Myanmar ram chung ah SAC nih uknak a laak hnu Febuary 1, 2021 in May 26, 2022 tiang mizapi umnak inn 22,000 leng a kaang cang, tiah ISP Myanmar nih June 2 ah cathanh a chuah.
Sagaing ramṭhen ah inn 15,000 leng, Magwe ramṭhen ah inn 4800 hrawng, Chin ramkulh ah inn 1000 leng le Kaya(Karenni) ramkulh ah inn 400 leng a kaang. ISP Myanmar nih a langhter ning ah, 2022 Mya thla chung lawng ah inn 7600 leng mei kanghnak in a ciam i, SAC nih uknak a laak hnu in inn kangh a tam bik thla a si, tiah a langhter. Cu pin ah mizapi umnak inn hna cu, kahdohnak a chuah lio ah khanghmi zong a um i, hriamngan kuan nih a tlak caah a kaangmi zong an um, tiah ISP Myanmar nih a langhter.
Inn tam bik a kanghnak Sagaing ramṭhen chung um tualchung mi pakhat nih, “Mizapi umnak inn, biaknak lei he aa pehtlai mi inn le sianginn ah SAC ralkap nih rallam an sial lio ah khua khat hnu khua khat in an khangh thluahmah hna,” Than Lwin Times ah a chim. ISP Myanmar nih inn kaangmi cazin a langhter mi hi media le zatlangbu hna cathanh an chuahmi chung in a khawmh suatmi a si caah a taktak ah hinak in a tam deuh kho, tiah a chim chap. Cred : The Chin Post
Leave a Reply