Sagaing ramttem , Monywa- Mandalay motor lampi lampi ChawngOo le Myinmu kar ah bomb hmanhding in a kalmi tualchung hriamtlai phu hna le ralhrang ralkap ralvengtu kar kahdohnak a chuah i ralhrang ralkap lei 2 an thi tiah Myaung TGR nih an thanh .
Motor 6 he ralvengmi ralhrang ralkap hmaikal motor 2 in ralkap hna nih tualchung hriamtlai phu hna cu an hmuh hna caah an kah hna caah kaphnihkar kahdohnak a chuak tiah theih a si. ” Bomb hmanh ah kan kal, ralhang ralkap nih ral vennak an tuah kan theilo, kan mah cu cycle he bomb hmanh dingin kan kal ah an kan hmuh caah kahdohnak a chuak, kan mah lei cu meithal pahnih lawng kan ngei, lam cungah si lo in ramlak dum chungah kan tli, kan tlik pah in an kan kah.
Kan kah ve hna i pakhat cu kan khen caah a thi, ” tiah Myaung TGR t hruaitu Bo Tiger nih a chim. Ralhrang ralkap 2 an thi, tualchung hriamtlai phu lei in minung 1 hliamhma a tuar, Tualchung hriamtlai phu lei minung 7 kan si cycle 5 he bomb hmanhding in kan kal na in, Ralhrang ralkap nih an kan kah caah kan nun himnak ding ah tlikzaam in hnu kan tolh i cycle 2, bomb lung 4 , battery 7 le meihri bawmhnih a dihlak ah tulio phaisa in sing 12 man leng kan sung tiah an langhter.
Innkang nak kong relchap; Nihin April 27 zinglei suimilam 9:00 hrawngah Myitgyina khuachung Mingkhing sangah phone battery tunnak in puahkehnak a chuak i inn kanghnak tiang a chuak tiah theih a si. Mei kanghnak ruang ah cun dothnih inn pakhat, datkhat inn pakhat le a pawngkam ah ummi Biakinn hall a kaang tiah sangchung ummi pakhat nih The 74 Media ah a chim. ”
Electric wire a sawt tiah an chim, phone battery tun khawh in puahkehnak a chuak, inn cu a tlaih dih, hall cu a dihlak in a kaang dihlo” tiah a chim. Minutes 30 tluk mei a kaang, mei kanghnak ruangah hliamhma tuarmi an umlo tiah a chim chap. Kachin ramkulh Myitgyina peng Palanah khua cozah rubber cinnak hmun zung pakhat zong nizaan ah a kaang tiah theih a si.
Relchap; Ralhrang ralkap pawl Nih Nawl Ngeihnak Lak Hnu Ni 450 Chung Ah Thah A Thong Mi 1798 An Si Cang AAPP nih April 26 tiang thawng a thanh mi ah Myanmar ram pumpi ralhrang nih uknak a lak hnu ni 450 chung ah ralhrang ralkap nih an thah mi civil mi 1798 an si cang tiah theih a si. Tlaih a tong mi 13401 tiang an si cang. Tlaih ding in nawl chuah mi 1977 an si. ralhrang ralkap nih an thah mi hna hi Yangon ah a tam bik an si.
Kahdohnak kong relkhap; Sagaing ramtthen, Minkin peng Zin Kalay khua pawng ah ralhang ralkap khah-lah-yiah 87 in ralkap thazaang 150 tluk cu nizaan April 26 zing ah tualchung mipi vengtu phu 6 i bawm in an kah hna i ralhang ralkap 21 an thih pin ah hliamtuar an tam tiah Anti- Dictatorship People Revolution Army( DRPA) nih thawng an thanh. Ralhrang ralkap nih cun khuate pawl an khangh i mipi hnahnawhnak an pek hna ruang ah PDF hna nih an kah hna nak hi a si.
Nizaan zing Sml 8 hrawng khan kah an si i kahdohnak cu minutes 15 tluk a rau, ralhrang ralkap hliamtuar an tam, PDF an cycle 2 a rawk i hliam tuar um lo tein hnu an tolh kho than tiah DRPA nih a langhter. Cu ralhrang ralkap hna cu DRPA, FRF, GALAXY FORCE DEPEYIN – pah-kah-phah , Sagaing PDF batallion 3, MDF le Tan Pauk tualchung mipi vengtu phufonh hna i bawm in an doh mi hna a si tiah theih a si.
Leave a Reply