NUG nih D-Day a thanh hnu Chin Ramkulh Peng li chung ah meithal le bomb thawng theih a si National Unity Government (NUG) nih September 7 i Myanmar ramhuap in D-Day a thanh hnu Chin Ramkulh chung Hakha, Mindat, Kanpetlet le Thantlang ah ah meithal le bomb puah thawng theih a si. Hi peng li chung ah Hakha khuapi chung in khuami pakhat meithal kuanfang nih a khen i a nunnak ca ah tihnung tuk cun a um lo tiah kan theih.
Atu bantuk in peng li chung meithal le bomb thawng theih mi chung ah Mindat hi September 7 zaanlei suimilaam 3:00 hrawng ah CDF-Mindat le SAC an i kap. Hakha hi zaan suimilaam 9:45 hrawng in khuachung ah bomb le meithal thawng theih a si (CDF he maw an i kah ti bel cathanh a chuah rih lo ca ah kan fehter ngam rih lo). Thantlang khuapi chung hi SAC lei nih zaanlei a muihka in hriamnam ngan Bomb tam ngai an puah ve. Khuami aa hliam mi le a thi mi cu an um lo.
Kanpetlet zong September 7 zaan suimilaam 10:00 ah Palek sakhan pawng in Minute 20 chung meithal zuun 50 fai puah thawng theih a si i aa hliam mi le a thi mi an um lo tiah kan theih. September 7 Hakha khuachung thawngpang theih mi kong he pehtlai in khua mi pakhat nih, “Zaan suimilaam 9:45 hrawng in thawng kan theih. A thaizing ah thawng kan theihnak pawngkam kan zoh tik ah inn le biakinn an rawk ngai.
SAC lei zong an i chok ngaingai,” tiah a chim. Myanmar ramhuap zong in peng kip le hmun kip ah NUG nih cathanh a chuah hnu bomb le meithal puah thawng a thang i hliam a tuarmi tlaihkhih a tong mi le a thi mi zong an tam tiah kan theih. Septembar 9 zan ah Hakha Khuachung Hmun Kip ah SAC Ralhrang nih Drone an Zuanter Nihin deilei sml. 1:00 hrawng in Hakha khuachung ah bomb puah thawng le meithal kah thawng a thang i atu ca kan ttial tiang hin karlakthlak in puah thawng a thang lengmang nih.
Chin-Oo-Sii le Khuathar lei ah SAC ralhrang nih Drone an zuantermi thawngpang theih a si bang in Pyidawtha, Darhlun lei zong in Drone a zuan thawngpang an theih hna. Abikin, Chin-Oo-Sii lei in puah thawng le kah thanwg theih a si i Rungtlang lei zong in meithal thawng le bomb puah thawngpang a thang tiah khuami cheukhat nih an chim. Asinain, Rungtlang lei in bomb puah le meithal kah thawngpang a um le um lo The Chin Journal nih kan fehter kho lo. The Chin Journal September 9, Hakha
KNU/KNLA adjutant master)a tlai tu Major Gen. Saw Pi La Sein cu tuzing suimilam 5, September 8 ah Thai ram, Maesot sii inn ah a nunnak a liam. Major Gen. Saw Pi La Sein hi zunthlum, thisen sang, lung zawtnak a ngei mi a si i, chantlingin a nunnak a liam mi a si. A ruak vui a si hnuah thildang a herhmi hna cu tawlrel a si te lai tiah a fanu Naw Ka Sia nih KIC sin ah a chim. Major Gen. Saw Pi La Sein hi 1964 march 15 ah KNU ah miphun dohthlennak riantuan hram a thawk mi a si i, ralkap lei rian changchang in a tuan hnu 2004 ah general rank in adjutant master rian khinh a si i,
A thi ah kum 75 a si cang. Amah hi a liam cang mi KNU chairman hlun le KNLA bawizik Gen. Saw Ta Ma La Baw fapa pahnihnak a si i, KNU vice chairman hlun P’do Naw Si Poe Ra Sein upa a si. A ruak hi Maesot, Theksabang thlanmual ah nihin ah vui a si lai i, a dap cu KNU umhmun pakhat ah ralkap phungning tein vuinak caan hman a si lai tiah theih a si. Major Gen. Saw Pi La Sein nih hin a nupi Naw Sei Sei, a fa 4 le a tu le a kaltak hna. Ref; KICEnter
Leave a Reply