Update; Kan Chin Ramkulh Tualchung Thawngpang Vun Theih Cu Dah E!!

Kan Chin Ramkulh Tualchung Thawngpang Fonh!!
==================
Chin ramkulh, Matupi ah a phan tharmi SAC ralkap hna nih hramhram in mipi umnak inn an baoh i, thilri zong atu le tu an kan firpiak, tiah tualchung mi nih an chim. Lawngvang sang ah SAC ralkap hna nih atu le tu tiin khual cazin checknak an tuah i, an phaknak inn kip ah an zuat mi Ar an hmuh ahcun hramhram in an tlaihpiak hna, tiah tualchung mi nih cun an chim.

“SAC ralkap hna nih khualtlung cazin an check pah ah Ar le sa an hmuh ahcun zei bia hmanh chim lo in an i lak, zu he i meh ding ah kan sa hi an kan lakpiak a si ko lai, an duhmi poh an mah nawl in an lak caah mipi lei zong nih minung hmuh in an hmuhlonak hi a si ko,” tiah tualchung mi pakhat nih a chim.

Matupi ah SAC ralkap nih an duhning poh in nawlpeknak thawng an thanh nain, mipi lei zong nih SAC ralkap hna cu misual phu hmuh in hmuh a si cang caah mipi lei in SAC ralkap nawl zulhnak a tlawm, tiah theih a si.

SAC ralkap le tualchung hriamtlai phu kar kahdohnak a chuah ruang ah ralhrial dirhmun a phanmi; Chin ramkulh thlanglei Kanpetlet ah har tongmi minung 5000 leng nih angki lum le puan lum an herh ngai, tiah tualchung mi hna le ralzaam bawmhnak a petu hna nih an chim.

“Lai tlang ah cun a kik tuk cang, zaan ahhin a kih a zual i ralhrial dirhmun a phanmi hna nih angki lum le puan lum an ngeih lo caah atu lio ah cun hihi an harsat biknak a si. Cun, facang, chiti, cite le riahbuk cungcih, sii-ai le ngandamnak lei i zohkhanhnak zong kan herh ngai,” tiah bawmchantu hna nih an chim.

Kanpetlet peng in ralhrial dirhmun a phanmi minung 5000 leng cu Htankung ralzaam i dornak sakhan, Aukhle(အောက်လှယ်) ralzaam i dornak sakhan le Magway ramṭhen Saw peng ah chung Angyiakatin(အညာကတင်း), Bikung(ဘီကုန်း) ralzaam umnak sakhan hna ah an i dor i cheukhat cu an umnak khua pawnghrawng zong ah an i dor hna, tiah tualchung mi hna nih an chim.

SAC ralkap nih hramhram uknak an lak hnu; kaphnih kar kahdohnak ruangah Chin ramkulh ah ralzaam dirhmun a phanmi sing khat leng an phan i, ramchung ah ralhrial dirhmun a phanmi hi minung 60,000 reng lo an si. India, Mizoram ramkulh ah ralzaam dirhmun a phanmi hi minung 50,000 hrawng an si cang. SAC ralkap nih hramhram uknak an lak hlan ah cun Kanpetlet pengchung ah minung 20,000 in 30,000 kar an um, tiah theih a si.

Chin ramkulh, Hakha STRAIT HALL ah nizaan November 7 ah Fidi Veterinary Supplies and Services nih saṭil zuatkhalh ningcang cawnpiaknak an ngeih hna, tiah theih a si. “A bik in Meheh, Vok le Ar zuatkhalh ningcang kan cawnpiak hna, cawnpiaknak ah a dihmi cu Aidii nih bawmhnak a kan pek cawnpiaknak a kaimi dihlak hi minung 20 an si,” tiah saram sibawi Salai Bawi Cung Ceu nih The Chin Post ah a chim. Fidi Veterinary Supplies and Services nih cun Hakha peng chung ah Vok 200 renglo raikhamsi an chunhpiak cang hna.

Magwe ramṭhen Htilin khua in aa thawhmi SAC ralkap, ke in a kalmi hna cu nihin November 8 chun suimilam 12 hrawng ah Chin ramkulh Mindat peng Lungtti khua an phan, tiah theih a si. SAC ralkap cheukhat cu Thahlin khua le Tawzawng khua kar ah hmunhma an lak i Thahlin, Tawzawng, Thahpankong khua le Wattat khua mipi hna cu ralring tein um ding in tualchung hriamtlai phu nih ralrinnak an pek hna.

Chin ramkulh, Hakha peng ah vok zawtnak phunkhat a chuak i, vok tampi zong an rak thi cang. Fidi Veterinary Supplies and Service phu nih vok raikhamsi chunh hram an thawk i, atu ah cun vok 200 tluk cu raikhamsi an chunh khawh cang hna. Cu vok raikhamsi chunhnak man ah cun vokkhat ah kyats 4,000 an pek hna, tiah theih a si. Saram sibawi pakhat nih cun, “Hi vok zawtnak hi, cu zawtnak cu a si ko tiin a min chim a har ngai nain an zawt ning zoh tikah swine fever zawtnak a lo bik ko,” tiah a chim.

Nihin, Sikpar 8 ah Hakha le Nipi kar a rawkmi meitung an remhmi cu 75% an lim cang tiah theih a si.Meitung a rawkmi hi Sikpar 4-8 tiang, ni(5) chung an remh cang i 75% an lim cang tiah țuanvo ngeitu upa hna sin in theih a si. Tutan meitung remhnak ah a herhmi thilri hna cu Nipi, Bualtak le Zokhua khuami hna nih an phorh piak hna tiah theih a si.

2022 November 7, Timit kuanghrawn ah vanlawng in a kah hna hnu, Hakha khuachung lamruk tonnak SAC Gate ah ralhraang nih ningcang lo in meithal le bomb an puah ca ah khuami Pi Far Can (Kum 60 fai) cu fak ngai in hliam a tuar tiah theih a si. Khuami pakhat nih, “Meithal le bomb thawng kan theih hi suimilaam 8:00PM hrawng ah a si. A thawng a thang mi a tam ngai. Ralhraang an zurit le lau lung in puah mi a si lai tiah kan zumh,” tiah THP ah a chim.

Nihin zong ralhrang nih Timit pawngkam ah a um mi CNA le CDF ralkap hna cu raltuknak vanlawng in bomb voi thum a thlak hna nain rammi ralkap tu cu an him dih tiah kan theih. Pi Far Can hi a liang ah an khen i a tu hi thlopbul ding in an tawlrel cuahmah tiah theih a si.

Aizawl Pawng Ah Petrol Phortu Motor Aa Leh Ruang I Meikaang A Chuak Mi Ruangah Minung 9 Nunnak A Liam Cang! India, Mizoram ramkulh Aizawl khuapi pawng, Tuirial ah a luancia October 29, chunhnu suimilam 2:30 hrawng ahkhan petrol phortu motor cu a rak i let i, zanlei muika hrawngah mei kanghnak a rak chuak. Cu meikaang hliamhnak ruang ah cun nihin November 8 tiang nunnak liammi minung 9 tiang an phan cang, tiah theih a si.

Petrol phortu motor a leh caah a tle-bua mi petrol hna cu a pawngkam um mi hna nih an i donh cio i, cu lio zaan suimilam 6:00 hrawng ah ruah lo piin mei a rak chuak, tiah theih a si. Mei a chuah ruang ah a hmun ah pa 3 le nu 1; minung 4 cu an nunnak a rak liam i minung 15 hrawng cu mei hma in siizung an rak phan. Cun meikanghnak pawng ah ummi taxi pakhat le cycle 3 zong an rak kaang chih.

Cun, November 2 ah meihma tuar ruang i siizung phanmi pa 2 le November 3, 6 le 8 ah minung pakhat cio tiin an nunnak a liam ṭhan caah nunnak a liammi dihlak hi minung 9 an phan cang. Meihma ruang ah siizung a phanmi hna chung in a hmaa fak ngai mi zong an um rih, tiah theih a si. Petrol phortu motor nih cun Rupees sing 20 man; petrol litre 22,000 a phorh, tiah theih a si.

SAC ralkap hna nih an hman i atu le tu a rawk lengmang cang mi A-5C raltuknak vanlawng hlun cu raltuknak ah hmang in bomb thlaknak a tuah, tiah vanlei ralkap thawngthanhnak a tuahtu hna sin in theih a si. China ser Nanchang A-5C Fantan cu atu le tu a rak tla i a rawk tawn, oil a ei tuk leng ah remh ding ah a thilri a har tuk caah hman lo in an rak um tawn nain, nai chung hrawng ah cu raltuknak vanlawng cu an hman ṭhan i ramchung ah bomb thlaknak an tuah, tiah theih a si.

“A-5 vanlawng hi hman lonak caan a sau cang, a tlak le a rawh zong a tam leng ah oil a ei tuk caah hman lo in an chiah i a hlun tuk cang nain, atu cu vanlei ralkap thazaang an chap caah cu vanlawng cu an hman ṭhan” tiah vanlei ralkap thawngthanhnak lei nih an chim. China serchuahmi A-5C raltuknak vanlawng cu Myanmar ramchung ah 30 leng a um rih tiah theih a si.

“A-5 raltuknak vanlawng hi tampi a um; rampi huap in 30 leng a um. Tada Oo ah cu vanlawng cu 4 lawng a um cang. Nanchang A-5C Fantan cu a ṭhing ngai cangmi a si nain, raltuknak ah an hmanter hna” tiah an chim. Dohthlennak kumkhat fai a kal hnu ah SAC ralkap lei nih raltuk ningcang an thlen i, vanlei thazaang an ṭhawnter. Dohthlennak tuahtu mipi ralkap hna cu vanlawng in bomb an thlak hna i kahdohnak a tuah, cunglei in ramchung a ummi vanlawng dihlak cu hmannak nawl an pek hna, tiah theih a si.

Tukum February 16 ah Sagaing ramṭhen, Yemyaitkyi ah China serchuah Nanchang A-5C Fantan raltuknak vanlawng cu a rak tla i vanlawng khaltu zong a nunnak a rak liam. Nanchang A-5C Fantan raltuknak vanlawng cu 1970 kum hrawng ah rak sermi a si. United Kingdom Minister of State for Trade Policy, Greg Hands cu chawlehnak kong he pehtlai in tuzarh chung ah Taiwan a tlawng lai i President Tsai Ing-wen he an i tong lai, tiah theih a si.

Greg Hands cu Taiwan President Tsai Ing-wen he tonnak an ngeih dih hnu in UK- Taiwan chawleh chawhrawlnak ceihhmainak an ngaiṭi lai. UK nih Taiwan he chawlehnak tam deuh tuahṭi ding in bia a rak kamhmi cu a tak in kan ṭuanchuah lai ti langhter duhnak ah a si, tiah Greg Hands nih cun a chim.

Taiwan cu UK he palai pehtlaihnak an ngei lo nain chawleh chawhrawlnak ah ramhnih kar i theihthiamnak he rian a ṭuanṭi mi an si. China nih Taiwan ah nitlak lei ram hruaitu hna cu tlawng lo ding in a kham len nain nitlak lei ram hruaitu hna cu atu le tu Taiwan an rak tlawng hna.

Sagaing ramṭhen, Wetlet peng Shinmaka khua cu hramhram uknak latu SAC ralkap nih 2022, November 7 zaan ah hriamngan in an kah caah minung 6 khuasa chhungkhar pakhat inn ah cu hriamngan kuan cu a tla i nau pawi lio nu pakhat a nunnak a liam i, minung 4 hliamhma a pu. Hriamngan tlaknak innchungkhar ahhin kum 7 ngakchia pakhat lawng a him, tiah theih a si. Hliamhma tuarmi hna chung ah kum 60 tluk upa pakhat le kumkhat fai lawng a simi ngakchia hna cu an hliamhma a fah deuh caah an nunhimnak ca ah thinphang a si ko, tiah theih a si.

Sagaing ramṭhen, Tanhse peng ah rallam a sialmi SAC ralkap Khah-Lah-Yah 368 cu nizan November 7 zinglei sml 8 hrawngah Tanhse-PDF nih hriamngan in an kah hna i 5 an thi. Tanhse peng Inye-Oo khua in Inpa-ai khua lei ah rallam a sialtu SAC ralkap hna cu Shwebo pengkomh PDF brigade 6, battalion 7 ralkap hna nih 60 MM hriamngan lung 6 in an kah hna, tiah theih a si.

Vawleicung minung thong tampi nih an hmanmi Facebook ngeitu Meta Company nih a rianṭuantu minung tam ngai cu an rian in dinhter a timh hna, tiah US thawngzamh cheukhat nih cun an ṭial. The Wall Street Journal nih a tar ning ah cun Meta nih a rianṭuantu minung a thong renglo an rian in dinhter a timh hna. Kum 18 chung ah Meta company nih a tam bikmi rian dinhternak a si, tiah a tar.

A ra lai mi cawn nithum ni thawk in rian dinhter an si lai, tiah ruah a si i Meta company lei nih cun chimfiannak a tuahmi a um rih lo. A luancia caan zeimawzat chung ah Technology company a simi Twitter, Microsoft, Lyft le Strip hna zong nih an rianṭuantu zeimawzat cu an rian in an rak dinhter cio hna. Social Media Platform Company hna cu a hnu ah a rak chuakmi Tik Tok le Snapchat Company in zuamcawhnak fakpi an tong. Atu lio vawleicung mirum bik Elon Musk zong nih Twitter Company a cawk hnu tlawmpal ah rianṭuantu zatceo cu an rian in a rak dinhter hna. Crd-TCP

Be the first to comment

Leave a Reply

Your email address will not be published.


*