US Nih $800 Million Leng Ralthuam Ukraine A Pek Chap Lai, Russia nih Ukraine nichuahlei le thlanglei hna cu biatakte in a tuk ṭhan caah US President Joe Biden nih cun Ukraine nih amah aa kham khawhnak ding caah $800 Million man ralthuam a pek chap lai, tiah a chim. Atu tan US nih ralthuam bawmhnak a pek ding mi ah hin Miakpi(artillery), ralhriam phortu motor ngan le helicopter hna an i tel lai, tiah nizan April 13 ah President Biden nih a thanh. Atu tan ralthuam a phan thar ding pawl hi cuhlan nakin hmual a ngei deuh mi an si lai.
Russia nih Ukraine a tuk lio ah US le a ṭanrualpi ram hna nih cun pehtlai tein ralthuam bawmhnak kan pek peng i, Ukraine ca zong ah santlai ngai a si, tiah President Biden nih cun a chim. US le Europe ram hna nih Russia phihkharnak, Sii-ai le ralthuam hme hna in an bawmh tuk ko nain Ukraine president Zelenskyy nih Russia dohlet nak ah a zat lo kong a chim i, UN le NATO sinah ralthuam ngan bawmhnak a rak hal i, US nih Ukraine lehnak ah $ 800 million man ralthuam in bawmhnak a pek colh. Atu tan bawmhnak he hin cun, February 24 Russia nih Ukraine a tuk hnu in, US nih Ukraine bawmhnak a pek mi cu $ 2.4 billion man leng a si cang lai.
“Atu tan US nih ralthuam a pek ding mi hi phundang deuh an si caah Ukraine ralkap nih a tawnghtham training tlawmpal an ngeih a hau lai,” tiah pentagon chimphuannak nawlngeitu John Kirby nih a chim. Biden nih Ukraine ralthuam bawmhnak a pek ding kong a thanh hlan, nizan tihni cawn nithum ni ah khan, President Biden nih Russia President Vladimir Putin cawlcang ning cu Miphunpi cihmih lainawnnak(genocide) a si i, Ukraine mipi an ci hmih dih aa tim, tiah President Putin kong cu a chim. Hilio ah Kremlin Chimphuannak nawlngeitu Dmitry Peskov nih cun, “President Biden biachim cu Russia caah cohlan a harsa ngai mi bia a si,” tiah a chim ve.
New York Khuapi Subway I Minung 10 Meithal In A Hliamhtu Palik Nih An Hmu Kho Rih Lo, Tuzarh nihnihni ah khan New York khuapi subway(tlanglawng) ah meikhh(smoke) a chuahter i, meithal zong a puahtu cu New York palik ni an kawl peng rih i, atu tiang an hmu rih lo. Hi buainak ah hin minung 20 hrawng hliam an tuar i, an lak i mizeimawzat cu an hliamhma a fak ngai, tiah theih a si.
New York palik hna chimning ah cun misualpa cu ṭanrualpi(bawmtu) ngei lo bantuk in a lang i, subway i meikhu le meithal a luahnak hmun cu a zaamtak colh, tiah ruah a si. Meithal puah ruangah minung 10 cu meithal hma an pu i, an lak ah panga cu a faak ngai, tiah palik nih an chim. Hliam a tuar mi 13 cu meikhu aa dawp sual ruangah hliam a tuar mi an si, tiah theih a si.
Hi buainak a can lio ah mithuhmutu hna chimning ah cun sualnak a tuahtu hi pangan leipang a si i, helmet lukhuh hring aa khuh i, sergical mask in a hmai aa huh, tiah an chim. New York Palik chim ning ah cun civil a dohtu pa nih hin meithal Glock 9mm semi-automatic handgun aa tlaih i, kuan 33 a thlah manh, tiah an chim. A meithal lengah kuan magazine 3 le hriamthil zeimawzat a kaltak mi an hmuh.
New York Mayor Erics Adam nih cun United States ah meithal in kahdohnak voi tampi a chuah cang caah ram pumpi in kan doh i, kan ṭanṭi a herh tiah a chim. United states ah hin civil mi nih meithal tlaih khawhnak phungphai an ngeih caah civil mi hna karlak ah kahdohnak a chuak pah lengmang. New York subway kahdohnak he pehtlai in lunghrinh mi Frank James ti mi pa cu Palik nih an tlaih i, hlathlainak an kalpi cuahmah lio a si.
Ukraine cu Moscow i kahdohnak cu miphun cihmih bantuk a si tiah American president Biden nih a chim lio caan ah Russia lei zong nih kahdohnak cu punghman ning in pehzulhin kan i timh mi kan phak hlan tiang kan tuk ko lai tiah Russia president Putin nih a chim.
” Aw a si ko. Miphun cihmih a si tiah ka chim. Zeiruang ah dah a si ti ah cun Ukraine fa ka si ko ti mi cu Putin nih hnawn hna dingin aa timh, aa zaum timi cu hi nak in theih thluahmah a si cang i tette pawl zong tampi a um ko ” tiah U.S President Biden nih a chim.
” Miphun cihmih aa timh, miphun cihmih a si le si lo cu vawleicung huap biaceihtu sihni hna pawl cu biachah nak ka tuah ter hna lai. A si nian kei mah lei in cun miphun cihmih a si k” tiah Biden nih a chim chap.
Russia nih khua nu, khua pa pawl thah nawn dingin a timh hna timi cu an mah Russia lei nih a tu le tu in mah bia cu an cohlang duh lo, an hnawn i ral chung ah Russia nih mipi pawl thahhren in a tuah hna timi Ukraine le Nitlak lei ram hna nih an chim mi cu Russia lei nih an duh ning an herh ning paoh paoh in an chim phuan i leh nak an tuah tiah theih a si.
A sinain Russia ralkap pawl hnu lei ah an kir hnu ah Ukraine ram i thlang lei khuapi hna ah mithi ruak cu lam cungah tampi hmuh a si tiah theih a si. Russia ralkap pawl an chuah nak Kive khuapi pawng hrawngah mithi ruak cu 720 an hmuh tiah theih a si.
Leave a Reply