November 24, 2021, zaanlei suimilam 6:45PM hrawng in Hakha ah kahnak a chuak. Meithal puah thawng le Bomb puah thawng pehtlai in kan theih peng i atu tiang a dai rih lo tiah Hakha um mi khuami sin in kan theih. Meithal thawngpang le Bomb thawngpang kan theih nak hi a zawn taktak ka fiang lo, Chin Oo Si sang lei hrawng ah cun a si ko.
Meithal thawngpang cu aa pehtlai cuahmah, a caan a hun sau pah ngai cang, cun Bomb puah thawng, a ngan taktak mi puahkek thawngpang zong kan theih i kan lau ngai. Inn chung ah kan i dup ko tiah Hakha khuami pakhat nih cun a chimchap. Atu kahnak hi SAC ralhrang le mizei karlak timi fehter awk a tha rih lo.
Meithal le Bomb thawngpang tu cu zaanlei suimilam 6:45PM hrawng in atu ca kan tial lio zong ah hin aa peh peng rih ko. Pehtlai in thawngpang a um rih. A thi le hliam an um maw timi le inn lo chiatchuah kong zeibantuk thawngpang hmanh theih a si rih lo. Atu ca kan tial cuahmah lio zong hi Meithal thawngpang le Bomb thawngpang cu aa peh rih ko tiah Hakha hrambunh minung pakhat sin in kan theih hi asi.
Nihin zaanlei ah SAC ralhrang nih Thantlang inn an kangh cuahmah tthan. Thantlang a kaangh hi zaanlei sang ah a si caah inn zeizat dah a kaang chap timi theih a si rih lo. Cun a tu Hakha puahkeh thawngpang hi aa peh ngai caah zeitin hmanh in puah sawh cu a si lo, Meithal hrim cu pehtlai in a ring cuahmah ko tiah Hakha lei in kan theih hi asi.
Sagaing ramthen, Depeyin peng, TayaAye khua ah nizaan November 23 zinglei ah chungkhar minung 5 thah an tong tiah khuachung mi hna nih an chim. November 23, zinglei suimilam 3:00 hrawng inn chungah chungkhar pakhat chung in minung 5 hna cu nam hliam nak, meithal hliam nak hna he an ruak hmuh an si tiah khuachung ummi hna sin in theih a si.
” Thah a tongmi chungkhar hna cu zeituah mi hmanh an si lo, inn chungah mi zei dah an lut ti zong theih an si lo cun meithal thawng zong kan thei lo. Cu chungkhar hna cu minung 6 an si, an fanu pakhat cu hmundang ah zaan a riah caah a luat. Thah a tongmi hna chung in nu pakhat cu nau pawilio mi a si” tiah an mah he neihniam in ummi khuami pakhat nih a chim. – BBC, The Chin Post
Leave a Reply