Karen ramkulh, Myawaddy pengkomh, Mawlarmyan pengṭhen, Kuichephawh khua ah April 8 chun ah SAC ralkap nih Lo kalmi mimung 2 an thah hna, tiah tualchung mi hna nih an chim. SAC ralkap nih an thah mi hna 2 hi Mawpo Kalu khua mi an si i, Kuichephawh khua ah leithuannak seh he an kal pah ah SAC ralkap pawl he an i tong i, SAC ralkap hna nih cun an kah thah hna, tiah khua mi pakhat nih a chim.
SAC ralkap nih an thah mi, tualchung mi 2 hna hi kum 40 in kum 50 kar hrawng an si i an ruak cu SAC ralkap nih khua mi an pek hna caah nihin April 8 ah an vui colh hna. Karen ramkulh, Myawaddy pengkomh chung ah hin KNLA, KNDO le SAC ralkap kar Kahdohnak a chuak lengmang i SAC ralkap thi an tam deuh peng, tiah DVB nih a tarlangh.
Saw khuapi Palik Sakhan Bomb Puah A Si: Magwe ramṭhen um Saw(ဆော) Palik sakhan le Information office cu April 8 zinglei ah Yaw hriamtlai phu nih bomb kan puah hna, tiah Yaw hriamtlaitu nih an thanh. Minung thazaang le hriamnam kan i thlau tuk ruangah lamhlat kahnak lawng in kan kah hna, tiah ṭuanvongeitu pakhat nih a chim.
Yaw hriamtlaitu phu hna nih hin anmah tein hriamthil; Drone le bomb hna an i ser i, hneksaknak zong an tuah pah cang. Hriamthil zeimawzat cu hlawhtling tein an ser khawh cang, tiah theih a si. Hriamthil ser cuahmah lio mi an ngei hna i, meng 7 a kap kho ding hriam zong an ser cuahmah lio a si. Sinain hriamthil sernak ah phaisa le thilri(raw material) pawh an herh tuk kong an chim. Cred : The Chin Post
Leave a Reply