UN Nih Min Aung Hlaing Thil Tuah Cu an Zoh sawh Kho Tilo

Dec 5, nizan ah Rangoon khuapi Kyih Min Daing i lamzawhtu hna ralhrang nih mawṭaw in an pah i meithal in an kahmi hna cu zeitihmanh in cohlan khawh a si ti lo tiah UN i Myanmar Office upa Ramanathan Balakrishnan nih cathanh a chuah. Zalong tein chimphuan khawhnak hi nuhrin covo hrampi a si.

Hriam ngeilo mizapi hna cungah atu bantukin ṭhatlonak a tuahtu hna cu dantat ding hrimhrim an si tiah cathanh ah cun an langhter. Dec 5, nizan i Rangoon khuapi Kyih Min Daing peng chungah lam a zawhtu mizapi hna cu an hnulei in ralhrang mawṭaw pakhat nih rang taktak in a pah hna caah mining 5 an thi i tlaih a tongmi minung 15 an si lai tiah theih a si. Hi thil hi zinglei suimilam 8 luan hrawngah a cangmi a si.

Cu ni zanlei ah Rangoon khuapi ah lamzawhnak an tuah ṭhiamṭhiam. Nawlngeihnak an laknak thla 10 a si cang i cu chungah ralhrang nih mizapi an thahmi 1,300 renglo an tling cang. Tlaihkhihmi zong tampi an um. Cu buin ralhrang duhlo in dohnak le lamzawhnak cu nifatin in tuah peng a si rih.

NUG cozah i Ministry of Defense zong nih nizan ah hriam ngeilo mizapi cungah minung lungput ngei lo in ṭhatlonak a tuahtu ralhrangbu cu fak piin lehrulhnak kan tuah lai tiah an thanh colh ve. Rangoon i US Embassy zong nih ralhrang hna thiltuahmi cu tuksum tuk a si, tiah nizan ah cathanh an chuah. Cu lawng si lo in ralhrang nih ṭhatlonak phunphun an tuahmi nih mizapi duhmi democracy uknak a um khawh ding hi a biapi tuk ti kha a langhter.

Democracy a duhmi mizapi sinah kannih US zong kan dir peng ko, tiah US Embassy cathanh ah cun an langhter fawn. Ref: RFA Theihternak : The Chin Post nih kan tialmi thawngpang le ca dangdang hna hi kanmah chimh hmasa loin zalong tein lak khawh a si ko. Asinain kan thawngpang le ca dangdang a la mi hna nih Credit: The Chin Post

Be the first to comment

Leave a Reply

Your email address will not be published.


*