Thilin Peng Ah Mipi Riahcaw Fir Ding In A Kal Mi SAC Ralkap Kah An Tong!

Thilin Peng Ah Mipi Riahcaw Fir Ding In A Kal Mi SAC Ralkap Kah An Tong!: Magwe ramṭhen Thilin(ထီးလင်း) peng ah riahcaw fir ding in a kal mi SAC ralkap hna cu mizapi ralkap nih rak bawh in an kah hna caah ralkap 3 faak ngai in hliam an pu, tiah YDF (Thilin) nih an thanh. Shwe Aung Thar(ရွှေအောင်သာ) khua ah umhmun a khuar mi SAC ralkap hna cu (June 16) tuzing Sml 5 tluk ah Aung(အောင်း) khua i mipi hna tirawl, riahcaw ah fir ding in Aung khua lei an panh lio ah kah an si, tiah theih a si.

SAC ralkap hna le mizapi ralkap hna cu Sml 1 chung faak ngai in an i kap i, zing Sml 7 hrawng ah kahdohnak a chuak ṭhan. Sml cheu chung hrawng an i kap ṭhan, tiah theih a si.

“Aung le Shaw Aung Thar in meng 4 tluk aa hlat. Thazaang 800 tluk a simi SAC ralkap hna cu Shwe Aung Thar ah umhmun an khuarnak thla 6 a si cang. An riahcaw a dih caan poh ah an pawngkam khua ah an fir tawn. Nihin cu an ra lai ti thawng kan theih i rak bawh cia in kan kah khawh hna,” tiah YDF- Thilin in rian ngeitu pakhat nih People’s Spring media ah a chim.

Kahdohnak a chuah hnu zing Sml 9 hrawng ah SAC ralkap hna cu an kut lawng in an kir ṭhan tiah a chim chap. SAC ralkap 3 cu faak ngai in hliam an tuar i, a thi mi an um le um lo cu fiang in theih a si rih lo. YDF lei hliam tuar um loin hnu an tolh ṭhan, tiah theih a si. Cred : The Chin Post