CDF-Zotung Chungtel 3 Cu SAC Ralkap Nih Meikhangh In An Thah Hna!
================================
CDF-Zotung Commander in chief Thah Ceu telh in minung 3 cu SAC ralkap nih July 27 ah meikhangh in an rak thah hna, tiah CDF-Zongtung nih cathanh an chuah. SAC ralkap hna cu a luancia July 22 ah Chin ramkulh, Matupi peng Rangcci khuachung ah lut in, khuami 27 cu Biakinn chung ah an rak tlaih hna.
CDF-Zotung in chimphuannak nawlngeitu pakhat nih a chim ning ah cun, “CDF-Zotung commander in chief pakhat le ralkap 2 hna nih khuami tlaih a tongmi hna hrem an ton le ton lo a thli in an veh hna lio ah SAC ralkap nih July 23 ah an rak tlaih hna.
Khuami nih cun tlaihkhih an ton zong an rak thei hna lo. July 27 SAC ralkap nih an ruak an khanghmi rim cu kan theih, an ruak cu aho an si theih fian a har ngai nain minung 3 an si caah, commander in chief le a ralkap an si ko lai tiin kan fehter” tiah a chim.
SAC ralkap kut in thah a tongmi hna cu CDF-Zotung commander in chief Thah Ceu kum 40 hrawng, CDF-Zotung Aung Ming Thang le Thang Cing Mang kum 20 hrawng an si. SAC ralkap nih an tlaihmi khuami 27 hna cu nihin August 3 ah an thlah ṭhan cang hna, tiah theih a si.
Relchap, Tuanbia a duhdawttu hna caah; “Lian Do te unau 2 “. A zan cu zanriah an ei i puan hlanh ding an ngeih lo caah chakchang ah an ihter i mei an hawrhter. Khuangcawi a dih tiang Lian Do te inn ah cun a cam ve ko. Khuangcawi a dih in tlun an i thawh cio. Tarpa zong tlun ding a si cang caah a kal lai zan ah tarpa nih cun, “Ka fale, nu le pa ngei lomi ngakttah buangro nan si buin kei tarpa nan inn ah nan ka tlunter, lumte in nan ka tuah, nanmah unau rak um hlah u law mi khua mi ram ah mualpho in pei ka hei thih ko hnga cu.
Nan unau in ka zul u law, sia thlaici nan duh cemmi kan tthenh hna lai,” tiah a ti hna. A thaizing cu an pu khualei ah cun chuncaw an i rawnh i an kal. A ni hnihnak ah an pu khua cu an va phan. Khua luhka ah Lian Do cu, “Ka ti a hal,” a ti i an rak lan chung. Lian Do a pialnak inn kha an pu i a far chuahpi a si i a hmeimi a rak si. Banhla pumte he a ti cu a dinter. Ti a din lio ah, “Aih, ka fa zei ti ding dah nan si?” tiah a hal.
Lian Do nih cun, “Ka pu nih sia thlaici kan thlah hna lai a ti i dahkaw kan rak zulh ko cuh,” a ti. “Ka fa, cuti a si ahcun na pu hi siarun tampi a ngeimi a si, cu sia run lakah cun sia vokpi timi a ngei. Vokpi tiate khi a si lai, cu sia run a hring sortu cu a si. Sai bong a si i cucu na vaa thim te lai,” tiah bia a cah ta. Sau nawn a rauh hnu ah inn cu a ra han ve i, ” Aw.. atu maw na ra phanh, ti na dinnak kha midang an si lo, kan ni dahkaw a si khah,” tiah an pu nih cun a ti.
An pu nih an nu cu, “Zuhui kha vun nawng,” a ti. An nu nih an pa cu, “Na ratpimi hna hi mi zeidah an si?” tiah a hal. An pa nih cun an nu cu a thawh i, “Hi hna unau hi khuazing le ka vanluh pei an si cu, kan pu le tlawn pah ti na lakah na ttale nih cun an mitphei hmanh in an ka zoh ttung lo.
Hi hna unau hi um hna hlah sehlaw mi khua le mi ram ah rawl lo le khuasik lakah pei ka va thih ko hnga cu…” a ti. Cu bia cu an nih a theih tikah, “Maw, khazingte le hna…” a ti hna i an lu in an taw tiang a muai, a zun hna. Zanlei sang ah cun an sia a runrun in an vun tlung hna. Lian Do te unau nih cun cu bantuk sia a runrun in an von tlunmi cu an hmuh tikah tthep lo in an rak zoh ko hna. An kawm chungah cun an luhter dih hna. A zan cu an pi nih arpi ti ti liop a thah hna i lunglawm ngai in an ei i an it.
A thaizing, zingkate in an pu a biakam a si bang a sia run chungin duh thimnak nawl a pek hna. “Kawmka ka hun lai i pakhat hnu pakhat in an chuah tikah nan duh cemmi siapi cu a hngawng ah hri rak awih te uh,” tiah an pu nih cun a ti hna. Sia cu Pakhat hnu Pakhat an hung chuak i pi nganpi pi khat cu Tuai Sel nih, “Ka u, hi cu awih cang,” a ti i a u nih a duh lo. Cuticun a ngan pipi cu an chuak i an lan legmang ko.
Siarun chung pingan le pi dawh cu an chuak dih cang. A donghnak ah sia vokpi cu a hung chuak ve. A chuah bakin Lian Do nih a zuanhnawh i a hngawng in a kuuh tthup ko. Cun hri cu a awih colh. Cu bak ah cun a pu nih, “Maw khuazingte le hna,” a ti i, an pu cu a hmai a chia rup ko. Rawinak a si, khua kan luhka i, Lian Do ti a din ah khan an ni nih a rak chimh ti cu a hngalh colh. A thawh hna i, “Ka fale, hi sia vokpi hi ka bongmal cu a si, hi sia a hringsortu hna an pi a si. cun a tu cu kei cu ka ttumchuk cang lai, nannih unau cu mirum le milianngan nan si cang lai,” tiah a ti hna. “Damte in va kal ko kun uh,” a ti hna.
An siapite cu an i hruai i khualei ah cun an tlung. Khuachung i luhpi cu khuami nih an kan chuh lai ti an phan caah an khulu tlang ah an thlah ta i, inn ah cun an tlung. A thaizing ah an siate cu an va zoh i, fate a rak hring i an i lawm ngaingai. An va zoh paoh ah hrin thar mi fate a rak um zungzal ko. Caan rau lo ah sia runpi ah an i cang manh.
Tuai Sel nih ttolhttang chung i a khumhmi fang tete kha hawi lori pawngte ah chuntlung pakhat i a velvang te khi a vah ve. An lote ah cun an thlaicite cu an va tuh. Ni le thla an liam i, an lote zong cu ttuan caan a hung cu ve. Ni fate in an unau in an favui cu an va sik lengmang. Nifatin an sik ko nain dih le dongh a thiam lo. An innchak nuhmeinu kha ni khat cu an favui sih cu an va sawm “Nanmah unau lo tuah va cal kauh lo cu, nan ka siaherh ve chan,” a ti hna.
Lian Do nih, ” Ka pi, kan lote rak kan hmuhpiak ve kan ti ko cuh, i thawh ve ko,” a ti. “Nan sia a rem lo si le…” a ti i nuhmeinu cu nurelte he cun aa thawh ve. Lo cu an phan i chuntlung pakhat le a velchumte kha a si ko. A lungthil in chun hlan ah zaangdam in kan lim lai a ti. Chunnitlak an sik i an i ken ciomi nurel a khat. An sih cianak hmun a zoh tikah hnuhmaiher fang khi a si i, a khuaruahhar in zanlei cu an tlung. An fang ttuan cu an lim tikah cun Lian Do te innchung cu buk he han he an ngeihmi vialte an khat dih.
Ni khat cu an innchak nuhmeinu nih khan a innchak i a ummi an khuaibawi fanu kha, “Ka maw, rung ka leng, ka hrik hna rung ka zoh, um har in dahkaw kan um ko hih,” a ti i, len a sawm. Hrik an i zoh pah ah hitihin bia an i ruah. “Ka maw, kan dawt caah hi bia hi kan chimhmi a si, atu cu va ngeih zong na za ko cang. Phung dang in ka ruahpiak ruam hlah.
Lian Do te unau hi mi nih nihsawh zeirel lo in an ti hna. Ngakttah buangro an si pat tiin, a taktak ti ahcun hi hna unau hi an men lo hih, an innchung hi a ho nih an pal bal lo caah a si. Buk le han khat in fang an ngeih. Kan khuachung koko ah hin aho nih an tei hna lai ti ka zum lo. Cun zan i hla an sak i an tummi hi dar si dawh a si.
An hlasakmi hi ka ngeih tawn ahhin sia khalh hla si dawh a si ko. Khualu lei i an unau zal an i bei i an kal tawn hna ka ruah ah siarun an ngei ko lai,” tiah nuhmeinu nih cun a ti. “Na ka zumh lo le ni khat cu fangsu dingin an inn ah vung kal law an sum ah va su, innchung ah va lut law Lian Do nan ti ka ding lai, tiah va ti hmanh, cun an buk le an han cu va zoh ko,” tiah a ti.
Leave a Reply