Shan ram chaklei Phawngsai khuapawng thlacamnak tlang ah ralhrang phu hna le MNDAA phu kar November 19, ni zaan suimilam 9:35 tiang fakngai in kahdohnak a chuak. Cu kahdohnak ah cun ralhrang lei in a thimi le a tlau mi an tam tiah khuachung thawngzamhnak nih a langhter.
Thlacamnak tlang cu ralhrang phu tat-mah 77 nih thazaang tampi he an doh hna caah kahdohnak a fah hi a si, MNDAA phu nih kham in an doh ve hna caah ralhrang lei an fah khun nak le a thimi, a tlaumi an tamhnak hi a si tiah theih a si. Khit Thit Media
Sangau khua hi Lawngtlai district chung ah ralzaam an tam biknak khua a si. Sang 4, Sangau 1,2,3, le 4 tiang an um. Nihin November 20, 2021 ah Sangau-4 i ralzaam camp ah va lenkainak kan ngei hna. Sangau-4 ralzaam camp ah hin ralzaam chungkhar 7, a milu in 28 an um. Camp i Ralzaam a um mi hna hi Thantlang le Hakha in a rak i dormi an si hna. An lak ah hin ngakchia kum 13 tang, 14 an um.
Ralzaam ngakchia hna hi sianginn kai thi tete an si nain, sianginn an kai hna lo. Sianginn kai an duh lo siloin a kai ningcang an theih lo ruang le harsat ruangah an si hna, tiah camp i a ummi nih The Chin Post an chimh. Khuatlang hruaitu YLA le VC hna nih ei le din, mehmua tiang in a caan ah an bawmh tawn hna kong le an umnak camp zong hi anmah thazaang pakhat hmanh tello in Sangau-4 YLA nih an sakpiak dih hna kong an chim fawn.
Sangau khua i a har bikmi pakhat cu ‘ti’ a si. Cozah nih tlawmpal a phawt ko nain, itinzawh cawk a si lo caah khuachung mi zong nih din awk ti hi a cawk in cawk cio a si. Hiti buin camp i ralzaam hna nih cun atu tiangah khuatlang hruaitu hna bawmhnak in dinawk ti an caw rih lo, tiah an chim. Khuasik caan a chuak ding mi cu Sangau-4 ralzaam hna nih hin an ngaihlah bik mi a si kong, an chim fawn.
Puanbu an ngeih lo leng ah an camp cu mau in sakmi a si caah thli luh a fawi i, ruah a sur tikah ruahti a zut pah. Sinain, ruahti a ko deuh cang ko caah hi kong ahcun thinphan awk a um tuk ti lo, tiah an chim. Camp i a ummi hna hi a tam deuh cu ramdang lei in bawmtu ngei lo an si deuh hna. Tulio cu CDF ca ah thawhbur a tam ruangah an cingla rualchan zong nih an kan zoh cawk lo, tiah an chim.
An pawcawmnak ah tuanawk a ummi tete an tuan cio hna i, bawmhnak an hmuh chun tete cu kenret te i hmang buin an nun ve peng kong, The Chin Post ah an chim. “Ralzaam dirhmun cu a nuam lo, nain kan ram ah khan cun mei le kuan lakah ah kan rawl ei kaa zong a thaw kho lo. Zaan zong hngilh kho lo in, lungretheiin kan rak um. Vanlawng a zuan menmen ah kan i thup, mei thal thawng a rin ah cawl ngan loin kan um, kan hna hrim a ngam lo.
Kan ram te cu kan ngai tuk ko, nain kan nunnak a him hi kan duh bikmi a si ko. Hika hmun ah harsa ngaiin um hmanh usihlaw, kan nunnak ca ah lungretheih awk a um lo mi hi kan i nuam bik ko, Sangau YLA le a kan bawmtu vialte cungah kan i lawm,” tiah Camp i a ummi pakhat nih The Chin Post ah a chim.
Leave a Reply