ThiPaw Khuapi Ah A Tlau Mi PaanLung Khuami Chungkhar khat Minung Pa 3 A Tu Tiang Pehtlai Khawh An Si Rih Lo
====================================
Shan ram thlang lei, ThiPaw (သီပေါ) khuapi chungah a tlau mi Nanmathu pengkulh, PaanLung khuate ah a um mi chungkhar khat minung pa 3 hna cu a tu tiangah chungkhar hna nih pehtlaih khawh le an um theih a si lo tiah an chim. A tlau mi chungkhar khat hna pa 3 cu a luancia mi July ni 21 ah a fanu a si mi Ma Aitha Kyaw (20) cu a ha tuah dingin a kal i Thipaw khuapi ah a tlau tiah theih a si.
Cu hnu ah anu le a ta pa cu vazoh dingin an va kal ve i July ni 22 ah an pa 2 ningin Thipaw khuapi chungah an tlau ve tiah theih a si. A tlau mi chungkhar he aa neihniam mi pakhat nih, ” Kan mah lei nih an tlau hnu ah, PaanLung, ManLi, PanThaPya khaute hna ah minung tampi in kan kawl hna. Kan hmu kho bak hna lo. A tu tiang zongah pehtlai khawh an si lo. Aa techia mi cu Thipaw khuapi chungah an tlau lai.” tiah a chim.
Ma Aitha Kyaw (20) cu July ni 21 zaan ah Thipaw khuapi chungah a um mi Hotel ah a riak i zaan suimilam 11 hrawngah hriamtlai phu khat nih an tlaih tiah thawngpang a leng mi kongah hlethlai an si tik ah, ” An nih cu ramkhel he zeihmanh pehtlainak a ngei mi an si lo. Lamzawhank zongah aa tel mi an si lo.
An tlau ning zong hi tlaih phun cu an si lai lo. Zei ruangah an tlau timi hi theih a si ko nain a phichuak hi aa techia lai lo kan ti caah a tu ting ah zohfelnak kan tuah lio a si.” tiah a chim chap. Ma Aitha Kyaw (20) tlaih a ton hnu ah, a nu le a ta an tlau lio ah Thipaw khuapi ah a um mi SAC ralhrang gate zaa piin a tum a kal mi motor, Cycle tibantuk in zei poah hlethlainak an tuah tiah ThiPaw khuapi chung um pakhat nih a chim.
India Ram Ah Zu Din Sualnak In Minung 40 Leng An Thi Cang!: India ram nitlak lei ah zu(alcohol) dinsualnak in minung 42 an thi i, minung 100 fai siizung an phan, tiah ṭuanvo ngeitu palik nih July 28 ah an chim. Phunghram nih a onh lo mi zu a zuartu pawl cu tlaih ding in cozah nih nawl a chuah colh.
Gujarat ramkulh khua cheukhat ah an zuar mi zu pawl cu Methanol tam tuk aa tel i, zu ding pawl nih an i din sual ruangah tuzarh chung lawng ah minung tam ngai zawfak in an um, tiah theih a si. Zu dinsualnak hin Botad pengkomh in minung 31 an thi cang i Ahmedabad pengkomh zong in minung 11 an thi cang, tiah palik ṭuanvo ngeitu hna nih an chim. Mining 97 cu siizung ah an i thlopbul lio a si i minung 2 cu an zualhma ngai, tiah theih a si.
Prime Minister Narendia Modi a chuahnak Gujarat ramkulh cu India ram ah zu zuar le din zong an khapnak hmun pakhat a si. Ṭuanvo ngeitu hna nih Gujarat ramkulh i phung ning loin on mi zudawr vialte cu an hrawh dih i, a zuartu zong an tlaih hna, tiah theih a si. PDF Lemcang In SAC Ralkap Sin Thawngpetu Pakhat Cu Bago PDF Nih An Tlaih!: Bago ramṭhen, Bago peng ah PDF ralkap lemcang in SAC ralkap sinah thawngpang a thanhtu minung pakhat kan tlaih, tiah Bago PDF nih nihin July 28 ah cathanh an chuah. PDF nih an tlaihmi cu Civil-PDF in ṭuanvongeitu pakhat si mi ralkap San Shia a si, tiah an thanhmi ah cun an langhter.
San Shia cu Bago khuachung cawlcanghnak ah aa tel mi a si i, “Khuachung um a him lo” ti in July thla lai hrawng ahkhan Kayin ramkulh chung tlangcung hriamtlai phu umnak hmunram ah a zaam, tiah theih a si. Hmundang i a zaam tikah a hawile PDF nih an lunghrinh i checkhlatnak an tuah. San Shia nihcun Bago um hriamtlai phu hna cawlcanghnak vialte cu SAC lei ṭangmi Han Ngein Oo telegram channel ah thawng a rak peknak hmuh a si, tiah Bago PDF he naihniam in ummi nih an chim.
A luancia July 7 i Bago mino 9 tlaihkhih an rak tonnak zong, San Shia ruangah a si lai, tiah Bago PDF cheukhat nih cun lunghrinhnak an ngei. Bago PDF nih Bogo tualchung hriamtlaitu phu dang hna cu San Shia aa telnak CPDF he pehtlaihnak tuah lo ding in an chimhruah hna i, tlaih a tongmi CPDF chungtel San Shia cu dan kan tat lai, tiah Bogo PDF nih cun an langhter.
SAC Ralkap Nih Gangaw Peng le Zotung Lei ah Rallam An sial I Khuami 30 Hrawng An Tlaih Hna!: Magwe ramṭhen, Gangaw peng in Chin ramkulh Matupi peng Zotung ram lei ah SAC ralkap hna cu July 24 in hmunhnih ah rallam sial in khuami 30 hrawng an tlaih hna, tiah theih a si.
SAC ralkap hna cu Zotung ram, Zungnat (ယုံနက်) khua in Tilaw (တီလော) khua lei ah rallam hmunkhat in an sial; cun Gangaw le Zotung ramri Zipia(ဇီးပြား), Antta(အန့်တာ) le Ramsi (ရမ်စီး) khua lei ah lut in Ramsi (ရမ်စီး) khuami 30 hrawng an tlaih hna, tiah Supreme Council CDF-Zotung in ṭuanvo ngeitu pakhat nih a chim.
Ṭuanvo ngeitu nih cun, “Hmunhnih in rallam a sialtu SAC ralkap hna cu minung thazaang 80 hrawng an si i, phu khat cu Ramsi (ရမ်စီး) khua pawnghrawng chekhlatnak le thianhhlimhnak an tuah dih hnu ah Ramsi (ရမ်စီး) khuami 30 an tlaih hna, a dang phu khat cu Tilaw (တီလော) lei ah an kal,” tiah a chim.
“SAC ralkap hna nih rallam an sialnak lampi Zipia (ဇီးပြား) le Antta (အန့်တာ) khua kar ah aho si theih lo miruak 2 hmuh a si i, SAC ralkap kut in nunnak liammi an si lai. “Rallam sialtu SAC ralkap phu khat cu Ramsi (ရမ်စီး) khua pawng ah cawlcanghnak an tuah i, a dang phu khat cu Tilaw(တီလော) in Rezua – Matupi lei hoih in an kal lai tiah zumh a si,” tiin Supreme Council CDF-Zotung in chimphuannak nawlngeitu nih cun a chim.
Tualchung mi hna cu SAC ralkap rallam sialnak hmunhma ah khualtlawng lo ding in le um kallo ding in Supreme Council CDF-Zotung nih ralrin peknak zong an thanh cang. SAC ralkap hna nih cun a luancia July 20 in Gangaw le Htilin peng phone line le internet line an thah caah tualchung thawngpang le thil sining fiang in theih khawh a si lo.
Bago Ramṭhen Paungdae Peng Kahdohnak Ah SAC Ralkap 4 An Thi: Bago ramṭhen, Paungdae(ပေါင်းတည်) peng Thitpoke(သစ်ပုတ်) khua kahdohnak ah SAC ralkap ralbawi pakhat telh in ralkap 4 an thi i, meithal 2 le kuan zeimawzat kan lak khawh, tiah Paungdae(ပေါင်းတည်) PDF in chimphuannak nawlngeitu nih a chim.
July 28, chunhnu suimilam 1:30 ahkhan Paungdae (ပေါင်းတည်) peng Thitpoke(သစ်ပုတ်) khua i tower hngaktu SAC ralkap hna cu Paungdae(ပေါင်းတည်) peng tualchung hriamtlai phu hna nih an kah hna. Cu kahdohnak ah cun ralbawi 1 le ralkap 3 hna cu an thi. Tualchung hriamtlai phu lei nih MA 3 pakhat, pistol 1, phone 4 le ID card pakhat an lak khawh, tiah theih a si.
Tuluk Thonginn Nawlngeitu Nih Myanmar Rammi Minung 90 Myanmar Ah An Kuat Hna!: Tuluk(China) ram thonginn hmun dang cio ah an hren mi Tuluk ram um Myanmar rammi minung 90 cu Tuluk cozah nih July 27 ahkhan Myanmar ram ah a kuat hna, tiah theih a si. Tuluk thonginn i an hren mi hna cu Kachin ramkulh Waingmaw(ဝိုင်းမော်) peng, Kaanpaihthi(ကန်ပိုက်တီး) khuapi ah a ummi,
Myanmar le China pehtlaihnak tunnel in an kuat hna, tiah theih a si. “Kaanpaihthi(ကန်ပိုက်တီး) ah ummi ramhnih pehtlaihnak tunnel in an kan kuat. Tuluk siizung ah ni 40 le thonginn ah 20 kan um. Thong chung ah a taang mi cheukhat an um rih, thla dih ahcun an thlah khawh men hna,” tiah thonginn in a chuakmi pakhat nih a chim.
Myanmar rammi minung 90 hna cu Myitgyina an phan cang. Quarantine in ni 5 chung an um hnu ah anmah le umnak khua cio ah an kir lai, tiah theih a si. Nu pawl cu Myitgyina siizung ah an um i, pa pawl cu pengkomh letecelhnak hall ah an chiah hna. Myanmar rammi hna cu- 2020 covid rai a chuah hnu ah rianṭuan awk a ngei ti loin, phaisa a ngeih ti lo caah Tuluk palek sin ah an i ap i, mah umnak cio ah kir ṭhan ding in timhtuahnak an rak ngei, tiah theih a si.
Tuluk ram ahhin Myanmar mi minung 5000 fai an um i rammi (Tuluk mi) sinak an ngeih le ngaih lo embassy le ṭuanvo ngeitu nih an chek hna hnu ah Myanmar mi hna cu Myanmar ram ah kuat ding in tawlrel an si lai, tiah Muse hrambunh mibawmchantu phu in chungtel pakhat nih May tha thawkka ahkhan a rak chim.
Leave a Reply