Thawngthar : Kan Pasaltha hna le SAC Ralhrang kahdohnak ah Ralhrang ralbawi telh in 5 an thi, hriamnam an laak fawn

Karen Ramkulh Ah Rallam A Sialmi SAC Ralkap Kahdohnak Ah Ralbawi Telh In 5 An Thi The Chin Post  2023 May 1 Karen ramkulh, Karen hriamtlai phu hna nih humhimnak an laaknak hmun hriamngan in voi 90 leng a kaptu SAC ralkap hna cu rallam an sial caah kan kah hna i ralbawi Major 1 telh in ralkap 5 an thi, tiah Cobra Column Company 4 nih April 30 ah

cathanh an chuah. April 29 ah SAC ralkap nih hriamngan voi 90 leng cunglei an kah pin ah Missile in voi 8 an kah hnu ah rallam an sial i, Karen hriamtlai phu hna nih an kah hna, tiah theih a si. Cu kahdohnak ah SAC ralkap Battalion 207 in ralbawi 1 le ralkap 4 an thi. Kah Pah Sah meithal kuan 67, MA 5 zun 1, MA 5 kuanbawm 1, 9mm kuan 15, MA kuanbawm 4, walkie Talkie 2

Enaga bomb lung 4, RPG lung 3, RPG zen thluan 3, nam 1 le Jammer seh 1, Karen hriamtlai phu nih an laakpiak hna, tiah theih a si. SAC ralkap cu Karen hriamtlai phu hna nih fak ngai in an kah hna caah YAK 130 Fighter 2 hmang in kahdohnak an tuah ko nain Karen hriamtlai phu lei in aa hliammi an um lo, tiah theih a si.

Humalin le Hpawngpin Hmunram Kahdohnak Ah Pyusawhti Le Pyituhsit 10 An Thi, 2 Hliamhma An Pu The Chin Post 2023 April 30 Sagaing ramṭhen, Humalin peng le Hpawngpin peng ramri khuate ah hmunhma thianhfelnak kan tuah lioah kahdohnak a chuak i, pyusawhti le pyituhsit tiah ruahmi 10 an thi. An hriamnam le zen-kuan zong kan laakpiak hna, tiah Humalin PDF nih

cathanh an chuah. Humalin PDF, Hpawngpin PDF le Pah Kah Phah hna nih April 28 ah Hpawngpin peng ramri khuate ah hmunhma thianhfelnak an va tuah i, pyusawhti le pyituhsit tiah ruahmi 10 an thi, a dang 2 cu hliamhma fak ngai an pu, PDF ṭangṭi phu nih kutser meithal zun 7 an laakpiak hna, tiah theih a si. An cathanh chung ah PDF ṭangṭi phu lei in a thimi le

aa hliammi an um le um lo an langhter lo. April 29 ah Humalin peng Wayhet palik sakhan telh in palik sakhan 4 cu voi voikhat ah kan va laak khawh. Sakhan 4 kan laak hnu ah SAC ralkap Fighter in bomb an kan thlak ko nain a thimi le aa hliammi kan um lo, tiah PDF in ṭuanvo ngeitu pakhat nih a chim. Cu pin ah Hpawngpin peng SAC ralkap kuttang pyusawhti sakhan pahnih cu

PDF ṭangṭi phu nih nihnih chung an va kah caah pyusawhti 7 nak tlawm lo an thi, tiah theih a si. Humalin peng Shwepyiaye khua thar cu PDF nih tukum February 1 ah khuapi kahdohnak an rak tuah i, an laakmi a rak si. SAC ralkap le Shanni ralkap hna cu an fah ngai caah SAC ralkap vanlawng nih a bawmh hna caah February a zarhhnihnak Shwepyiaye khua cu SAC ralkap kut ah a rak tla ṭhan, tiah theih a si.