Update News; Kan pasaltha hna le SAC ralhrang an i phomh cuahmah lio a si!!

Hakha Peng Thawngpang!!
================
Zahan November 1 Zan Ah Hakha Palik Sakhan Ah Kahdohnak A Chuak, Chin ramkulh, Hakha palik sakhan ah nizan November 1 zan ah kahdohnak a chuak, tiah theih a si. Tualchung mi pakhat nih, “Zahan November 1 zan sml 8:45 ah palik sakhan in kahdohnak thawng a chuak. Kan lau tuk caah kan i thup dih. Caan tlawmpal cu pehtlai in meithal thawng a thang,” tiah The Chin Post ah a chim.
Cu kahdohnak ah SAC ralkap le palik a thimi aa hliam mi an um le um lo theih khawh a si rih lo. Crd-The Chin Post

Timit lei ah chunnitlak ti awk in an i kap,tuzong hi Halkha ralhrang nih bom ngan in Timit lei an vun kah uahmah ko rih.
Kan cah cia hna bang khan,Timit lei kan ralkap hna caah thlacam ngol hngin hlah usih.. Rungtlang in Zokhua lei kal mengli zawn hrawngah bom apuak cuah mah ko. Ralhrang hrocer nak si kho men an ti .Chinland ralkap nih Hakha le Gangaw kar lam chikkhat an phih khar chung.Tuhi Timit lei ah an i kah lio si i, kan ralkap hna an him le teinak an hmuhnak hnga thlacam cio usih. Share khawh si. Crd-Salai Williams Hlawnceu

Assam Rifles Nih Myanmar Rammi 4 An Tlaih Hna, India, Mizoram ramkulh, Siaha pengkomh Tuipan khuapawng ah Assam rifles nih myanmar mi 4 cu Kenbo 125 cycle pakhat le hriamthil he ai pehtlaimi thilri he October 30 ah kan tlaih hna tiah cathanh an chuah. A luancia October 26 ni zong ah Siaha pengkomh Niawhtlang khua pawng Myanmar ramri ah Kenbo cycle he hriamthil a phurtu Myanmar rammi 4 cu Assam rifles nih an rak tlaih bal cang hna.

Rakhine Ramkulh Thandwe Ah SAC Ralkap Bomb Puahhnawh An Tong, Ralkap 13 An Thi, Rakhine ramkulh, Thandwe(သံတွဲ) peng le Taungkauk peng kar Thetkepin(သက်ကေပြင်) khua pawng Thadwe-Yangon motor lampi ah rallam a sialmi SAC ralkap cu nizan November 1 zinglei ah AA nih bomb an puahhnawh hna caah SAC ralkap 13 an thi, tiah theih a si. SAC ralkap 30 hrawng cu ke in rallam an sial i, Taungkauk peng in an chuak i Thetkepin le Ywapakar(ရွာပကာ) khua karah bomb in kan puahhnawh hna caah ralkap 13 an thih hi a si, tiah theih a si.

SAC ralkap bomb puahhnawh an ton ruangah pawngkam khuate um cheukhat cu an zam. SAC ralkap pawl cu khuate ah an lut i khuami cheukhat zong an tlaih hna i bia an hal hna, tiah min langhter a duh lomi pakhat nih a chim. A luancia October 26- 31 tiang AA le SAC ralkap kar kahdohnak ah AA nih SAC ralkap 24 kan thah hna pinah 26 nak tlawm lo hlaimhma an pu, tiah nizan November 1 ah AA nih cathanh an chuah tiah theih a si.

Kahdohnak A Chuak Sual Lai Ti An Phan Caah Paletwa Peng Khuate Pathum Um Mipi An Zam Dih , Chin ramkulh, Paletwa peng ah AA le SAC ralkap kar kahdohnak a zual ngaingai caah Paletwa peng khuate 3 um khuami hna cu an zam dih, tiah mi bawmchantu pastor pakhat nih a chim. “Zeitik ah dah kahdohnak a chuah lai ti chim khawh a si lo. A zammi khua 3 hna cu AA ralkap le SAC ralkap an umnak he naih teah a ummi an si caah a hlan kan in an zam chungnak a si,” tiah a chim chap.

Tharyarkone, Kyaukpala le Sattharlawa(ဆပ်သာလ၀) khuami inn 90 hna cu Miza khua ah an zam i milu in 350 leng an si. Church min in kan kuatmi hna hi kyats sing 10 hrawng lawng a si. Chungkhar an tam caah an i za lo, a tlawm bik sing 100 leng paoh cu a hau lai, tiah pastor pakhat nih a chim. Paletwa peng ah AA le SAC ralkap kahdohnak a chuah ṭhan caah tualchung mi hna cu Paletwa khua chungah a zammi zong an um. Ralhrial in Paletwa khua chungah aa dormi hi 5,000 leng an si cang, tiah theih a si.

Hakha Ah Ni 13 Chung Mei A Rawh Caah Meilul (Phazawngdan) Le Meihol A Dih Cang , Chin ramkulh, Hakha ah mei a rawknak ni 13 a si cang i, meilul (pha zawng dan) le meihol a dih cang, tiah theih a si. Hakha dawr kip ah meilul kan kawl i cawk awk a um ti lo, an rak cawk dih cang. Hakha dawr ngan bik Pearl Store zong ah a um ti lo. A man zong a kai ngaingai i minung pakhat nih voikhat cawk ah bawm tam pipi in an cawk, tiah theih a si.

Mei hi caan sau nawn a rawk rih kho menmi a si tiah thawngpang a len caah cheukhat cu solar le battery an i cawk cio hna. Mi sifak deuh nih meilul bawm khat hnih te kan i cawk i, cu hmanh cu a dih cang. Meihol cawknak chinchin cu a har ngaingai ko, tiah tualchung mi pakhat nih a chim. Hakha ah Kawl leiin a ra mi meihol tunkhat ah kyats 15,000 le Lai meihol a tlawm bik kyats 18,000 a phan nain cawk ding a um ti lo. Meilul hi bawm khat ah kyats 1,500 in 2,000 kar a phan, tiah theih a si. Crd-The Chin Post

Be the first to comment

Leave a Reply

Your email address will not be published.


*