UN Nih Vawleicung Mipi Sinah Ralring A Peek!!

Russia nih Ukraine kahdohnak hi caan saupi a si kho i, cu caah a rauh hlan ah caan saupi chung ti le rawl harnak  kan tong lai tiah UN nih vawleipi sinah ralring a peek tiah theih a si . Russia nih Ukraine kahdoh ruangah mi harsa, sifak hna ram ah eidin ti le rawl cu hinak in fakpiin  harnak an tong deuh lai tiah Secretary-General of the United Nations in tuanvo ngeitu António Guterres nih a chim.

Ukraine nih ram dang sinah thil a kuat mi pawl kahdohnak a chuah hlan bantuk kan phak tthan khawh lo ah cun Vawleicung rampi cheukhat hna ah eidin ti le rawl eiawk ngeih lo in an ngat lai i harnak fak piin an tong lai tiah ralring a peek nak bia a chim tiah theih a si.

Buaibainak ruangah hlan deuh ah eidin caah hman mi chiti (oil) lawng si loin, fungvei le Gyaone (wheat)  bantuk anhringso kuatnak pawl Ukraine tikulh in kuatnak pawl cu a piat (Rawk) dih cang tiah theih a si. NU nih thanhnak a tuah mi ah vawleicungpi eidin ti le rawk zakuak hi kum dang nak in 30% dengmang thilman a kai deuh tiah a chim.

Khua caan thlennak, kokek zawtnak le a tu a cang cuah mah mi buaibainak ruangah mi tampi hna cu eidin ti le rawl a zat in an ngeih lo ruangah Malnutrition timi a buu buu le a ruun runn in an ngat cang hna  tiah Secretary-General of the United Nations in tuanvo ngeitu António Guterres nih ralring peek nak bia a chim. Cu ruang ah Vawlei cung mipi hna ralring tein kan um cia a herh cang nakkong zong a chim.

Relchap, Karen National Union (KNU) humhak mi ram chung ah ”Federal Refresher Training” (FRT) tiah Federal kong cawnnak kan tuah kho tiah KNU nih May 19 ah a thanh. Hi Federal kong cawnpiaknak ahcun Ramhrin fa mino zate an i tel kho i KNU hmunhma chung ummi Karen mino zong an i tel kho i an dihlak mino 22 an kai kho tiah theih asi. Hi training ahcun Democracy phunglam, Federal ukhruainak le Myanmar ram tuanbia, Tlangcung miphun hriamtlaihnak tuanbia le tulio ramkhel buainak pawl hna an cawnpiak hna i Cawnpiaktu ah Pado Saw Hla Htun, Pado Saw Ta Mein Htun le Pado Popo Hto Aung hna an si.

Karen ramkulh, Myawaddy peng Tebawbu khua kam um SAC ralkap camp cu May18 ah KNLA ṭangṭi phu hna nih an laak i SAC ralkap a nung in 6 an tlaih hna pinah meithal le zenkuan tam tuk an chuh hna, tiah Karen thawngzamhnak nih a langhter. Camp laak kahdohnak ah SAC ralkap MA meithal zun 6, seh meithal zun 1, RPG zun 1, 120 mm zun 1, BA 100 zun 1, MA 7 zun 1 le zenkuan tamtuk an chuh hna, tiah theih a si.

Kum 32 a rauh hnuah KNLA nih Tebawbu camp an laak khawh ṭhan i, ralkap a thimi an ruak cu an an hawile nih an zampi hna. PDF lei in 1 a thi, tiah theih a si. KNLA nih camp an lak lioah SAC ralkap Jet Fighter 2, Helicopter 2 le CH 3 Drone 1in voi 20 hrawng an kah hna. Camp laak khawh lo dingin an runven ko nain a thimi an tam caah an camp cu an zam taak.

KNLA၊ KNDO၊ PDF ṭangṭi phu nih SAC ralkap camp an laakmi cu Myawaddy-Laykekaw-Phalu-Tebawbu–Walaymyaing motor lampi kam ah a ummi a si. Tebawbu camp cu SAC ralkap nih 1990 kum lioah an rak laak. Kum 32 a rauh hnuah KNLA le ṭangṭi phu hna nih an laak khawh ṭhan.

Sagaing ramṭhen, Shwebo peng Kyauk Myuang Chief of Police(ရဲစခန်းမှူး ) aa citmi motor, Letkohkyiah(လက်ကောက်ကျ) khua khangtu SAC ralkap pawl cu, tualchung PDF nih bomb kan puahhnawh hna caah SAC ralkap chungtel 3 an thi, tiah Nattaung Naga PDF sin in theih a si. Shwebo peng Ta-Ung khua nichuah lei Cundaw kam ah May 16 chun sml 12:00 hrawng ah, sakhan hmu aa citmi Mark 2 motor cu PDF nih bomb lung 4 in an puahhnawh caah aa citmi a thimi le aa hliammi an hngal kho rih lo, tiah theih a si.

Letkohkyiah khua cu SAC ralkap nih May 17 ah inn a kang rih lomi pawl cu motor 4 in an ra i, an khangh ṭhan. Thilri zong tam tuk an fir. Khua an khangh dih an kir lei ah PDF nih an kah hna i Pyusawthi 3 an thi, tiah theih a si. Cu kahdohnak ah GHOST RIDER Special Task Force BURMA le ShweBo SBDF (1) hna i bawm in an kah hna, tiah theih a si.

Be the first to comment

Leave a Reply

Your email address will not be published.


*