Tluksum In; Thawngpang chia kho taktak theih a si e!!

Chin RamKulh Thawngpang Fonh!!
====================
Hakha le Thantlang kar Auto tlang ah Chin ralkap le SAC ralkap kahdohnak a chuak, tiah theih a si. Nihin October 13 zanlei sml 3:00 hrawng ah Hakha le Thantlang kar Auto tlang ah Chin ralkap le SAC ralkap kar kahdohnak a chuak, SAC ralkap lei a thimi le aa hliammi theih khawh a si rih lo.

Cun nihin October 13 zanlei ah Hakha Education Degree College ah kahdohnak a chuak i, SAC ralkap a thimi an um pinah 3 hliamhma an pu. SAC ralkap meithal zun hnih le kuan tam ngai Chin ralkap nih an lakpiak hna, tiah min langhter a duh lomi pakhat nih The Chin Post ah a chim. SAC ralkap a thimi le aa hliammi an tam caah nihin October 13 zan sml 6:00 in 6:30 tiang ah hriamngan 120mm voithum an puah cang, Hakha pi a tlerh dih, tiah tualchung mi pakhat nih a chim.

Nihin October 13, Hakha-Thantlang kar le Hakha Education Degree College, hmun hnih, SAC ralkap le Chin ralkap kar i kahdohnak ah SAC ralkap lei in minung 15 hrawng an thi tiah theih a si. CNA ralkap pathum an nunnak a liam ve i CDF ralkap pakhat telh in minung pali an umnak theih an si rih lo tiah theih a si. CDF Thantlang, Battalion 1 in minung pakhat hliamhma a pu tiah theih a si. Thawngpang update thanh than khawh kan hun i zuam lai.

Dr. SaSa Hringtu Nu A Nunnak Liam, NUG Cozah i Pyidaungsuh Vuanci Dr. Dr SaSa nih a nu Pino. Mazai (kum 70) cu October 13 ah Cancer in a nunnak a liam.Ramchung ra leng um Dai miphun i funtomnak, International Dai Community (IDC) cu 2022, August 14 ah dirh a si cang tiah IDC nih nihin October 13 ah cathanh an chuah tiah theih a si.

Chin ramkulh, Mindat, Kanpetlet, Matupi le Paletwa peng ah a ummi Dai(Chin) miphun kar ah i dawtnak, i funtomnak, hmunkhat rianṭuan ṭinak he miphun ṭhanchonak rianṭuan dingah covo tampi sunghnak tampi kan ton tiah an cathanh chuahmi ah cun an langhter.

A cunglei ah langhtermi sunghnak in kan i chanhchuah ding ah a fekfuan mi phu pakhat dirh a hauh caah International Dai Community (IDC) phu dirhnak hi a si. International Dai Community (IDC) ah phu 7 an um i cu hna cu Dai Community India, Dai Community India(Mizoram Branch),

Dai Community (Myanmar), Dai Community(Malaysia), Dai Community( North America), Dai Literary and Culture Committee(Myanmar) le Dai Bible Translation Team phu hna an si, cu hna phu nih cun ṭha tein biaruahnak an ngeih hnu ah a tubantuk in IDC an dirhnak hi a si tiah theih a si.

A luancia ni 3 hrawng ah khan Chin ramkulh, Matupi ah phone line rawh hram a rak i thawk i, nihin October 13 tiang ah phone line a ngah rihlo tiah theih a si. Atu ah meng 70 hmun tower tung in thlahmi phone signal lawng in Matupi ah phone i chawnhkhawh a ngah tiah theih a si.

Tualchung mi hna nih an chimning ah cun “phone tower tung ah diesel a dih caah phone line a thihnak hi a si” tiah an chim. “Kan theih ning ah cun Chanpian khua ah diesel va cawk awk cu a um nain, va kal tik ah SAC ralkap nih tamtuk an rak i lak tawn caah a hohmanh nih va la duh lo” tiah tualchung mi pakhat nih a chim.

CDF-Zotung nih October 13 ah cathanh an chuah ning cu a tanglei bantukin a si; (1) 2022, October 9 ah Mara hmunram Ngaphaipi ah MATC/MDF le CDF-Mara + ZZLMS kar a cangmi kahdohnak ah CDF-Zotung i telnak kan ngeilo. (2) CDF-Zotung Supreme council cu ZZLMS chungtel a silo leng ah zeibantuk kong hmanh ah i thlaknak a ngeilo.

(3) CDF-Zotung min i bunh in ZZLMS sin ah a lutmi hna cu 2022, June 14 ah CDF-Zotung Supreme council nih CDF-Zotung phu chungtel sinak in chuahmi 47 chung in an si tiah theih a si. (4) CDF-Zotung Supreme council cu Chin ramkulh chung ah a cangmi buaibainak kong ah ton biaruahnak ngei in hlohchuah a duhmi phu kan si.

(5) Cucaah Mara miphun kar a cangmi buainak kong ah ZZMLS nih minung thazaang le hriam thazaang hmang in an i telmi cu kan doh. (6) Hriamtlai Chin miphun hna i funtom in nawlngeihnak a la tu SAC ralkap doh dah tilo, Chin miphun pakhat le pakhat kar a cangmi buainak ruang ah hriam thazaang hman cu kan doh. (7) CDF-Mara le MATC/MDF kar a cangmi buainak kong ah kap hnih hruaitu ton biaruahnak ngeih in cu buainak hlohchuah ding ah kan in forhfial hna.

Chin ramkulh, Kanpetlet peng, no. 6 sangah, rithaisi zuar le phurhnak kong he pehtlaiin, CDF-Kanpetlet le Mipi ukhruainak phu hna nih faak piin dantatnak tuah ding tiin a luancia 2022 February 26 ah rak ceih a si.

SAC nih nawlngeihnak an lak hnuin, Kanpetlet peng ah, rithaisi a tawngthamtu an tam, a herh lo ah buainak tampi an chuahter lengmang caah, mi a ritter kho tu thil paoh cu, Kanpetlet peng chung ah phurh le zuar bak lo dingin mipi ukhruainak phu le CDF-Kanpetlet nih an thanh.

CDF-Kanpetlet le mipi ukhruainak phu nih ralrin peknak cathanh voihnih tiang kan chuah cang ko nain, nawl a zul rih lomi khua te tampi an um rih caah, hi hnu voikhat an zuar le an phurh kan theih rih a si ah cun faak piin dantatnak kan tuah cang hna lai tiah CDF-Kanpetlet in tuanvo ngeitu pakhat nih a chim.

SAC nih uknak a lak hnuin, Kanpetlet peng chungah, buainak a phunphun a chuak i, mipi ukhruainak phu le CDF-Kanpetlet hna i bawm in cu buainak vialte cu tlangtlak khawh kan i zuam. Hi buainak a chuakmi ahhin, zatuak ah 70,(70%) cu rithaisi ruangah a chuakmi buainak a si tiah CDF-Kanpetlet in tuanvo ngei tu pakhat nih cun a chim.

Chin ramkulh, Tedim peng Kalay-Tedim motor lampi ah ummi Taingen khua ah nihin, October 13 zinglei ah SAC ralkap check gate ah ummi ralkap hna cu CDF-Siyin nih bomb puahhnawh in an doh hna caah kaphnih kar kahdohnak a chuak. Kaphnih i kahdohnak ah SAC ralkap kahmi kuan nih kum 16 nu ngakchia pakhat a khen i a hliamh tiah tualchung mi nih an chim.

Kuan hliamhma a tuartu cu Taingen khuami a si i, SAC check gate pawng inn ah a umlio ah a keh lei ban ah kuan nih a hliamh hi a si tiah tualchung mi nih an chim. Nihin Tedim peng i kahdohnak ah SAC ralkap lei in minung 5 an thi tiah CDF-Siyin nih an chim na in RFA nih cun fehternak kan tuah kho rihlo tiah an langhter.

Kalay-Tedim lampi ah ummi Taingen khua ah SAC ralkap nih a luancia thla 9 hrawng in check gate an rak tuah i, khualtlawng umkal mi poh checknak an tuah hna tiah tualchung mi nih an chim.

Mindat Peng, Baw (3) Khua Ah SAC Nih An Tlaihmi Minung 6 Lakah 4 Lawng An Thlah Than Hna!! Chin ramkulh, Mindat peng, Baw (3) khua ah, sualnak ngeilo mipi 6 cu SAC nih nizaan October 12 chun ah an tlaih hna tiah theih a si.
Cu tlaih a tongmi minung 6 cu covid-19 raikhamsi chunh dingah a kalmi an si i, an kalpah ah SAC nih an tlaih hna hi a si.

Zeiruang ah dah an tlaih hna ti tu cu theih a si rih lo. An tlaihmi minung 6 lakah minung 4 cu zaanlei ah an thlah than hna nain, minung 2 tu cu, Mindat khua SAC hrambunh Khah-Lah-Yiah 274 ralkap nih an hren rih ko hna tiah theih a si.

Chin ramkulh, India-Myanmar ramri Rihkhuadar khualeng ah October 11 ni ah pa pakhat ruak an hmuh i an hlawm tiah theih a si. A thimi cu, Aung Htay Min(27) a si tiah theih a si i, Rihkhuadar no. 2 sang, Tio tiva in Haimual khua lei kalnak lam, thlacamnak tlang ah a ruak cu kan hmuh tiah khuami hna nih an chim.

Cu miruak ah cun, hliamhma zong a um pah caah, mi pakhat khat nih an thahmi zong a si kho men tiah khuami pakhat nih a chim. A thimi Aung Htay Min hi, Rihkhuadar no.2 sang Tio tiva ah khua a sami a si i a nupi he fanu pakhat an ngei tiah theih a si.

Paletwa Peng Education Board Hruainak In Siangakchia Ca An Cawng Kho Cang, Paletwa peng Education Board hruainak in Paletwa peng siangakchia hna cu, sianginn an kai kho cang nain cacawnnak caah a herhmi thilri tu cu chambaunak tampi a um rih, tiah theih a si.

“Harnak tampi lak ah sianginn cachimtu saya/mah nan cungah Paletwa Education Board nih lunglawmhnak nganpi kan ngei. Siangakchia hna nih ca cawnnak thilri an herh baumi lawng siloin sianginn cachimtu saya/mah te zong an chanbau rih, cucaah bawmhnak tampi kan herh ko, tiah Paletwa Education Board nih an mah social media ah an langhter.

Chin ramkulh, Tedim khua Lah-Wah-Kah zung le Penguk (GAD) zung a kangh hnu, October 11 zaan ah, SAC nih an duhnak hmun paoh ah hriamngan le hriamhme an kah caah, fa pali a ngeimi Monica Niang Lian Vung (31) a nunnak a liam tiah theih a si.

Mintheih lomi hriamtlaiphu nih zung an khangh hnuin, Tedim hrambunh SAC sakhaan le no.1 Siangsangrun ah a ummi SAC ralkap hna nih hriamngan he hriamhme he an duhnak hmun paoh an kah mi chungin pakhat cu Tedim-Lailu khua kar inn ah a tlak caah, fa 4 ngeimi, Monica Niang Lian Vung(31) a nunnak a liam hi a si.

A ho ti theih lomi hriamtlaiphu nih Lah-Wah-Kah zung a hngak tu pahnih cu tawh an hal hna hnu ah inn cu an khangh.
Cu hriamtlaiphu hna cu kawl holh tha tein a thiammi an si i, Tedim peng chung hriamtlaiphu cu an si kho hrim lo tiah khuami cheukhat nih cun an zumh.

Cu inn kanghnak kong he pehtlaiin, Tedim peng chung hriam a tlaimi PDF-Zoland nih anmah an si lo nak kong fianternak an tuah pinah, mipi hna thinphang in a tuahtu hriamtlaiphu hna cu, hlathlainak kan tuah cuahmah lio hna a si tiah PDF-Zoland nih an langhter chih.

Chin ramkulh, Tedim peng, Taingen SAC check gate cu, nihin October 13 zinglei sml 9 hrawnah, CDM-Siyin phu hna hruainak in an kah hna tiah khuami hna nih an chim. Kahdohnak ah, a thimi an um le um lo cu fiangin kan thei lo nain, mizaw zawnhnak in an i zawnh lio kan hmuh hna tiah khuami hna nih an chim. Crd-The Chin Post

Be the first to comment

Leave a Reply

Your email address will not be published.


*