=====
Ralhrang tang ah rianṭuan duh loin a nuarmi (CDM) ralkap 10,000 deng an si cang tiah NUG Chief Minister Mahn Win Khaing Than nih April 18 ah tuahmi Hluttaw meeting ah a chim.
CDM tuah a duh ko nain, a ruang tampi ruangah a tuah kho lo mi ralkap zong an um i, an mah sin in ralkap chung thawngpang pawl kan lak khawh tiah a chim fawn. Raltuknak vanlawng pawl he CDM nan tuah a si ahcun sing thonghra, SAC nih hmanmi vanlawng, Helicopter, Thilphor vanlawng, raltuknak vanlawng hrawh khawh, tlak ding in tuah hram in CDM nan tuah a si ahcun sing thongruk laksawng pek nan si lai tiah NUG nih a rak thap.
Cun, Ralhrang nih datsi an chiahnak, hriamnam an chiahnak nan hrawh khawh a si ahcun, a si lo le CDM nan luh lioah tank, khamnak mawṭaw (Armor) nan rak i put khawh a si ahcun sing thonghnih laksawng pek nan si lai tiah a rak thanh. Ralhrang ralkap hlun pawl he dirh a simi Tenaka raltuknak lei a tawlrel tu U Thein Htun nih cun NUG nih a thanhmi hi a taktak ah a cang kho lai lo tiah a chim.
Relchap; A Hliamhma He Zei Hngal Lo In A Ralpa Inn Ah A Lut Sualmi Ralkap Pa, Keimah hi Ralkap hruaitu pakhat ka si. Zan ah ka hruaimi ralkap he khual kan tlawnnak ah ral he kan i tong ii sau ngai te kan i kap. Kan mah nakin kan ral pawl minung an tam deuh caah zeiti hmanh in kan chei ti hna lo i hnu kan pil thluahmah. Mui le zan cu si kaw, ka hruai mi ralkap pawl zong kan i thengthet dih, zan lei mui lakah cun keimah pakhat pi lawng dap thluahmah in ka vai.
Cu zan le mui lakah cun khawika zawn ka phak zong ka ngal lo. Ka ke nih a hawih nak lei poah ka kal. ka orhlei ban ah meithal hliamhma he ka si i ka kalpah cun a thi a chuaka thluah mah, a fak zong a fak ngaingai. ka tha a dih thluahmah, ka ti hal hrim ka celh lo, cu pin ah ka hliam nak in thi tamtuk a chuak i ka tha a dih khun.
Vawlei ah van zau rumro hi ka thinlung ah a um. Asinain ka zau ngam lo, aruang cu ka pawngkam ah ral an um ti mi ka thinlung nih a theih peng caah vawlei ah ka ih ngam lo. Cu ti cun mui le zan ahcun ramtang ah suimilam 4 renglo ka kal. Zan suimilam 10 a tling cang, cu hnu ah ka thinlung ka van thumh i vawlei ah van ih dingin timhnak ka ngei, cu lio ah lamhlat nawn khin mei aa vang mi ka hei hmuh ii, a rang khawh chung in cu mei van nak tlangbo cung te lei ah a um inn cu ka hei fuh. ka hma a fak tuk pin ah ka tha hrim a dih, cu inn cu mi zeibantuk inn dah asi i ral inn hna a si sual hnga maw ti mi zong ka tuak kho ti lo.
Kutka ka van kingh i zeithawng hmanh ka theih lo, minute 5 a rauh hnu ah kum 50 hrawng asi mi tarnu nih kutka a van on i ralkap thilthuam he ka si caah ralkap ka si cu fiang tein a ka hngalh. Tarnu nih a ka hruai i inn chungah a ka lutpi ii toden pakhat ah a ka to ter hnu ah ti hraikhat a van ka suah. Ka ti a hal tu mi, ti ka van din cu a nuam taktak, ka lung in ka ruah mi cu ralkap a daw tu hna inn pei ka phak ko hi tiah ka ruah i ka lungthin a dai. Cu toden cung ka to tlawmpal ah kaa hngilh diam i caan tlawmpal a rauh hnu ah khat lei inn khan in bia an i ruah thawng nih a ka hlauhter, din tein bia an i ruah ko nain an i ruah mi bia fiang tein ka theih dih.
Afapa-“Ka nu zeiruangah mah ralkap pa kha inn chungah na lutter, kan mah tu harnak kan tong lai lo” Anu-“aaa hma le rung he a si khi na hmuh lo maw, a thi a chuak mi mah tluk a tam mi hmuh ko bu in cu zeitin dah inn chungah lut lo cun ka um lai.” Afapa-“a duh ah thih ko seh ca, kan ral pei an si ko cu, kan mah he kan in pehtlai nak pakhat hmanh a um tung lo.” Anu- “cu ti cun bia chim hlah, a nih zong nangmah bantuk minung pakhat asi ve, kan ral a va si zongah a nih zong tlangcung mi kan unau pakhat asi ve.” A fapa-“ka nu hi cu na poi ko” Anu- “a poi le poi lo kha cu hnu ah chim te, ra law a hma kha sii kan thuhpiak lai”.
Cu bia an i ruah mi ka theih dih hnu ah, ka um nak inn hi ral inn pei a si ti mi ka fiang. kei nih meithal zong kaa ken lo, thlik i zam ding tiah le a tli kho ding ka si lo, ral nih duh ning paoh in tuah mi teh ka ing ko lai tiah ka um cang. cu tlawmpal ah an nu fa te cun ka sinah an ra. Hringtu a nu nih mei inn a vanh mi a ceu mi thawngin a fapa khi keimah bantuk hruaitu ( တပ္ၾကပ္) pakhat asi timi fiang tein ka hmuh.
An nufa cun ka to nak ah cun an rak ii an ka hruai, cu hnu ah ka angki an phoih dih hnu ah ihkhun cungah an ka ih ter. hringtu a nu nih ka ban i meithal kuan chuah piak dingin a chim, a tih zong ka tih pah, cu ti ka tih mi cu a fapa nih a hmuh tikah, din nawn tein a chim mi cu… ka hawi na thinphang hlah ka nu hi a hlan ah siizungah sii sayamaci a rak si i mah bantuk zong a tuah lengmang mi a si a van ti tlawmpal ah hringtu a nu nih khengpi pakhat in tisa, lachawn le nam a van put ii meithal kuan cu a chuah.
Sii chunh lo (Thungsii, le meh sii) in ka ban meithal kuan a chuah cu a celh ka celh lo ii kei mah le kei mah hmanh ka theih lo i ka hngalh beh. zinglei ka van i thangh tik cu ni zong a sang ngai cang. hringtu a nu nih sanpioh kheng a van i put i ka ihnak lei ah a van ra i, ka fa na hma cu aa ning deuh maw, mah sii te hi ding tiah aw nem tein a van ka ti “kei nih ‘aw ka din lai ka nu, ka hma zong a dam deuh ngai ko tiah ka hei ti i, ka nu nizan ii ka hmuh mi na fapa kha teh” tiah ka van hal. tuzing ah “a ralkap (tlangcung ralkap) hna sinah a kal cang, na thin phang duh hlah na konglam pakhat hmanh a va chim hna lai lo, ka fa na hma a dam tiang hnangam tein um ko” tiah tarnu nih a ka ti.
Cu bia ka theih tikah kaa nuam nak le kaa ngeihchiat nak aa cawh ii ka mithli a tla. Kaa nuamh tuk nak cu minung lungput (minung ciocio sinah dawtnak an ngeih) ti mi mah nufa hna sin ah ka hmuh caah asi. ka ngeihchiat ngai mi cu tlawngcung miphun unau a si ko mi pakhat le pakhat ral ruangah kan i thah mi hi asi.
Ka thinlung chungah ruahnak pakhat a um mi cu “Kawlram mipi kan mah le kanmaah ral bantuk in kan i zoh hna ii pakhat le pakhat kan i thah mi hi a dik lo mi a hman lo mi asi, a taktak tiah cun Kawlram minung pakhat le pakhat kan i thah mi hi kan palh bak, kan thah dingmi cu t minung pakhat le pakhat huatnak konglam a chuahpi tu hi kan thah awk asi”
Leave a Reply