Twan Mrat Naing Kong An Chim Mi
====================
“ULA/AA hruaitu Twan Mrat Naing cu kum 2020 thawkin a thinlung ruaknak a mah kel ningin a si ti lo tiah a mah he aa niam mi sinin theih a si. A tak ah Twan Mrat Naing nih kum 2020 a tlin hlan ah Rakhine ram ka ser lai i Siangpahrang tuan dingin timhtuahnak a ngei tiah theih a rak si. Siangpahrang si duhnak nih a tei tuk mi a si ti zong in an chim.
Aa timh bantuk in thil a si lo tikah, siangpahrang a si duhnak a fah tuk caah a tu bantukin thinlung ruahnak a dik (hman) loin a um hi a si tiah an chim. A nih hi saingpahrang si duhnak aa hruhpi mi pakhat a si tiah an chim.
Ca zong hoi dang nakin a rel deuh a hlethlai deuh. A rel mi le a hlethlai mi ah siangpahrang kong le siangpahrang he aa pehtlai mi cauk deuh lawngte an si tiah theih a si. Mah cauk chung i siangpahrang kong a rel hnu ah, a caan caan ah cun a mah lawngin hlan lio Rakhine siangpahrang bantukin bia chim holhrel a hmang tiah an chim.
A kuttang mi hna zong nih siangpahrang pakhat bantuk in an chawnh biak i, a mah zong siangpahrang sinah biachim bantukin a chim caan zong a um tiah an chim. Twan Mrat Naing cu a mah le a mah aa zumh tuk. Rakhine miphun hna chungah kei mah nakin a fimmi le a thiam mi an um lo tiah aa ruah i, zei bantuk minung hmanh saya bantuk in a chawnh biak mi an um lo.
U San Kyaw Hla Ramkulh hluttaw Chaiman a si lio zongah Twan Mrat Naing nih a chim rel ningin rian a rak tuan tiah an chim. A hnu zulh ramkhel palai upa pawl zong a mah tlukin a thiam mi le a thei mi zong an um lo tiawkin ramkhel an tuah tiah ruah a si i, Cu hna pawl zong cu a mah nih a chim ning le a tuah ning in tuahtuan hna seh tiah a duh tiin an chim.
Twan Mrat Naing cu ca lei in hlethlainak a tuah ko nain a theih hngalh menmen lawng a si. Upa tar ramkhel tama bantuk in Rakhine ramkulh le Rakhine miphun kong cu a tak ah a thei taktak mi a si lo i, saya tuan a duh tuk caah zeiruangah dah an cohlan khawh lai.
Twan Mrat Naing a cohlang mi ramkhel tama pawl zong fimnak sang le cawnnak sang a ngei mi hmanh an si lo. A that nak lei deuh ah i komh in ramkhel an tuah sawhsawh bia a si ko.” tiah min langhter lomi Rakhine ramkhel tama pakhat nih a tial mi ka vun langhter chin.
Relchap, Kalaymyo Natchaung Lam Lei Ah Cycle I Pahsualnak In Pa Pakhat A Nunnak A Liam! Sagaing ramṭhen, Kalaymyo Natchaung lam Aungzaeyiah(အောင်ဇေယျ) lam chuahnak ah nihin August 11, zaanlei ah miphortu kee thum ngei cycle(ဆိုက်တွဲယာဉ်) le cycle pakhat an i pahsual caah, cycle cung cuangmi pa cu an i pahnak hmun ah a nunnak a liam colh i, a dang pakhat cu a lu ai khawng, tiah khuami nih an chim. Cycle i pahnak ruang ah nunnak a liammi pa cu Pungiah Kutalah(ပုညကုသလ) bawmchantu phu nih an kalpi i, a lu ai khawngmi pa cu Kayuhna(ကရုဏာ) bawmchantu phu motor nih Kalaymyo sii-inn ah an kalpi, tiah theih a si.
Tonbiaruahnak Ngei Ding In SAC Cu Zumhawktlak An Si Lo – AA, Nawlngeihnak latu SAC ralkap le tlangcung hriamtlai phu cheukhat tonbiaruahnak an ngeih mi cu, A lengphaw in ramkhel lei cawlcanghnak lawng men a si tiin ka hmuh, tiah ULA/AA in chimphuannak nawlngeitu U Khine Tu Khah nih nihin August 11 ah a chim.
SAC le hriamtlai phu hna biaruahnak phichuak cu ULA/AA nih kan zoh ko hna, atu tiang ah aa thleng hlei mi le kan lungtlinnak a um rih lo. A lengphawvuan lawng in thil tuah cu ULA/AA nih thazaang kan pe lo. A tak ah aa thlengmi tuahsernak lawng kan cohlan. ULA/AA nih cun SAC cu zumh ding ah kan ruat rih lo. Anmah he tonbiatuahnak ngei ding in timhtuahnak kan ngei lo. “Tonbiaruahnak ngei ding in SAC cu zumhawktlak an si lo,” tiah a chim. Rakhine ram ah SAC ralkap le AA kar i hnorsuannak a fak chinchin i, Rakhine mipi hna ca ah ṭhathnemnak a um ahcun a herhmi poh tuah ding ah timhcia kan si, tiah AA lei chimphuannak nawlngeitu nih cun a chim chap.
Sagaing Peng Ah Chungkhar Pakhat I Innchungkhar Minung 3 Cu Misual Phu Nih An Thah Hna, Sagaing ramṭhen, Sagaing peng Chaikyi (ချိုင်ကြီး) khua ah nizaan August 10, zinglei suimilam 4:00 hrawng ahkhan chungkhar pakhat ah innchungkhar minung 3 cu misual phu nih an thah hna leng ah, an innchung thilri zong an firpiak hna, tiah bawmchantu phu chungtel nih an chim.
“Chaikyi(ချိုင်ကြီး) khua chungkhar pakhat ah minung 3 cu an i hngilh lio ah an thah hna. Sui, phaisa le phone an lakpiak hna. Thah a tongmi hna cu U Tan Aye, a fapa nupi Daw Khin San San Htay le a fanu Ma Wat Hmune Phoe(kum 15) hna an si,” tiah bawmchantu phu chungtel pakhat nih a chim.
Cu thil a cannak inn pawng ah ummi hna nih cun, “Zinglei suimilam 4:00 hlan deuh ah an umnak innchung in meithal thawng kan theih caah innleng ah chuak in kan bih hna, cu lio ah cun U Tan Aye te inn cu a kang cang. Aho si theih lo mi minung 10 cu, cuka inn cun an chuah kan hmuh, zinglei ah cun U Tan Aye te chungkhar 3 cu an thi cang,” tiah an chim. August 10, zinglei suimilam 2:00 hrawng ah khan Sagaing ramṭhen, Yee U pengkomh Yee U peng Htantaw(ထန်းတော) khua ah ummi U Phoe Htay, kum 65 le a fapa Ko Zaw Naing zong misual phu nih an rak thah hna.
Kahdohnak Ruangah Sagaing Ramṭhen In Khuami 12,000 Leng Ral An Zaam! Sagaing Ramṭhen, Depeyin, Yee U le Ayardaw peng ah SAC ralkap nih August ni 8 in rallam an sial caah kahdohnak pehtlai in a chuak, tiah theih a si. Cu kahdohnak ruang ah cun Depeyin peng, Yee U peng le Ayardaw peng chung hna in minung 12,000 leng nih khua chuahtak in ral an zaam, tiah theih a si.
August ni 10 nikhat chung lawng ah Yee U peng, Kungta(ကုံးသာ) khua cu SAC ralkap nih vanlawng in voithum tiang a kah, tiah min langhter a duh lo mi khuami pakhat nih a chim. Ke in rallam a sialmi SAC ralkap pawl kahdoh an ton hnu in Mi-35 raltuk vanlawng cu SAC lei nih an hman. A bik in phungki sianginn, sianginn le ralzaam pawl um hna cu a kah hna caah ralzaam cheukhat cu hliamhma an tuar, tiah theih a si. SAC ralkap nih vanlawng in khuachung an kah lio i a zaam manh lo mi tualchungmi cheukhat hna cu an thawng kan thei kho rih hna lo, tiah a chim chap.
Cu lawng siloin Depeyin peng, Sutat(ဆူးတပ်) khua cu SAC ralkap nih August ni 8 in 10 tiang an khangh caah Inn 500 hrawng a kaang, tiah theih a si. Sutat khua cu a luancia june thla chung zong ah khan an rak khangh i Inn 165 hrawng a rak ciam cang.
Ayardaw peng zong ah a luancia August ni 8 ah Ayardaw, Myinmu, le Chaung U PDF chungtel 8 cu SAC ralkap nih an rak thah hna. Nai hrawng cu Ayardaw pengchung ah dinhcaan um lo in kahdohnak a chuak i, kaphnih kar a thimi zong an tam. SAC ralkap nih faak ngai in vanlei kahdohnak an tuah, tiah theih a si. Sagaing ramṭhen cu kahdohnak tam bik a chuahnak hmun a si i, kahdohnak hi voi 4026 a chuak cang, tiah SAC lutlai General Min Aung Hlaing nih uknak an lak thla 18 tlinnak August ni 1 ah a rak chim.
Russia Vanlawng Tual I Puahkehnak A Chuakmi Ruang Ah Vanlawng Zeimawzat A Rawk, Tuzarh chung i Russia vanlawng tual ah fak ngai in puahkehnak a chuakmi ruang ah vanlawng rawkral an tam, tiah Satellite nih a thlakmi hmanthlak cu Planet Website nih an taar/langhter. Cu hmanthlak chung ah cun vanlawng 8 hrawng a kaang mi hmuh a si.
Russia nih a lakmi Crimea nitlak lei Saki vanlawng tual ah, a luancia August 9 ah puahkehnak pehtlai in a chuah caah minung pakhat a rak thi, tiah theih a si. Puahkehnak a chuakmi kong ah Ukraine lei nih zei thawng hmanh an thanh lo. Planet Labs nih Satellite in a thlakmi hmanthlak ah cun vanlawng rawkmi hna cu fiang tein a langhter. Russia nih cun puahkehnak a chuakmi kong he pehtlai in “Hriamthil khonnak hmun ah puahkehnak a chuak” tiah an langhter.
Leave a Reply