Pinlebu ah ni 12 chung kahdohnak a fak tuk ii khaphni a thi mi an tam ; Sagaing pengkulh Pinlebu ah ralhrang le Mipi ralkap karlak ah ni 12 chung kahdohnak a chuah ii ralhrang lei ah ralbawi pakhat tel in minung 40 hlei an thi tiah RFA nih a hlat in an theih. Ralhrang lei nih an kan kah hmasa ii March 29 in aa thawh ii April 9 tiah ni 12 chung kahdohnak ah ralhrang lei nih vanlawng in an kan kah tiah Mipi ralkap biachimhnak nawl ngei tu nih RFA ah a chim.
Pinlebu ramthen ah KIA le PDF phukomh nih sakhaan an tuah lio mi kan theih ii Hmunhma caah security kan tuah mi a si tiah ralhrang bia chimnawlngei Zaw Min Thun nih RFA ah a chim. Ralhrang lei nih an thanh nak ahcun hriamnam tak tuk kan lak piak khawh hna tiah an chimh.
Mah kahdohnak ah khaphnih in ritsi hna kan tlaih chih tiah an chimh cio. Mah kahdihnak ruang ah Pinlebu ramthen um mi khua 10 ii minung 2000 hlei nih khua kan zam tlak tian khua mi nih an chimh. Khua pakhat ah namtei hliam in a thi mi pa pakhat kan hmuh tiah PDF nih an chimh.
Relcap; Myanmar Boxing asi mi TooToo an tlaih ; Myanmar Boxing thawnghthiam TooToo tel in pa 6 cu Magwe pengkulh ah April 11 ah an tlaih hna tiah TooToo he an neihniam mi nih Irrawaddy ah an chimh.
Mah an tlaihnak kong cu tha tein theih fiang a si rik lo nain , TooToo an tlaih khawh in Magwe pengkulh um TooToo chungkhar an um nak inn lei zongah an rak kawl tiah TooToo aa theih mi pakhat nih a chimh.Ralhrang nih mi lem sawi nak caah Media ah an langhter mi cu , Too Too tel in pa 6 cu hriamnam ngan le bomh 2 he Magwe pengkulh Restaurant pakhat ah kan tlaih hna tiah an langhter.
Mynmar Boxing thawnghthiam Too Too cu Middleweight World Boxing Champion pakhat a si ii ralhrang nih uknak an lak khwh in hramhram uknak a duh lo caah Revolution a tuah ve mi pakhat a si.
Thawngdang; Natchaung Khua Chungum fimcawnnak private sianginn telh in Ralhrang minung um bak inn 100 tluk rakhrang nih mei an khangh !
Kalay peng, Kalay-Gangaw kalnak motor lampi cungah a ummi Natchaung khua chungum Private Sianginn telh in minung umnak inn 100 tluk cu rahrang ralkap nih April 11 ah khan mei an khangh tiah kan theih.
Thawngdang; Mawlamyine, Tanhsae Phakanh le Mandalay ramṭhen, Nganzun ah ralhrang ralkap kahdoh an tong i, ralhrang ralkap 13 hrawng an thi; hliam tuar zong an tam, tiah theih a si. Mon ramkulh, Mawlamyine peng Kyaitkha milampi ah a um mi ralhrang ralkap umnak no.565 sakhan cu Mawlamyine peng mizapi vengtu ralkap hna nih nihin April 11, zinglei suimilam 4:40 hrawng ah an kahdoh hna. Cu kahdohnak ah cun SAC ralkap 2 an thi i, hliamtuar zong an tam, tiah theih a si.
Cun, Sagaing ramṭhen Tanhsae peng, Moekhuah khua le Thanpinsait khua karlak April 10, zaan suimilam 8:30 in zaan suimilam 11:30 tiang SAC ralkap le mizapi vengtu ralkap hna cu an i kap i, SAC ralkap 11 an thi. Cu kahdohnak ah cun Tanhsae-PDF battalion 6,7 le TCP Mizapi ralkap phufonh an i bawm, tiah theih a si.
Kachin ramkulh Phakanh peng April 10, zaan suimilam 10:00 hrawng ah Phakanh Uruh Yadana hleidonh(ဥရုရတနာ) ah SAC ralkap nih security an hngahnak gate pawng ah puahkehnak a chuak i, puahkehnak a chuah tlawmpal ah kahdohnak a chuak ṭhan. Hi kahdohnak ah hin SAC ralkap 3 hliam an tuar, tiah theih a si.
Homalin Le Phawngpin Aa Pehnak Ah SAC ralkap Le PDF Kahdohnak A Chuak, Sagaing ramṭhen, Homalin le Phawngpin peng aa pehnak ah April 8 le 10 ah SAC ralkap le pyituhsit pawl cu Homapin PDF (HPDF)nih bomb an puah hnah hna i SAC ralkap 5 an thi, tiah HPDF nih an thanh . Nihin April 11 zing ah Taungkungthar(တောင်ကုန်းသာ) pawng ah rallam a sialtu SAC ralkap hna cu Homalin PDF nih bomb puah ṭhan an timh hna nain nikhua a chiat deuh ruang ah kutser meithal lawng in an kah hna.
Kahdohnak ah hin SAC ralkap lei nih hriamngan in an kah ve hna nain Humalin PDF pawl cu hliamtuar um lo tein hnu an tolh kho ṭhan, tiah theih a si. Magway ramṭhen Natmoh(နတ်မောက်) peng ah a um mi PDF sakhan pakhat cu SAC ralkap 40 fai nih an lak i king cawng mi PDF pakhat a nunnak liam lengah pakhat hliam a tuar, tiah theih a si.
Yinmapin Peng Banhboitaanzin Khua Inn 17 SAC Ralkap Nih An Khangh Ṭhan, Sagaing ramṭhen, Yimapin peng Banhboi khuakomh Banhboitaanzin(ဘန့်ဘွေးထန်းဇင်) khua ah SAC ralkap le pyosawthi 20 hrawng nih nihin April 11 zing Sml 9:30 ah inn an khangh i, inn zuat saṭil zong an khangh chih hna pinah khua mi hna cu an tukvelh hna, tiah tualchung mi nih an chim. SAC ralkap nih an khangh mi ah hin inn 17, facang, cawkawm, motor cycle 10, vok 30 hrawng le cawtum 2 an i tel i, motor cycle 5 cu an i lak tiah tualchung mi nih an chim. SAC ralkap pawl cu chunhnu Sml 2 hnu ah khua chung in an chuak, tiah theih a si.
“SAC ralkap pawl hi February 25 ah khan Banhboi Ywamah khua ah umhmun an khuar i, Banhboi Ywamah khua le Banhboitaanzin khua hi motor lam lawng nih a dan. SAC ralkap an luh bak in ramlak ah kan zaam hna i atu tiang kan um rih ko,” tiah tualchung mi pakhat nih Mizzima ah a chim. Atu tan an khangh mi he hin cun avoi 3 nak a si cang i, March 16 zong ah khan inn 14 le March 18 ah inn 3 an rak khangh. Nihin April 11 ah inn 17 an khangh ṭhan.
Banhboitaanzin khua hi inn 400 fai umnak a si i, khua mi hna cu anmah he aa naih deuhnak khua ah an zaam i, a cheu cu ramlak ah an zaam caah eidin kong ah harsa ngai in an um, tiah theih a si. Yinpapin peng in meng 15 aa hlat nak Yagyi-Kalay lam kam ah a ummi Banhboi khuakomh a si mi Banhboi, Banhboi letpaan, Banhboitaanzin le Banhboi nitlak lei khua hna cu naih tete in a um mi an si.
Kutser Bomb Puah Sual Ruang Ah CDM Palik Pakhat A Nunnak Liam! Ayeyawady ramṭhen ah kutser bomb test-nak ah bomb test mi cu a puak sual i CDM Police Defense Force (CPDF) in minung pakhat cu April 11 ah a nunnak a liam, tiah Pathein Western Defense Force(P.W.D.F) sin in theih a si. A thi mi pa hi CDM palik Taw Zin Soe(သော်ဇင်စိုး) Kohkoi(ကောက်ကွေး) a si i, a rianṭuannak hmun cu Pathein peng Tinbawgin(သဘော်ကျင်း) palik sakhan ah a si. 2021 March 23 ah khan CDM a tuah, tiah theih a si.
“Kan ṭuanpi hawi CPDF in Kohkoi cu bomb a test-nak ah bomb nih a puah sual i a nunnak a liam caah upat peknak kan tuah i, Federal Democracy kan hmuh hlan lo SAC kan doh peng lai,” tiah biakamnak an tuah. Taw Zin Soe ruak cu nihin April 11 zing ah Ayeyawady ramṭhen hmunkhat ah phum a si, tiah theih a si. Pathein Western Defense Force (P.W.D.F.) nih an social cahmai in April 11 zaan ah an ṭuanpi hawi Taw Zin Saw thihnak ah an ngaihchiahnak an langhter.
Rakhine ralkap AA nih Chin ram Paletwa ah uknak lei suaisamnak a ngeih mi kong he pehtlai in Khuami pawl tihphan thalonak a pek hna tiah Tanlwin Times nih a lenghter. Paletwa nitlak lei kam, Pii Chaung le Peletwa thlang lei hna ah Rakhine ralkap AA nih an herh ningin tuanvo lak dingah khua khat ah minung pali in tuanvo a pek hna tiah theih a si.
” kan mah khua ah tonbiaruahnak an ngeih hnu ah tuanvo an kan pek. Kan tuan duh lo zongah khirh a ngah lo caah kan tuan mi a si. A tu bantuk in tuanvo an kan pek hlan zongah khua khat ah fancang tun khat le tangka tingkhat cio in an kan hal i kan pek hna ” tiah Pii Chaung khuami pakhat nih Tanlwin Times ah a chim.
Cu lengah an kan fial mi kan tuah piak hna lo cun khua nu khua pa pawl an kan hrem i ruapum ( 3000) an kan hau ter tiah a chim chap. Chinram Paltewa pengah khua (400) hrawng a um i, Paletwa khuapi cung lei, nitlak lei ah a um mi khau te Kuan Boh, Kywat Pyain Dawngh , Tee Ma Chaung Cua Taung, Cawng Chaung, Ping Ne Ta Pin tibantuk khua hna ah AA nih uknak suaisamnak a tuah i klhua te (100) hrawng ah ukank suaisamnam nak a tuah tiah theih a si.
Chinram Paletwa ah Rakhine ralkap AA pawl an rak um hi 2015 in a rak ssi cang. AA ralkap pawl hi Chinram Paletwa aah minung 5000 hrawng an um lai. A tu bantuk in khuami pawl facang an hal nak kong he peh tlaiin AA in chimnak nawl ngei tu Khaing Tuh Kha cu TanLwin Time nih pehtlainak a tuah peng ko nain a pehtlai kho lo tiah theih a si.
Leave a Reply