Tuni Thantlang Kah Dohnak Thawng

SAC ralkap nih Thantlang khuami pakhat an kah, a thih le nun a fiang lo, September 15 zing Thantlang Market in Sayama Nu Tha te inn kar hrawng ah SAC ralkap nih khuami pakhat meithal in an kah, a thih le nun a fiang rih lo tiah kan theih. “Motorcycle an kham hna. An toolbox tiang an check. A zaam mi cu an kah len hna. Pakhatpa hi an kah i a rilh caah an kalpi colh. An hliamh ning a dinfah kan hngalhlo bantuk in a thih le nun kan hngal lo,” tiah khuami pakhat nih The Hakha Times ah a chim. September 14 zaan in Septemner 15 zinglei tiang Thantlang khua ah meithal thawng a dai kho taktak rih lo. Crd_ The Hakha Times

September 15| Atulio rai le ral lak ah Thantlang Peng khuate cheukhat nih an thlawhtuan mi thlai an tha, kumdang nakin a tha deuh mi khua zeimawzat an um tiah kan theih. “Hi tluk thinphan thlalau lak ah pawcawmnak riantuan lo awk a thalo. Kumdang bantuk in caanpek le thlawhtuan keel in kan thlo-tuan kho lo. Asinain, lungkhan lengpi in kan thlai an tha,” tiah Thantlang Peng khuate pakhat in khuami pakhat nih The Hakha Times ah a chim. Khuate khuami pakhat thiamthiam nih,

“Meithal thawng le bomb thawng lak ah thinphang le lungrethei in kan um nain kan pawcawmnak cu kan siaherh ve i nicaan kan tenh hramhram i atu tiang ahcun kan thlai an tha taktak. Kumdang nakin kum kan vui deuh hmanh maw,” tiah The Hakha Times ah a chim ve. Thantlang Peng hi atulio kahdohnak ruang ah khuate ah a tlizaam mi an tam. Khuate khuami zong nih lungretheihnak le tihphannak tampi lak in an tuan khawhtawk thlairawl an tha i khua tam deuh cu kan paw kan i cawm kho ko lai dah, tiah min langhter lo mi le a khua min langhter lo mi khua 3 zong nih The Hakha Times ah an chim ve.

Myanmar- UN Palai thimtu ding Credentials Committee thar an ser September 15, Myanmar -UN Palai ding ah NUG ai-awhtu maw SAC ai-awhtu dah thim a si lai ti mi kong ah biachahnak fek an tuah khawh lo caah Committee thar an ser i caankarlak November tiang cu U Kyaw Moe Tun nih a si tiah BBC le VOA nih an tial. “Committee thar ah hin Bahamas, Bhutan, Chile, China, Namibia, Russia, Sierra Leone, Sweden le US an i tel lai,” tiah Avoi 76nak UN General Assembly Chairman Abdulla Shahid nih a thanh. Aralai mi September 27 ni ah Myanmar ram cu biachimnak nawl pek an si lai nain ahodah a chim lai ti mi le NUG ai-awhtu maw asiloah SAC ai-awtu nih maw a chim lai ti zong a fiang rih lo… The Hakha Times