peng September 19 chunhnu ah SAC ralkap le tualchung hriamtlai phufonh kar kahdohnak a chuak i SAC ralkap lei in minung 4 an thi, 2 nih fakngai in hliamhma an tuar tiah Urban Underground Revolution Force Yesagyo nih an chim.
Pakokko peng le Yesagyo peng aa tonnak Bunekan(ဘုန်းကန်) khua ah umhmun khuarmi SAC ralkap minung thazaang 20 leng cu September 19, chun hnu suimilam 3:00 hrawng ah UURF telhin phu 7 fonh nih kan kahdoh hna tiah UURF Yesagyo in chim phuannak nawlngeitu Bo K Chit nih a chim.
” Kanmah lei nih hriamngan le hriamhme hmang in suimilam pakhat tluk hrawng kan kah hna, pakhat cu kan kahnak hmun ah a thi colh, minung 5 nih fakngai in hliamhma an tuar. Sizung kalpi ding in motor nih a don hna ah motor cung ah 3 an thi ṭhan” tiah a chim. SAC ralkap lei nih an kan kahdoh ve na in, kanmah lei hliamhma tuarmi le a thimi um lo in hnu kan tolh kho tiah Bu K Chit nih a chim.
US Nih Taiwan Ralkap Thazang In Ka Bawmh Lai Tiah A Chimmi Cungah China A Lungtling Lo! China nih Taiwan a tuk a si ahcun US nih ralkap thazang in Taiwan kan bawmh lai tiah US president Biden nih a chimmi cu, kan duh lo kan dohkalh, US le China ramhnih kar ah i hmuhthiam lonak a fak chinnak a si lai tiah China ramleng lei zung nih september 19 ah an chim.
Rampi thencheunak dingah a telmi hna cu China nih a herh ningin hmalaknak nawl le lehrulhnak nawl kan tuah khawh tiah, Ministry of Foreign Affairs zung chimnak nawlngeitu Mao Ning nih cun media hna he tonnak ah a chim. Kannih nih cun a then cangmi kan ram i fonhthannak ding ah kan tha umek in kan i zuam lai, cu lio ah i thencheunak dingah thazang petu an um ahcun kan zoh sawh hna lai lo tiah, a chim chap. US nih Taiwan ram kong ah hin dik le fel tein tawlrel sehlaw Taiwan ralkap hna hi hriamnam bawm ti hna hlah seh, cun Taiwan daihnak hi rak hnursuang ti hlah seh tiah, China nih cun a duhnak a chim.
SAC rian pek cohlangtu khuabawi le pyusawhṭi pakhat PDF nih an thah hna, Mandalay ramṭhen, Taungtha peng Kyaukpon(ကျောက်ပုံ) khua ah SAC ralkap rian pekmi a cohlangtu khuabawi le pyusawhṭi pakhat cu tualchung hriamtlai phu hna nih an thah hna tiah TTA pah-kah-phah Taungtha nih nihin September 20 ah cathanh an chuah.
Kyaukpon(ကျောက်ပုံ) khuami khua 8 uktu khuabawi Khin Maung Maung Win le pyusawhṭi phu chungtel Win Saw cu nizaan September 19 ni ah TTA phu le Mayelatt PDF, Seven People Defense Force, Myingyan Black Tiger, Natogyi Regional Defense Force phufonh hna nih fimhlawm an si tiah ca thanh an chuahmi ah an langhter. Khuabawi le pyusawhṭi phu chungtel pakhat cu an umnak inn ah luhhnawh in, minung pakhat ah voithum cio meithal in kah an ton caah kah an tonnak hmun ahcun an thi colh tiah TTA pah-kah-phah chungtel pakhat nih a chim.
KNU Brigade 5 Ah SAC Ralkap Pahnih CDM An Tuah, Lawmman Tangka An Pek Hna, KNU Brigade 5 hmunram ah SAC ralkap pahnih cu CDM an tuah caah KNU nih lawmman tangka kan pek hna, tiah nihin September 20 ah cathanh an chuah.
SAC ralkap Khah Mah Yah 401 Battalion in ralkap Thar Hla le Ye Thiha Htun cu,
KNU Brigade 5 hmunram ah a luancia August 21 ah khan an lut, tiah theih a si. CDM tuahtu ralkap pahnih sinin meithal zun 1 le meithal kuan he CDM tuahtu Thar Hla cu KNU nih kyats sing 15 an pek i, meithal he CDM tuah lomi Ye Thiha Htun cu kyats sing 5 an pek, tiah theih a si.
SAC nih nawlngeihnak an lak hnu in mizapi inn le lo, an hrawhnak le khanghnak an tuah pinah rammi hna an thahnawn hna i nuhrin covo an buar. Anmah chung lila in hramhram uk duhlonak an langhter i, CDM an tuah. SAC ralkap sinak an chuah tak i, KNU Mutraw pengkomh ah pehtlaih in a rak zammi ralkap pawl an tam, tiah Brigade 5 nih an langhter.
KNU Brigade 5 Hmunram Ah Umhmun Khuarmi SAC Ralkap Cu KNLA Nih An Kah Hna Caah Ralkap A Tlawm Bik 2 An Thi, KNU Brigade 5 hmunram, Mutraw(Hpapon) pengkomh ah umhmun khuarmi SAC ralkap sakhan hna cu, KNLA Brigade 5 kuttang nih a luancia September 16 le 17 ah an kah hna caah SAC ralkap a tlawm bik 2 an thi, tiah Mutraw News nih a langhter tiah theih a si. September 16 zing sml 10:15 ah Kawthu Lay kuttang No.1 Battalion nih Hpapon(ဖာပွန်) peng Khawpauk(ခေါပုပ်) SAC ralkap sakhan an kah caah ralkap 1 a thi, tiah KNLA Brigade 5 nih an langhter.
September 17 zing sml 10:11 ah KNLA Battalion 15 ralkap hna nih Khawpauk sakhan cu voihnih kheng te an kah pinah Laygyukhu(လယ်ကျိုးခို) le Hlakonepyu(လှဂွန်းပျို) khua karah SAC ralkap le KNLA kahdohnak a chuak i, SAC ralkap lei a thimi le aa hliammi zat cu theih a si rih lo, tiah Mutraw News nih a langhter.
Cu pinah zanlei sml 4:50 ah Kawthu Lay ralkap No.102 Battalion ralkap hna nih, Hlakonepyu sakhan cu a thli tein an va kah ṭhan caah SAC ralkap 1 a thi. KNU Brigade 5 hmunram ah SAC ralkap, an kuttang BGF le KNLA karah ni fatin ti awk in kahdohnak a chuak, tiah Mutraw News nih a langhter.
Kalay-Tamu Motor Lam Kam Ummi Inn 9 Cu SAC Ralkap Nih An Khangh Caah A Ciam Dih, Sagaing ramṭhen, Tamu peng Kalay-Tamu motor lam kam ummi khuate 3 chung in khuami inn 9 cu, SAC ralkap nih nizan September 19 ah mei in an khangh, tiah theih a si.
Kalay-Tamu lam kam ummi khuate Yanlinphai(ရန်လင်းဖိုင်) khua inn 4, Nanmumṭha(နန့်မွမ်ထာ) khua inn 3 le Khawmunnuam(ခေါမွန်နွမ်) khua inn 2 cu SAC ralkap nih an khangh caah a ciam dih, tiah theih a si. Khuate 3 a khaangtu SAC ralkap pawl cu, Tamu khua lei an kir lioah PDF- Tamu nih lam hruang in an bawmh hna i, bomb an puahhnawh hna.
SAC ralkap a thimi le aa hliammi an um le um lo cu theih a si lo. SAC ralkap nih Yanlinphai khua cu an rak khangh bal cang i, khuami zong an rak thah hna. Atu khuate 3 an khanghmi chung in khuami hna cu a himnak hmun ah an zam dih, tiah theih a si.
Ukraine Cu Pehtlai In Bawmhnak Kan Pek Rih Lai- Taiwan, Taiwan nih cun Ukraine ram mipi hna nih an zalennak ding caah bawmhnak kan pek chanh khawhmi cu ka lunghmuih tuk tiah Taiwan President Tsai Ing-wen nih september 19 ah a chim.
NewYork ah tuahmi Concordia Summit ah President Tsai Ing-wen nih a tu bantuk in a chim hi a si. Taiwan ram nih cun Ukraine ram harnak a tongmi hna caah US $ Nuaisawm 30 tluk bawmhnak a rak pek i, hi pin zong pehtlai in harsaknak a tongmi Ukraine mipi cu kan bawmh rih hna lai tiah a chim chih.
Nitlak lei ram hna nih Russia phihkharnak an tuahmi zongah ka itel ve tiah, Taiwan nih cun a rak chim ve. Cun Ukraine nih a ton cuahmahmi harnak hi kan theihthiam pi tuk hna Taiwan zong nih China tlerhkhonhnak kan ton cuahmah liomi he a lo tiah, Taiwan cozah nih cun an chim.
Taiwan cu raltuknak lei in tlerhkhonhnak le nawlngeihnak lei in hip khawhnak ding in China nih a hlannak in tlerhkhonhnak a kan tuah deuh tiah,President Tsai Ing-wen nih cun a chim chap. US President nih cun China nih Taiwan a luh hnawh si cun Ralkap thazang in ka dirpi lai tiah a chim ve.
Thailand Ah Myanmar Mi 15 Tlaih An Tong, Minung 2 Covid Zawtnak An Ngei! Thailand ram Kamchan Naburi ramkulh Taung-pha-bun khua pawngah mawtaw pakhat checkhlatnak tuah dingin an dirter i dir duh loin a zam caah tuanvo ngeitu nih an dawi hna hnuah mawtaw an tlaih, mawtaw kuangah myanmar mi 15 a phurhmi hna cu kan tlaih hna tiah, tuanvo ngeitu hna nih an thanh.
Tlaih a tongmi Myanmar mi 15 cu sizung ah zawtnak zohfel an si i cu chung ah minung 2 cu covid zawtnak an ngei tiah, theih a si. A tam u hi cu Yangon, Mawlamyine in an si hna i agent nih Chon Phon le Rat Buri ah rian nan tuan lai tiin a van ratpi mi hna an si, minung pakhat nih agent sin ah baht 25000 pek in a rami an si hna. Myanmar ah SAC nih uknak a lak hnu in ramchung mipi cu riantuan awk mumal an ngeih lo caah phungning loin Thailand ramri in nifatin a rak lutmi an tam ngai tiah, The Bangkok Post nih cun a tial.
Dohthlennak Ralkap Hna Nih SAC Ralkap Sakhan 90 Leng An Lak Cang, Fianternak: Dohthlennak ralkap timi chungah SAC a dohtu tlangcung hriamtlaibu, tualhcung hriamtlaibu, PDF le CDF vialte an i tel. Feb 1, 2021 ah MAH nih nawlngeihnak a lak in thla 7 a rauh hnu Sept 7, 2021 ah NUG nih D-Day a thanh i cu ni in hriamtlaih in khuapau dohthlennak cu aa thok. Atu tiangah dohthlennak ralkap hna nih ramchung huap in SAC ralkap sakhan 90 leng an lak cang. Hi an lakmi ahhin SAC ralkap caah a biapi tukmi sakhan zong an i tel len.
Kachin Ramkulh, Kum 2021, March thla dihlei ah China-Myanmar ramri Alaw Bun tlangah a ummi SAC sakhan cu KIA nih an lak. Alaw Bun tlang cu Kachin ramkulh Bhamo pengkulh Dawtphoneyan peng ah a um i KIA nih umhmun an rak khuarnak a si. Kum 1987 ah Kawl ralkap nih an rak lakmi a si.
Alaw Bun sakhan laknak ahhin CNA zong an i tel ve. Nunnak a liammi zong an um. KIA nih an lak hnuah SAC ralkap nih lak ṭhan dingin April, 2021 ah hriamngan le vanlawng in an kah nain an lak ṭhan kho ti lo. KIA hruainak tangah Kachin People Defense Force (KPDF) an ser i SAC sakhan zeimawzat cu an lak ṭhan.
KIA/KPDF nih an lakmi sakhan hna cu Hpakan peng ah 5, Putao pengah ah 3, Tanai pengah 2, Bhamo pengah 3 le Waingmaw pengah 3 hna an si. Shwegu peng zongah an lakmi a um nain a zat theih a si lo. KIA hruaitu pakhat nih “Shwegu peng i sakhan cu kah loin kan lak, anmah tein an zam dih” tiah a chim.
Kaya Ramkulh, Kaya ramkulh ah tualchung hriamtlai hna nih SAC ralkap sakhan 14 le palik sakhan 5 an lak cang. Karenni National Progressive Party (KNPP) secretary Khu Daniel nih cun “Mese, Hpasawng, Hpruso, Bawlakhe, Demoso le Shadaw peng hna ah SAC ralkap le palik sakhan tam ngai kan lak” tiah a chim. KNPP le Karenni Army (KA) nih an lakmi sakhan lakah SAC ralkap 30/40 hrawng an umnak pahnih aa tel i a dang ralkap 10 hrawng lawng an umnak a si. An Sakhan 4 cu 2021 chungah an lak i 2022 chungah an lakmi a tam deuh cang tiah theih a si.
Chin Ramkulh, Chin ramkulh ah CDF nih SAC sakhan pathum an lak cang. Cu an lakmi hna cu Thantlang peng Lungler sakhan, Mindat peng Makui Ingnu khua palik sakhan le Suntaung khua palik sakhan hna an si. Lungler sakhan cu CNA le CDF-Thantlang nih September, 2021 ah an lak. Makui Ingnu sakhan ah palik 30 renglo an um i July, 2021 ah CDF-Mindat nih meithal puah hau loin an rak lakmi a si.
CDF-Mindat chimnak nawlngeitu Salai Hwa Awng nih “An bawipa cu khua chung a rat lioah kan tlaih. An sakhan cu kan kulh dih i nan hriamnam chia u, kan in that hna lai lo. Kannih Chin miphun cu zumhtlak kan si kan ti hna i cuticun an sakhan cu kan lak ko” tiah a chim. Suntaung sakhan zong palik nih an zamtak caah meithal puah loin an lakmi a si.
Karen Ramkulh, Karen ramkulh ah KNU nih SAC ralkap sakhan an lakmi hi a tlawmbik 12 a si lai tiah KNU nih an thanh. KNU nih an lakmi SAC ralkap sakhan hna hi Brigade 5 chung Papun pengkomh, Brigade 6 chung Dupalaya pengkomh le Brigade 3 chung Mone pengkomh ah a ummi an si.
Rakhine Ramkulh, AA nih SAC ralkap sakhan an lakmi hi a dihlak in 36 a si cang. Hi chungah Chin ramkulh Paletwa peng in sakhan 6 an i tel. A dang cu Rakhine ramkulh Maungdaw peng ah a ummi an si. AA nih an lakmi lakah Myanmar-Bangladesh ramri Maungdaw peng ah a ummi SAC tang ramri hngak ralkap sakhan kha a ngan ngaimi a si. SAC ralkap 19 an thih pinah hriamnam tampi an lak khawh. AA nih meithal puah loin an lakmi zong a um len.
Sagaing & Magwe Ramṭhen, Tlangcungmi hna hmunram ah SAC ralkap sakhan lakpiak an ton bantukin Kawl miphun an umnak le PDF an cawlcangh biknak Sagaing le Magwe ramṭhen zongah SAC nih an sakhan an sunghmi a um len. A zat tu cu fiangin theih a si lo.
Atulio Myanmar ram kong a hlathlaitu pakhat nih cun “SAC ralkap hna cu kah ding an ṭih tuk. Kahdohnak a um zongah kan sung lai ti an theih caah sakhan hme deuhmi cu an zamtak hna. Cun ralkap 10 hrawng an umnak sakhan ah ralkap 30/40 an chiahnak zong a um len. Cutikah hmundang ah minung an i deih ti lo.
A bik in Sagaing le Magwe ah sakhan hme deuh an zamtakmi a tam. Khatlei ah dohthlennak ralkap thiamnak, hriamnam le thazang an ṭhancho deuhdeuh tikah SAC ralkap nih cun khuapi le pehtlaihnak lam tlaih khawh lawng an i zuam cang. Khuapi he aa hlat deuhnak hmun paoh cu dohthlennak ralkap hna kuttangah a um dih cang” tiah a chim.
Kalewa-PDF Nih Masein Sakhan An Kah Caah Palik 7 An Thi, Meithal Zun 8 An Chuh Hna, Sagaing ramṭhen, Kalewa peng Masein khua palik sakhan pakhat cu Kalewa-PDF nih an kah caah palik 7 an thi i, meithal zun 8 an chuh hna, tiah theih a si.
PDF-Kalewa ralkap hna nih Masein khua palik sakhan cu September 18 zing sml 6:05 ah kan kah caah palik 7 an thi, a dang a thimi zong an um kho rih. Cheukhat palik pawl cu an hliamhma he an zam. PDF-Kalewa ralkap leiin a thimi le aa hliammi kan um lo. An sakhan cu mei in kan khangh i, hnu kan kir tiah PDF-Kalewa nih an langhter.
Cu kahdohnak ah G3 meithal zun 5, Uzi meithal zun 2, M79 zun 1, kutcheh bomb lung 3, 7.62 meithal kuan 297, Uzi kuan 149, cycle 125 4, pehtlaihnak seh 2, phone 13, Power bank 1, Laptop 1, phaisa bawm 2, tangka kyats 13,000, kutkhih cikcin tuah 2, suiṭhi 1, bag 1, zal 3, nam 1 le Equipment 1 an lak, tiah theih a si. Cu kahdohnak ah tualchung mi nu pakhat a nunnak a liam. PDF-Kalewa nih nu pakhat a nunnak a liam caah a chungkhar cu ngaihthiam an hal hna. Palik 7 a thimi hna chungkhar cu SAC nih tangka kyats 30,000 cio an pek hna, tiah theih a si.
Chin ramkulh, Falam ah Covid-19 runvennak kong ceihhmainak meeting an tuah, Chin ramkulh, Falam khua ah Covid-19 i runvennak khawhnak ding caah, nizaan September 19 chun sml 1 hrawngah, General Administration, meeting room ah meeting an tuah tiah theih a si.
Pengkomh chairman U Saw Htun Win nih hramthok bia a chim dih in, pengkomh uktu chang Duh-Bu-Hmu Win Zaw Latt, Palik bawi,(secretary)Moe Naing hna nih, covid-19 zawtnak kong le hi zawtnak hi zeitindah kan i runven awk a herh timi kong ah bia chimnak an ngei tiah theih a si.
Cu hnu ah, Falam Hospital uktu Dr. Tuan Cung Thang nih Covid-19 i thlopbulnak kong ah an cawlcangh ning kong a chim dih in, Township Administration chairman U kyaw Kaung nih covid-19 i runvennak caah rian a tuantu hna he i bawm cio dingin le tuanchuah rih dingmi kong ah i ceihhmai thannak ding kong a chim ve tiah theih a si.
Cu hnu ah, meeting a kaimi hna nih, covid-19 zawtnak i runvennak ding caah, Sianginn le Biakinn ah, covid-19 zulhphung le dingrep vial te zulh dih dingin an ceih hnu ah, pengkomh chairman U Saw Htun Win nih donghnak bia cah a chim i an meeting cu an dihter tiah theih a si.
Leave a Reply