Timit chehvel thlakhat chung kahdohnak ah SAC ralhraang lei thi mi tam, mipi ralkap lei hliamtuar tam ve
=========
Hakha le Thantlang karlak Timit chehvel hrawng Chinland Ralkap CNA, CDF hna le SAC ralhrang cu thlakhat fai chung an i kap cang i, hi kahdohnak ah SAC ralhrang ralkap bawizik hna telh in a thi mi le hliam a tuar mi an tam I, kanmah Chinland ralkap lei zong in hliamhma a pumi an um pah ngai tiah thawng theih a si.
SAC ralhrang hna hi Kalay in an rak kai i, Falam le Hakha kar ah CNA le a tangti hawikom hna nih ceilak an phomh hna hnu Hakha an phak in Timit hlei remh ding in 2022 July 26 ahkhan an kal. July 30 in Chinland ralkap hna he an i kap i, nihin tiang kahdohnak aa din rih lo tiah theih a si.
Hi kong he pehtlai in ralram a ummi pakhat nih, “Tutan kan I kahdoh caan hi a sau ngai. Thlakhat fai chung kan i kap cang. Hi kan I kahdohnak chung ah SAC ralhrang lei a nunnak a liammi le hliam a tuar mi an tam. Kanmah lei zong in minung pakhat nan theih bang in zahan zaan August 25 ahkhan hriamngan in a nunnak a liam. Cun, hliam a tuar mi zong hi kan um pah ngai hna. Nihin tiang kahdohnak hi kan I din rih lo. Nifatin tein I kah le I doh peng a si ko,” tiah CNN ah a chim.
Tutan Timit chehvel kahdohnak ah Chinland ralkap lei nih SAC ralhrang meithal siseh, kuan siseh, an thilri, an tangka zeimawzat le thil a dangdang an laak khawh mi zong a um pah tiah theih a si. Timit chehvel kahdohnak zeimawzat a vun chuah hnu ah ralram um SAC ralhrang an thazaang a der deuh cang ca ah Hakha hrambunh 266 ralkap sakhan in hriamngan 120 le 122 MM in an bawmh hna tiah mizapi sin in theih a si.
Nizan Timit kuang kahdohnak ah SAC ralkap 10 hrawng an thi i, CDF-Hakha in chungtel pakhat a nunnak a liam ve, tiah CDF chungtel hna sinin theih a si. “Timit in kehlei kam a sancemnak tlang ah ralhrang an rak kai i 11:00am in kahdohnak ai thawk. Chum a zaam tuk ruangah ralhrang pawl hmuh khawh an si bak lo.
“11:10am hrawngah ralhrang lei RPG kuan cu kan hawile umnak bak ah a tla i, Hakha in kan hawipa pakhat a nunnak liam. 1:30pm tiang ah kahdohnak a dih rih lo. “Ralhrang pawl nih tlang a sancemnak hmuhma an kan chuh khawh! Ralhrang lei hriamnam i in awk a that ti lo ruangah kan hawile hnu ah an pil. Ralhrang lei in 10 cung cu an thih lai zumh a si. CDF-Hakha in pakhat a nunnak liam i pahnih hliamhma an pu,” CDF-Thantlang chungtel pakhat nih a kan thanh.
Kyunhla Peng Komesi Khua Cu SAC Ralkap Nih An Khangh, Tualchungmi 3 Ralphaw Ah An Tlaih Hna, Sagaing ramṭhen, Kanbalu pengkomh Kyunhla peng Konesi khua cu nizan August 25 ah SAC ralkap 180 hrawng cu an lut i umhmun an khuar tiah theih a si. Cu SAC ralkap hna nih cun nihin August ni 26 zinglei suimilam 7 hrawng ah khua cu an khangh, cun tualchungmi 3 cu ralphaw ah an tlaih hna i an i kalpi hna, tiah Kanbalu peng mipi ralkap chungtel pakhat nih a chim.
Konesi khua cu inn 60 hrawng a ciam, tiah theih a si. Atu tan an khangh hi a voihnihnak a si, a voikhat an rak khangh ah inn 7 a rak ciam cang, cu lawng si loin phungki sianginn ah an chiahmi thilri hna cu an hrawh, mawtaw le cycle pawl zong an khangh, tiah tualchungmi nih cun an chim.
Mizoram Chung in Zarhkhat Chung ah Rithaisi Bing Rupees sing 169 Man Leng Tlaih a Si!: India, Mizoram ramkulh hmunkip ah tuzarh chung lawng ah rithaisi bing 3kg a ritmi, Rupees sing 169 man leng (sing 5070 mmk leng) kan tlaih, tiah rithaisi khamtu nih cathanh an chuah.
Cun, tukum 2022 January thla in August 24 tiang bing/riathaisi hmannak ruang ah pa 22 le nu 1 an nunnak a liam, tiah theih a si. A luancia 2021 kum chung ah rithaisi hman ruang ah pa 39 le nu 8, an dihlak minung 47 an nunnak a rak liam, tiah theih a si. Tuzarh chung lawng ah Mizoram chung ah rithaisi bing a phortu Myanmar mi minung 6 tlaih an tong cang.
Demoso Peng Nihnih Chung Kahdohnak Ah SAC Ralkap 5 An Thi, Hliam Tuar Zong An Tam, Karenni ramkulh, Demoso peng Ngwetaung khuathar pawng Karenni Revolution Union (KRU), Demoso-PDF le SAC kar August 24 in 25, nihnih chung kahdohnak ah SAC ralkap 5 an thi, hliamtuar zong an tam, tiah KRU nih cathanh an chuah.
August 24 kahdohnak ah SAC ralkap 5 an thi i, August ni 25 zinglei suimilam 11:15 hrawng ah kahdohnak a chuak ṭhan. SAC lei hliamtuar zong an tam, a thimi zat tu cu aa fiang rih lo, tiah KRU nih an cathanh ah cun an langhter. Nihnih chung kahdohnak ah tualchung hriamtlai phu lei hliamhma tuar um lo in hnu an tolh kho ṭhan, tiah theih a si. Kahdohnak a chuahnak pawng khua hna cu zeitik caan paoh ah kahdohnak a chuak \han khomi a si caah a himnak ah zaam dingin ralrin peknak zong an langhter chih.
Tamu ah CDM a Tuahtu Siangcachim sayamah Pakhat Amah le Mah Aa That! Sagaing ramṭhen, Tamu khuachung Zayṭan no. 10 sang ah a ummi kum 30 tluk CDM a tuahtu siangcachim sayamah pakhat cu nihin August 26, zaanlei suimilam 4:00 hrawng ah, a umnak inn ah hri-awh in a nunnak ai la, tiah theih a si.
Siangcachimtu nu cu nihin August 26 ah biaceih zung ah a pasal he ṭhennak an tuah i, inn a phanh ah atu bantuk in a nunnak ai la, tiah theih a si. “Naith-ban-lan” (နိဗ္ဗာန်လမ်း) mi bawmchantu phu hna nih sizung ah kalpi in an thlop lio ah a nunnak a liam, tiah theih a si.
Sagaing Ramṭhen, Monywa Peng Layzin Sanpiah Khuami 3 Cu SAC Ralkap Nih An Thah Hna! Sagaing ramṭhen, Monywa peng Layzin Sanpiah(လယ်ဇင်စံပြ) khua cu nihin August 26 zinglei sumilam 5:45 minute hrawng ah SAC ralkap nih luhhnawh in khuami 3 an thah hna, tiah tualchungmi hna sin in theih a si. Tuzing suimilam 5:45 minute hrawng ah SAC ralkap cu an rak lut i khuami 2 cu mei in an khangh hna, cu hnu ah U Aung Chit timi pa cu an tlaih i an hrem hnu ah nam in an sawh i an thah.
Mei in an khanghmi 2 hna tu cu an muihmai a rawh dih caah aho an si cu kan thei kho rih hna lo, tiah an chim. A luancia 2021 December thla chung zong ah ralkap pawl cu an rak lut i, Ko Ye Yar Lin, Ko Thein, Ko Htun Oo le Ko Bone hna cu an tlaih hna i an rak thah hna, tiah an chim chap.
Paletwa Ralzaam Hna Caah World Food Programme(WFP) Nih Bawmhnak Pekmi Facang Tun 2,000 Hrawng a Phan Cang! Chin ramkulh, Paletwa um ralzaam 5,000 leng ca ah World Food Programme (WFP) nih bawmhnak pekmi facang tun 2,000 hrawng cu August 25 ah Paletwa khua a phan kho cang, tiah theih a si.
A luancia August 24 tiang ah World Food Programme (WFP) nih facang tun kuatmi cu Rakhine ramkulh Kyauktaw(ကျောက်တော်) hrambunh sah-kah-khah 9 nih phorhnak nawl pek lo in an rak hren hna i, August 25 ah phorhnak nawl an pek cang hna, tiah ralzaam bawmtu hna nih an chim.
“Tilawng 2 in facang tun hna cu an phan, ralzaam dirhmun in a ummi hna cu August thla dih in phawtzamh an si lai. Paletwa ah SAC ralkap le AA kar kahdohnak nitin ngawt in a chuah caah, ralzaam cu karh lei an panh. Cucaah cu hlan ah cun minung pakhat ah facang pawng thum pek a si ah cun, tutan ah cun minung pakhat ah facang pawng hnih tluk hrawnglawng pek khawh an si lai, ralzaam cu minung 5,000 leng an si,” tiah Paletwa ralzaam bawmtu pakhat nih a chim.
World Food Programme (WFP) nih cun Paletwa ralzaam hna ca ah facang, chiti, cite, pee le vitamins ummi changreu hna cu thla tin ngawt in bawmhnak a pek tawn. Tutan ah cun facang lawng in bawmhnak an pek, tiah Paletwa ralzaam bawmtu hna sin in theih a si. Chin ramkulh Paletwa ah a luancia May 26 in SAC ralkap le Arakan Army(AA) kar kahdohnak a chuah hnu ah, SAC ralkap nih Paletwa-Kyauktaw ti lam cu thla thum leng an phihkham i ti lam cu an hon cang nain, aa chawkhlatmi tilawng a um rih lo, tiah tualchung mi nih an chim.
Japan PM Hlun Thah a Tong Mi Shinzo Abe Thlahnak Ca ah $ 1.8 Million Hman An Timh! A luancia July thla ah thah a tongmi Japan Prime Minister hlun Shinzo Abe thlahnak ca ah $ 1.8 million hman ding in biakhiahnak kan tuah, tiah Cabinet in tuanvo ngeitu Hirokazu Matsuno a chim.
Ruak thlahnak ah aa tel dingmi hna hi minung 6000 reng lo an si i hi caan ah a telmi minung hna zohchun in thutdirnak, umtonak le humhimnak cu a herh ning in kan tawlrel hna lai tiah, Hirokazu Matsuno nih cun a chim chap. Abe thlahnak ca hman ding tangka cu 2022 i hman dingmi phaisa chung in an hman lai.
Shinzo Abe cu a luancia July 8 ah inn ser meithal in mi pakhat nih a rak thah. Shinzo Abe thihnak kong he pehtlai in Japan Palik bawizik zong nih palik nih kan rian ka tlamtlinh lo ca ah a si tiin rianchuah aa timhnak kong a chim ve.
Videozohnak-
Leave a Reply