Mortar bomb nih inn a tlak ca ah Hakhathar sang ah nutung pakhat hma a pu September 16, zaan suimilaam 11: 30 hrawng in Hakha khua ah meithal thawng le bomb thawng pehtlai in theih a si i, Hakhathar No. 1 sang, Lungphuntlang ah a um mi inn pakhat cu SAC lei kah mi bomb nih a tlak ca ah nutung pakhat hma a pu tiah kan theih.
“Bomb a tlak lio hi an ih lio a si i bomb a tlaknak lei hi an tikhaan lei deuh a si. An ihnak hmun ah a peh i a hnakhaw ah hma a pu. A hma cu a nunnak ca thinphaang tuk cu a si lo. A lung zong a fim cang i a thi zong a pit ngai cang. Bomb a tlak ruang ah an inn pawng hrawng zong vawlei aa vorh dih,” tiah sangmi pakhat nih a chim.
Myint Mo Kyaw ti mi Facebook account nih a tial ning ahcun, “Atu kan umnak inn (Minister pawl inn) an rak kah ca ah, ka lei a vengtu hna nih an kah ve hna. Suimilaam 11: 32 in 11:47 tiang an i kap cuahmah. Meithal lawng siloin hika lei nih mortar in pehtlai in an kah hna. A puah thawng hlat nawn in a thang…” tiah a tial.
Tu zaan ah bomb thawng hi voi 15 hrawng thieh a si i Lungphun tlang ah hin SAC lei kah mi mortar bomb tlak thawng voi nga tluk theih a si. Tu tan ah hma a pu mi min le an umnak cu himnak ruah ah kan langhter lo nak a si. Hakhathar ah inn dang a rawk mi um le um lo theih a si rih lo. “Inn hnih thum cu a rawk kho men. Inn hngak tu a um lo mi inn an tam pah i chim khawh a si lo.
Leng zong ah kan chuak ngam lo i minung kan him le him lo lawng phone in kan i hal kho hna,” tiah sang mi pakhat nih a chim. Tuzaan bomb le meithal a puak mi ruang ah Hakha khua ah hma a pu mi le inn a rawk mi dang an um le um lo hngalh a si rih lo. September 7 zaan zong ah SAC ralhrang lei kah mi kuan nih Hakha Chin Oo Si sangmi pakhat a khen i hma a rak pu. TheHakhaPost
Magwe ramthen,Myiang peng chung ah, Aye ChanThar Sanpiah khua chung ah nizaan september 15 ni zanlei ah inn hna cu mei in an kangh i meinih kangh i a rawk mi miruak 2 cu kan hmuh tiah khuami hna nih an chim. Ralhrang hna nih khuate pawngkam hna cu i hel in hmunhma an lak i an kah hna caah Aye Chan Thar Sanpiah khua chung ah,.
Tar kum upa cang mi cheukhat lawng an tan lio ah atu bantukin inn le lo hna cu mei in an kangh i a thi mi hna hi tar kum upa mi hna zohkenh tu ah a taang mi mino hna an si tiah khua mi hna nih an chim. ” September 14 thok in a cang mi a si. Nizaan ah khan khua pawng kam neih deuh ah kan kal khawb caah mi ruak hi kan hmuh mi a si.
A thimi hna hi PDF tiah ruah in an kangh mi an si. An nih hi khua chung ah ataang mi tar hna zohkhenh ding ah a taang mi hna an si. Khua chung ah Inn hna, mawtaw hna, Saikal hna cu mei in an kangh dih. Tu kan hmuh mi ruak pahnih leng ah hin ruak pakhat kan hmuh mi a um rih.
A ruak cu kan la kho rih lo. Hliam a tuar mi khuami 2 zong kan bawmh khawh cang hna ” tiah khuami pakhat nih a chim. Myaing peng ah hin September 12 ni ah khan ralhrang mawtaw cu bomb in puah an si i mah hnu cun atu bantukin a pawng kam khua poh cu an kah hna mei in an kangh hna tiah khuami hna nih an chim. _ BBCE
Leave a Reply