Thawngttha, Nizaan chunlai hrawng zaan lei suimilam 2:30 hrawngah Sagaing ramthen, Ku-Ta-Linn peng Thi-Taw-Tin khuate ah aum mi dalaan ngan U Kyawathkell (ဦးကျောက်ခဲ) cu a caan caan te ah a va um ton nak Kan-Swal khuate a um lio ah PDF kan ralkap hna nih an tlaih hnuah an i kal pi i, Moe-Myaing-Bawng panwgah an kahthah tiah theih asi.
Nizaan zinglei suimilam 6:00 hrawngah Magwe ramthen, Yezakyo pengkulh Zayama khuate ah an um mi dalaan nuva a si mi U Zaw Way le an nu Daw Nwe hna cu PDF kan ralkap hna i an inn cia bak ah an luhhnawh hna i meithal in an va kahthah hna tiah theih a si. Nizaan zaan lei suimilam 1:00 hrawngah Sagaing ramthen,
Shwe-Bo pengkulh Zi-Taw khuate ah a um mi Dalaan U Soe Moe cu khualtlawnnak cycle in a rakkir lio Zi-Taw khua luhnak a phak bak ah PDF kan ralkap hna nih a hnu in Cycle in a hnu an dawi i meithal in an kahdoh tiah theih a si. Nizaan suimilam zinglei 7:00 hrawngah Sadaing ramthen, Sagiang khuapi peng,
Sa-Taung peng then ( ဆားတောင်မြို့နယ်ခွဲ) Min-Ywa khua ah a um mi U Kyaw Zin Oo cu Me-heh khal dingah a inn in a chuah lio ah Min-Ywa khua in nichuah lei ah Meheh a khal lio ah cun PDF kan ralkap pawl an rak phan ve i, Dalaan bawingan U Kyaw Zin Oo cu an kahthah tiah thieh a si.
Cu bantuk thiamthiam in Nizaan zinglei suimilam 11:30 hrawngah Sagaing remthen, Maw-Laih (မော်လိုက်) pengkulh, Tun-Pyin(တွန်းပင်) khuate ah a um mi Dalaan U Zaw Min Htun ( Vawlei chungchuak thilri le lung meihrol serchuah nak company rian tuan mi) cu a inn a um lio ah an mah an inn cia bak ah an kahthah taih theih a si.
Thawngdang, Myanmar ram buainak le rammi bawmhchanhnak kong he pehtlai in Myanmar mizapi thinphannak le ramchung buainak hna daihter ding in forhfialnak cathanh cu UN Security Council nih an chuah nain Tuluk(China) le Russia nih an cohlang lo, tiah theih a si. Myanmar ram kong ah UN Security Council cu innka kharkhumh in tonbiaruahnak an ngei. ASEAN Special Representative for Myanmar, Prak Sokhonn le UN Special Envoy to Myanmar, Noeleen Heyzer nih Myanmar ram buainak daihternak ding lam cu fianternak an tuah. SAC ralkap nih biatak tein rammi a doh hna cu zeitluk in dah uknak nawl an ngeih timi an langhternak a si pinah ramchung ral a si, tiah UN thiam sang hna nih an chim.
British nih Myanmar ram kong biatung a dirhmi ah, buaibainak cu remdaihnak in a phi kawl ahcun a tlimtling ko lai. ASEAN nih hmaithlak in a ṭuan ding rian zong a langhter. Myanmar rammi himnak ca ah ton ding a simi phu poh he ton ding, ti mi kong hna aa tel. Cu pinah ASEAN Agreement cu a tak in ṭuanchuahmi a tlawm caah thinphang a si i, Cucaah a tak i langhter ding in forhfialnak an tuah. Sihmanhsehlaw Tuluk le Russia nih forhfialnak cathanh cu an cohlan lo caah UN Security Council nih cathanh an chuah kho ṭhan lo, tiah theih a si.
Non-CDM cozah rianṭuan hna cu a ra lai mi June 1 thok in Uniform tling he zung kai ding a si cang lai, tiah SAC ralkap nih a theihter hna. SAC ralkap kuttang zungkip cozah rianṭuan hna cu Uniform tling he zung kai ding in, May zarhhnihnak ahkhan anmah he a pehtlai mi zung uk nih an thanh chin hna. SAC ralkap nih Uniform tling he zung kai ṭhan ding in nawl an chuah caah cheukhat cu lunghring in am um i, Uniform hruk in zung kai ding cu an cohlang kho lo, tiah Non-CDM cozah rianṭuan pakhat nih a chim.
Cupinah Uniform hruk in zung kainak ah SAC ralkap nih Security a kan lak piak khawh lo ahcun kan nunnak ca ah ṭih a nung a si caah kan thinphang ko, tiah a chim. Atu hnu cun cozah rianṭuan hna cu zung rianherh i leng an chuah zong ah Uniform i hruk peng ding in SAC nih nawl an chuah fawn. SAC nih nawlngeihnak an laak hnu February thok in SAC zungkip cozah rianṭuan hna cu anmah siarem ning poh thilthuam i hruk-aih ding in nawl a rak chuah.
Tamu Peng CDM Siangngakchia Hna Cu June Thla In Online In Ca An Cawng Lai: SAC ralkap kuttang sianginn ah kai aa tim lomi CDM siangngakchia ca ah Tamu peng ah caan karlak cacawnnak cu Tamu Township Education Board Facebook Page in cawnnak an thok lai, tiah theih a si. Caan karlak cacawnnak cu CDM siangngakchia hna nih anmah le inn cio(Home-based Learning) in zalong tein cawn khawh a si lai, tiah Tamu Township Education Board nih cathanh an chuah.
Internet line a hmang kho lomi hna ca ah Memory Stick chung ah file in kan chiah lai i, sia rem tein an cawng kho lai. NUG cozah, Ministry Of Education nih Federal Education System in cawn dingmi hna cu video file chung ah siangngakchia hna nih fawi tein an cawn khawh dingah a chiah, tiah theih a si.
SAC ralkap nih Myaing peng khuate minung 5 cu, ralphaw hman ding ah an tlaih hna hnu ah meithal in voi tampi an kah hna, tiah Myaing-PDF sin in theih a si. Thah a tongmi 5 cu Kyaukkhuat, Bawngbin le Tanchaung(ကျောက်ခွက်၊ ဘောင်ဘင်၊ သံချောင်း) khuami hna an si i, May 24 ah SAC ralkap nih an rak tlaih hna. Kahdohnak a chuah lio ah an tlaihmi hna cu an thah hna, tiah theih a si.
“Hriamngan in kan kah hna lio ah an tlaihmi hna 5 cu an phei le an lu ah meithal in an kah hna i, an ruak cu kanmah nih kan fimhlawm hna,” tiah Bo Let Ya nih a chim. Thah a tongmi hna lak ah pakhat hi kum 40 hrawng a si i, a dang 4 hi kum 27-30 kar hrawng an si lai, tiah theih a si.
Myanmar Ram Pumpi Nikhat Chung Kahdohnak Ah SAC Ralkap 16 An Thi: Myanmar ram pumpi huap in May 27 nikhat chung kahdohnak ah SAC ralkap 16 an thi i PDF 7 an nunnak a liam ve tiah Khit Thit Media nih a langhter. Khit Thit Media nih cazin a khawmhsuat ning ah SAC ralkap a thi mi hna cu, Magwe ramṭhen, Pauh ah 1, Sagaing ramṭhen Muhdalin ah 1, Myaing ah 6, Monywa ah 5, Mandalay ramṭhen, KyaukPan ah anmah le mah kahnak in 1 le Tanintharry ramṭhen Laung Lung ah 2, tiin an dihlak 16 an thi i Sagaing ramṭhen FuangPin ah PDF 7 an nunnak liam ve.
Taluk Nih SAC Cu Covid Raikhamsii Dose Nuai 10 A Hlut: Taluk cozah nih Myanmar ram ah a hlutmi sii-ṭhim Nuai 5.42 cu May 28 ah Yangon a phan tiah theih a si. Taluk ram in Myanmar ram ah an hlutmi Covid -19 raikhamsii dose Nuai 10 le ṭhim Nuai 13 cu May 18 thok in an phan i, a hnu bik a tangmi raikhamsii dose Nuai 5 cu May 29 ah a phan lai.
Leave a Reply