Tuzan Hakha A Hnu Bik Thawngpang

Hakha khua ah meithal le bomb pehtlai in a puak than – September 16 Hakha khua ah tu zaan suimilaam 11:20 hrawng in bomb le meithal thawng pehtlai in a thang than. Puahkeh thawng a thannak hi Hakhathar lei deuh in theih a si i, bomb puah thawng voi 15 hrawng theih a si. “Kanmah Hakhathar lei ah a si ko. Inn leng ah kan chuak ngam lo i a zawn tak cu ka chim kho lo nain minister pawl umnak hrawng si dawh a si. A puah thawng a thang tuk i a kan tlerh dih ko,”

Tah Hakhathar sangmi pakhat nih The Hakha Post ah a chim. Hakhathar Lungphun tlang zong ah bomb voi thum a puak tiah theih a si nain kan fehter kho rih lo. SAC ralkap pawl nih lau lung le zawndamh in kah mi a si kho ti in a chim mi zong an um. Meithal kuan le bomb ruang ah aa hliam mi le a rawk mi an um le um lo theih a si rih lo. Atu, hi thawng kan tial lio zaan suimilaam 11:50 hrawng ah cun puahkeh thawng a dai.

Thantlang khuapi chung ah ralhrang hna nih thilri le inn zuat satil an fir. 16 September, 2021 Chin ramkulh Thantlang khuapi ah aluan cia August thla dih lai hrawng ah ralhrang le CDF kar ah kahdoh nak a um caah khuachung um mipi cheukhat chuahsem nak khua ah an zaam lio ah ralhrang hna nih an inn hna cu an mawizap i inn zuat satil hna cu an fir hna tiah khuami hna sin in theih asi.

” Thantlang cheukhat hna cu India lei ah an zam i inn an hrenh mi cu a boh i an duh mi thil poh an i lak .Ralhrang hna nih cun a chek i a zoh piak ban tuk in an i um ter i thil tam tuk an fir hnu ah inn zuat satil cu an thah i an ei. Zahan zan ah cun kan inn pawng i Ar 15 in 20 kar hrawng a si lai mah zong cu an fir dih ” tiah khuami pakhat nih a chim.

Thantlang khuapi chung ah ralhrang nih Security le chek nak hna a um i meithal thawng le hriamnan thawng hna kan thei rih tiah a chim. ” Nizan zong suimilam 8:00 le tlawmpal hrawng in Suimilam 11:00 tiang hrawng meithal le Bomb thawng kan theih. CDF he ma an si ti le mipi hna nih tih hna seh tiah an kah hram hram mi dah a si ti kan thei lo tiah an chim.

Be the first to comment

Leave a Reply

Your email address will not be published.


*