Kum Dang Nakin Chinram Ah SAC Nih Jet Hmang In Bomb Thlak A Tam Deuh TCP May 8, 2023 Myanmar ram chung buainak aa thawk 2021, 2022 kum nakin Chinram chung SAC nih Jet Fighter hmang in bomb a thlak hi 2023 kum chung ah bomb a thlak le a kah a tam deuh tiah theih a si. 2021 kum le 2022 kum ahhin cun Jet Fighter in bomb a thlak hi voi 20 fai lawng a si nain 2023 kum chung January thla in nihin May 8 ah Jet in bomb a thlak hi voi 150 leeng a si cang tiah CHRO nih a chim. Hi kong he pehtlai in
CHRO rian ngeitu pakhat nih, “Kum dang nakin tukum chung hi Chinram chung ah Jet Fighter a hman a tam deuh. A thlak zat hi voi 150 leng a si. A bomb a thlak mi incun bomb 300 fai a si i mipi nunnak liam zong an tam,” tiah The Chin Post ah a chim. Bomb a thlak le a kah ruang ah Thantlang Peng, Khuafo khua siseh, Tlanglo khua siseh, Hakha Peng Malsawm khua le Vantlang khua siseh, Falam Peng Waibula khua, Ramthlo khua siseh, Mindat Peng chung siseh inn le lo rawkral mi zong an tam tiah theih a si. Hi kong he pehtlai in
Mindat peng chung khuami pakhat nih, “Kan nih Mindat peng hi Jet hmang in an kan kah an kan thlak a tam. Khuami zong hliamtuar le nunnak liam a tam. Khuami tam deuh cu khua ah um ngam ti loin ramtang ah zaammi zong kan tam,” tiah min langhter duh lo pakhat nih The Chin Post ah a chim. SAC ralkap nih Jet hmang in mipi a kah hna nak kong ah, “SAC nih hin tanglei cun
an kan tei ti lo. Ralkap thazaang lei in an kan tei ti lo ca ah mipi hi aa tinh mi a si lai tiah ka ruah. Mipi ka thah hna lai an inn ka khangh lai i hnu an ka chit lai ti aa ruah ca ah mipi aa tinhmi a si. Asinain, mipi nan lung a zor lo mipi nan tha a chia lo, kanmah ralkap kan tha a chia lo kan lung a zor lo, kan tei hrimhrim lai,” tiah min langhter duhlo mi ralram um pakhat nih a chimchap. 2023 kum chung SAC nih Jet Fighter hmang in mipi kahnak ruang ah mipi a thi, hliam a tuar le inn rawkral a tam tiah theih a si.
SAC Ralkap Jet Fighter Nih Senthang Peng Ah Bomb A Thlak Hakha peng Senthang ram chungah SAC ralkap Jet Fighter nih bomb a thlak, tiah theih a si. “Nihin May 8 zanlei suimilam 5:00 hrawngah SAC ralkap Jet Fighter nih Senthang ram chungah bomb a thlak. Sakta le Khuapi ram chung hrawng ah si dawh bik a lo ko,” tiah tualchung mi pakhat nih
The Chin Post ah a chim. Khuapi khua Bom a thlakmi ahhin CDF Senthang chungtel Salai Siang Cung Hnin le Salai Duh Len Hmung an nunnnak a liam tiah theih a si Nihin May 8 chun ah SAC ralkap vanlawng nih Phaipha le Surkhua kiangkap zong ah voi 6 hrawng tiang a hel len. Cu hnuah zanlei suimilam 5:00 hrawng ah Khuapi khua kiangkap hrawng ah cun bomb a thlak hi a si, tiah theih a si. Bomb a thlaknak hmunhma hi fiang tein hngalh a si lo. A ruang cu Senthang lei hi phone line a pit dih i chawnh khawh an si lo. Cheukhat nih
Khuapi le Sakta khua kiangkap hrawngah si dawh a lo ko, tiah tualchung mi hna nih an chim. SAC ralkap Fighter nih khoika khua ahdah bomb a thlak ti hi The Chin Post nih kan fehtermi a um lo nain tualchung mi hna chim ning ah Senthang ram chung ah cun a thlak ko, tiah an chim. The Chin Post nih Khuapi le Sakta khuami kan pehtlaih ko hna nain phone line a pih dih caah kan pehtlai kho hna lo
Leave a Reply