Yangon khuapi, Aa Lung pengkulh, Sin Min sang, sanguk khuabawi U Hla Moe cu May thla ni 17, suimilam 4:00 hrawngah meithal in an kaht nak kong cu tualchung mi pakhat nih a chim. Khuauk bawi H Hla Moe cu a min theih lo mi pakhat nih lam pawng ah meithal in a kah tiah theih a si.
Meithal kah a tong mi U Hla Moe cu meithal hliam a tuar caah mizaw phortu in siizungah an kal pi tiah theih asi. “A thih le thih lo cu fiangfai trein theih a si lo. Kan pawngkam ah a cang mi a si caah an kah timi cu a dik mi a si ko. Sii zung motor in an kal pi mi zong ka hmuh. khuaukbawi a kap tu cu a kah le cang kaa in a zaam colh.” tiah tualchung mi pakhat nih a chim.
Tuni suimilam 10:00 in 12:30 tiang Kaya ram, Demoso khuapi chungah KNDF le SAC ralhrang kahdohnak a chuak tiah theih a si. Demoso khuapi police sakhan in sakhan a hngah nakin a chuak mi SAC ralhrang pawl cu KNDF tayin 19 nih an kahdoh hna caah SAC ralhrang in minung 4 an nunnak a liam i, KNDF cu hliamtuar um lo in, dam tein an kir khawh nak kong cu KNDF nih thanhnak a tuah.
Magway ramṭhen Htilin peng Yemyatni Palek sakhaan cu nizan zanlei sang ah kan kah hna i SAC Ralkap lei thi le hliam an um kho tiah Htilin PDF nih cathanh an chuah. An cathanh ning ah May 16 zaan suimilam 8 le minute 10 hrawng ah Yemyatni khua um mi palek sakhaan cu Htilin PDF nih sakhaan lak ding in timhtuahnak kan ngei i kan luhhnawh hna caah kaphnih kar kahnak a chuak cu kahdohnak ah cun kan ralkap lei pakhat cu kuan nih a khen i a hliamhma a fah tuk caah hnu kan tolh ṭhan.SAC Ralkap lei in a thimi le hliamtuarmi an um kho thawng kan hlat cuahmah lio a si tiah an langhter.
Htilin PDF nih March 17 zong ah Htilin peng Cin(ကျင်း) khua Palek sakhaan zong an rak lak bel cang.Cu lio kahdohnak ah cun sakhan hmu pakhat telh in a kut tang mi pathum an rak thah hna i palek 11 a nung in an rak tlaih hna pin ah an hriamnam zong an rak lak nak kong cathanh an rak chuah.
Ayeyawady ramṭhen Ma-Oo-Pin peng ah nizan May 16 zaanlei sang ah thlichia a hrang i khuakomh 12 in inn 162 a rawk tiah tualchungmi hna sin in theih a si. Cuaidung (ကျွဲဒုံး) khuakomh, Kaan kung (ကံကုန်း) khuakomh, Seihta (ဆိပ်သာ) khuakomh , Netsin (နတ်စင်) khuakomh le a dang khuakomh 12 ah inn hna cu an rawk i minung a hliam mi cu an um lo tiah Ayeyawady ramṭhen meithat zung in ṭuanvo ngeitu pakhat nih a chim.
Inn 130 hi a cungcih an rawk i inn 32 cu an rawk dih, Cu inn 32 a rawkmi chungkhar hna cu an umnak ding tawlrel piaknak zeihmanh a um lo caah an mah le an sahlawh sin cio ah an i fonh chung hna tiah a chim chap.
Thlichia ruang ah a rawk mi inn pawl hna cu nihin zing may 17 ah meithat zung nih an va bawmh hna i inn a rawkmi chungkhar hna cu hartong bawmchantu phu hna nih bawmhchanh ding in an timhtuah lio si tiah Ayeyawady ramṭhen meithat zung in ṭuanvo ngeitu pakhat sin in kan theih.
Leave a Reply