Thla 6 Chungah Kawlram Ngandamnak Riantuan Voi 250 Leng Tuk An tong

Thla 6 Chungah Kawlram Ngandamnak Riantuan Voi 250 Leng Tuk An tong Ralhrangbu nih hramhram in uknak a lak hnu February thla in July thla tiang thla 6 chungah mipi ngandamnak rian a tuan lio mi hna ralhrangbu nih thihphaih le a tuk mi voi 252 le minung 25 an thah hna tiah Insecurity Insight, Physicians for Human Rights (PHR) le Johns Hopkins University Center for Public Health an Human Rights (CPHHR) nih a thanh.

Atu bantukin ngandamnak lei riantuantu (health worker) hna thihphaih le tukvelh an ton peng caah Covid-19 dohnak kongah an riantuannak zong a hnuar phah.

Ralhrangbu nih ngandamnak riantuan 192 an tlaih hna, a thi mi 25 an si cang, a hliam mi 36 an um.Sii inn 86 cu an luthnawh i mah lakah sii inn 55 cu ralkap nih hmunhma khuarnak ah an hman.

Ralhrangbu meithal ngan kuan nih a khen ruangah sii inn, sii khan le ngandamnak lei zohkhenhnak hmunhma a rawk mi 17 a um.

Covid mizaw zohkhenhnak pakhat cu kharpiak an si tiah Washington ah hrambunhmi PHR report nih a langhter.

Mah hi UN security council nih biachahnak a ngei mi buainak, raltuknak a umnak hmun ah ngandamnak lei riantuantu hna cu harnak nan pe hna lai lo, kilvennak tha tein pek ding ti mi cu ralhrangbu nih a buar mi a si tiah an chim.

Hi ruangah ngandamnak lei riantuantu hna kilvennak le himnak pek dingin PHR le CPHHR nih ram dang chungkhar hna sin ah nawlnak an tuah tiah an report nih a langhter.

The Chin Post