Tu zaan zaanttim sml. 1:00 hrawng in Chin Oo Sii sang hrawng in bomb puah thawng le meithal kah thawngpang pehzul in a thang than

Tu zaan Hakha khua ah bomb le meithal thawng pehtlai in a thang than – September 9 Hakha khua ah tu zaan, September 9 deilei suimilaam 1:00 in meithal le bomb thawng pehtlai in theih a si than. Meithal le bomb thawng cu MEB Bank le Zungkomh Zung hrawng ah theih a si i a thi mi le aa hliam mi an um le um lo theih a si rih lo. “Meithal hi zun 200 ring lo a si lai. Bomb thawng cu voi 15 hrawng a si lai.

An i kahnak hi Suhpawng zung (Zungkomh zung) hrawng ah a si i, hmun dang zong ah a si ve kho,” tiah Dawrthar sangmi pakhat nih a chim. Atu hi thawng kan tial ah hin bomb le meithal thawng a dai rih lo. Caan karlak ah cikkhat a dai nain aa peh than. Suimilaam pakhat leng aa peh cang. NUG nih D-Day a thanh zaan, September 7 zaan zong ah Hakha ah meithal le bomb puah nak a um i, ChinOoSi sang ah khuami pakhat hma a put leng ah inn zeimawzat zong a rawk. TheHakhaPost

China Communist Party sawmmi biaruahnak ah NLD le USDP an kai lai China Communist Party hruainak in 2021 September 9 i tuah dingmi ramkheel party ton biaruahnak ah Myanmar ram in NLD le USDP party an kai lai tiah theih a si. Hi ton biaruah nak ahhin, “Ramkheel party hna i fonh khawh ding kongkau le tuahsernak in thanchonak lei ah zeitindah a kal khawh lai,” timi tlangtar in bia an i ruah lai.

Hi biaruahnak hi Online in Vitual Meeting in an tuah lai. Hi biaruahnak ah China lei nih Myanmar ram in ramkheel party ngan 4 an sawm hna i NLD le USDP hi kai an i timh a si. Hi biaruahnak ah an kai ding kong he pehtlai in USDP party chimphuannak nawl ngeitu Dr. Nanda Hla Myint nih, “Kan nih party in cun party chung in mino lei thanchonak committee in lutlai changtu Dr. Thant Zaw Lwin a kai lai,” tiah a fb cahmai ah a langhter. The Hakha Post

SAC mithat phu nih Kalay, Tin-tar khua inn nga mei in an khangh Sagaing Ramthen, Kalay Peng chung khuate cheukhat ah SAC mithat phu hna nih umhmun an khuar i, khuami hna inn an khangh lawng si loin minung pasarih zong an tlaih hna tiah theih a si. Khualuhnak hauka in SAC mithat phu hna nih mikip le innkip cu an check hna i a hrem zong an hrem hna. Hi bantuk tuansernak an ngeih ca ah khuami hna nih an tih i minung 1000 leeng khua an chuah takin an zaam tiah kan theih.

NUG nih D-Day a thanh hnu September 8 zong ah Kalay Peng Tin-tar khuachung ah lut in inn nga an khangh. Inn an khanghmi kong ah khuami pakhat nih, “Inn an khangh mi hi a dihlak ah inn nga a si. Inn nga chung ah inn hnih cu kan phalh manh. Inn thum hi vutcam ah a cang dih. Minung aa hliammi cu an um lo,” tiah a chim. Inn an khangh lawng si loin khuami minung 10 an tlaih hna. Pahra chung ah pahnih hi nu an si i nu pawl cu an thlah than hna tiah VOA nih a langhter. . The Hakha Post

Be the first to comment

Leave a Reply

Your email address will not be published.


*