KNU le ralhrang cu september 22 ah an i kap,minung i palh in ralhrang anmah le anmah an i kap i ralhrang minung 25 an thi tiah theih a si. KNU Tathu pengkomh Brigade 1 hmunhma ralkap le nawlngeihnak latu ralhrang rallokap lr Teih-Za-Lat zalam pi cungah i tong in an i kap i ralhrang lei in 25 an thi 5 fakngai in hliam an tuar KNU lei in hliammi ah um lo tiah theih a si. Hi i kahnak ah ralhrang thazaang chap in bawmtu ding ah a rami ralhrang i palh in anmah le anmah i kap tiah KNU nih an thanh.
Kalaywa Hmungzua Asian zalam pi cung Kongin khua pawng ah ke in a kalmi ralhrang hna cu Minkin peng Tawngdwin PDF nih lampi ah an kah hna tiah Minkin PDF sinin theih a si. “Hriamngan in an kah hna caah khuami an zaam,a zaam mi hna hi thongkhat le zanga hrawng an si lai,zing suimilam 9 hrawngah a si tiah” Tawngdwin PDF he naihniam mi pakhat nih a chim tiah Than Lwin Khet nih a tial. Ralhrang thazaang 70 hrawng ke in an kal,Tawngdwin PDF nih an kah i ralhrang a tlawmbik 5 an thi tiah theih a si. I kahnak hi a daihrih lo caah Yinma,Tawngsayi,Kuyin,Minbu khua mi hna cu a himnak hmun ah an i dor hna.
Thathung peng Thungbogyi khua le Tthungbolay khua le Wezaw khua pawng i September 23-24 kahdohnak ah KNU Sniper nih ralhrang 2 a kahthah hna tiah KNU sinin theih a si. September 23 chun ah Tthungbogyi- Tthungbolay khua pawng ah KNU Battalion (1) le ralhrang karlak caan tlawmpal te chung kahdohnak a chuak i KNU lei thlahmi meithal kuan nih ralhrang pakhat a khen i a thi.
September 24 ah Wezaw khua hlei pawng ah ralhrang thazaang chap ah a rak rami ralhrang hna cu KNU Battalion (1) in Sniper nih a kahthan hna i ralhrang pakhat a thi than. ”Wezaw khua nichuahlei i ummi hlei pawng ah pura an um i cu pura kam ahcun ralhrang nih hmun an khuar i ralhrang thazang chap ah a rami Brigade (22) tang Khah-Mah-Yiah (20!) an si Sniper in pakhat kan thah. Cun Tthungbogyi -Tthungbolay kam ah Sniper in pakhat kan thah tthan” tiah KNU in nawlngeitu pakhat nih a chim . Than Lwin Times
Mandalay, Awngmay Tarsan peng Shwegyin checkhlatnak gate ah September 25 zinglei suimilam 9:00 hrawng ah bombpuah nak a chuak. Cu bomb puahnak ruangah ralhrang phu chungin minung pakhat le an pawngkam ummi nu pahnih nih hliam an tuar tiah khuami hna nih an chim. “Bomb puak mi hi a dik ko, zinglei ah a puak,
Checkhlatnak gate ah ummi ralhrang minung pakhat hliam a tuar, cun an pawngkam ummi minung pahnih zong nih hliam an tuar, cu ka hmun cu checkhlat nak gate a si caah ralhrang cu an um zungzal” tiah cu ka hmun pawng ummi minung pakhat nih a chim. Puahkehnak a chuah tlawmpal ah nawlngeihnak la tu ralhrang phu hna nih an hriam he cu ka hmun pawng ah lam phih nak le checkhlat nak an tuah. DVB
Leave a Reply