Thawngpangtah kho taktak theih a si hoi ko hih!!

Kachin ramah hramhram in uknak a laatu SAC ralhrang ralkap phu in Ralbawi pakhat le ralkap phu chungtel minung pa cu hriamnam he mipi sinah an ifonh caah ting 32 lomhman an peek nak hna kong, Pyi-Htu-Pann-Tan ( ပြည်သူ့ပန်းတိုင်) phu nih tuni ah thanhnak a tuah nakin theih a si.

SAC ralhrang ralkap ii ralhmai sakhan pakhat in ralbawi pakhat le ralkap chungtel pakhat cu SAC ralhrang ii a dik lomi nawl zulh dingah le SAC ralhrang sinah um an duh ti lo caah May thla ni 13 ah mipi sinah CDM an tuah tiah theih a si.

An mah he hmunkhat in Hrimanam le thilri, MA-2 meithal zuunkhat, MA-3 zuunkhta, MA-5 zuunkhat, Shotgun Cards (2), Drone Mavic pa 2, Kutin puah mi bomb lung 11 telin hraimnam a dangdang he mipi sinah CDM an tuah tiah theih a si. A pahnih ningin NUG-MOD/ KPICT he dohthlennak phu hna nih an himnak ding caah hmundang kaa dang ah an kuat hna tiah theih a si. Kachin ram ah hriamknam he CDM a tuah mi SAC ralhrang minung 11 an si cang tiah theih a si
Relchap, US le Germany Nih Ukraine Bawmh Dingmi Hriamnam cu Russia Caah Cun Zaan Mangchia Asi , Ukraine nichuahlei khuapi Russia nih a lak khawh dengmang cang caah, Russia miakpi le an vanlawng vialte fawitein tla lak in a kap khotu hriamnaam thatha US le Germany nih kuat dingin Wednesday ah biakamnak an tuah. Ukraine hi up-to-date anti-aircraft missiles le radar system ka bomh lai, tiah Germany nih bia ai kam i, a tha taktaki medium-range rocket systems 4 le zenkuan ka bomh ve hna lai, tiah US nih thawng a thanh colh ve. Europe tiang ral thawhter hau lo in, Russia pawl Ukraine ram in thawl kho dingin US nih Ukriane bomh a timh. Russia khua le ram lei pi tiang cu rocket in kan kap hrimhrim lai lo, tiin Ukraine nih bia a kan kamh ko, tiah US lei nih an chim.

“Nanmah US hi mei alh chin seh tiin pattol a toihtu nan si” tiin Kremlin nih a thangchiat ngaingai hna. Ralhriam a let thatha ai ngeihmi Russia ralkap pawl Ukraine nih a biatak tein a nawr khawhmi nih hin Western ram pawl an khuaruah lei a harter dih cang hna. A khualipi zong la kho lo in a kham khawh hna i, Donbas pengkulh lei tu i hmaithlak hau dingin Moscow an tuahto ning nih an khuaruah lei a harter ngaingai hna, tiah theih a si. Asinain, cu nichuahlei hmunhma cu duhsah tein bomb in Russia nih a thlak i hma a la cuahmah cang. Cu tikah, Zelensky nih heh tiah tu le tu Western ram pawl hriamnaam thadeuh bomh a hal hna. Asinain a duhningnak nakin an khual a nuar caah, an cungah a vuivai ngaingai.

Tutan i a thar in Western ram nih hriamnaam bomh an timhmi kong a theih tikah Ukraine president office a tlaitu Andriy Yermak cu a mirh lawng a chuak ko cang, ti asi. “Hi ka herhtukmi hriamnaam pawl kan sin a phaak i, Putin cozah cung i hmual a ngeimi phihkharnak an tuah chap a si ah cun, kan tei hrimhrim lai, ti hi ka chim ngam” tiin Yermak nih a chim. Cu hriamnaam thar he cun Russia miakpi pawl cu thek viar in an kah khawh cang lai. Hi Russia miakpi pawl hi an thawntuk caah an vanlawng raltuknak zong tampi a kan/tuankanh hna, ti a si. Western hriamnaam thar bomhmi he cun Ukraine ralkap hi hmunhma tha a khuarter khawh than cang hna lai i, nichuahlei khua vialte zong an runven khawh cang lai, tinak a si.

“NATO ram – Europe ram le Americans – zong nih Ukraine an halmi hriamnaam cu a chap tu in chap chin an i tim hna. Cu ti hriamnaam in biatak tein Ukraine thawnter an timhnak a ruangbik cu Russia rengh taktak an duh caah a si lai, tiah ka ruah. Hraimnaam bomh dingin NATO nih timhlamhnak a ngei fa te Russia aw-an an ngai i, Russia nih cukha a ti theng lo ah cun hmual a ngeimi le a tha taktakmi hriamnaam tor le cheng in an kan kuat colh ve tawn” tiah Yermak nih a chim. Western hriamnaam bomhnak an hung phak hlan ah Russia nih Donbas lak khawh ai zuam ve. US rocket system a tak in hman khawhnak dingah a tlawmbik zarh 3 hrawng training kai ta an hau lai, tiah Pentagon nih a chim. Asinain, an tukmi ral a khupthal let manh dingin kan hriamnaam hi Ukraine kut a phan manh kho lai, tiah ka zumh ko, tiin Defense Undersecretary Colin Kahl nih a chim.

Tutan rockets system hi US nih Ukraine bomh a timhmi $700 million chung ta a si i, a tangmi phaisa cu helicopter, Javelin anti-tank weapon systems, radars, tactical vehicles, spare parts le a dangdang cawknak ah an i chiah kho rih. Tutan rockets hi meng 50 hlat tiang a kap kho mi an si i, thialkam khawhmi an si. Ukraine lei nih an halmi cu meng 186 hla a kap kho mi a si nain, an hlawh a tling than lo. “Ukraine nih Russia khua le ram kan kap lai lo, tiin an ti mi hi kan zum hrimhrim hna lo. A tu hi US nih kan meiphu ah zinaan a toih bia a si ko cang hih” tiin Kremlin spokesman Dmitry Peskov nih a chim.

Ukraine nih US rockets hi ai hman la le Sumy pengkulh in Russia ramri lei pi tiang an kan kah lai ti cu a fiang, tiin Col. Gen. Michail Mizintzev nih a chim. Cu a chimmi cu radio in a si i, pumpakin fehternak belte an tuah kho rih lo, ti asi. “Hriamnaam tam chinchin in nan bomh ruangah ah hin Western ram hi raltuknak chungah luhpi nan i timh caah a si. Rocket launcher pawl nan bomhmi nih hin kan tukmi ral hi a chiatchuater lehlam lai. A molhtamhmi Western ramkhel rual nih zeitluk tihnung a si cu thatein an i fiang dih ko,” tiin Russian foreign minister Sergey Lavrov nih ralrinpeknak bia a chim.

Hriamnaam thar kuat dingin thawngpang a than le cangka, Western bomhnak hriamnaam le a dang bomhnak tete an i kuatnak Lviv pengkulh i tlanglawng lam cu Russia nih a kah colh ve. Wednesday kahdohnak ah minung 5 hma an pu, an hrawhmi inn le lo kan tawlrel lio pi a si, tiin regional Gov. Maksym Kozytskyy nih a chim.
Tutan i IRIS-T air defense system Germany nih kuat a timhmi hi Ukraine ral ai thok hnu ah a hmasabik long-range air defense hriamnaam an kuat a si te lai, tiah theih a si. Tuan i an kuatmi liangcung khin vanlawng kahnak pawl hmanh nih hin helicopters le niam i a zuangmi vanlawng hmanh tampi a kahtlak piak khawh hna. Asinain, Russia vanlawng thatha pawl kahnak belte ah cun an tha tawk hrimhrim lo, ti asi.

Germany nih Ukraine kan bawmh hi ai za hrimhrim rih lo, tiin ram chungah siseh, ramleng um German mi hrimhrim nih an cohzah an hran hnawh ngaingai hna, tiah theih a si. “IRIS-T surface-to-air missile hi kan ram nih kan i ngeihmi air defense system lakah a thabikmi hriamnaam a si,” tiin German Chancellor Olaf Cholz nih lawmarkers pawl sinah a chim. “Hi system he hin cun Ukraine nih a khuapi pawl hi Russia vanlawng kut in a humhak khawh viar cang hna lai. Radar system kan kuatmi hna nih hin Russia miakpi pawl a hrawhpiak ve fawn hna lai,” tiin Cholz nih a chim.
A tu hi Sievierodonetsk khua i 80% tluk cu Russia kut a phan cang. Hi khua hi Russia a tanhtu a dangtein a peumi Ukraine mipi le amah Ukraine ralkap pawl kum tampi chung an i kah peng nak khua a si. Russia nih a luhhnawh hna hlan tein khan hi khua i hmunka tampi cu cu Russia tanhtu pawl an kut ah a um diam cangmi a si, tiah regional Gov. nih a chim.

Khuapi chung lam kip ah Russia ralkap le Ukraine kan ralkap an i kap i, Russia lei nih an kan siak deuh ngaingai. Asinain, kadang district belte ah cun kanmah lei nih kan siakdeuh ngiangai ve ko hna, tiin Luhansk Gov. Serhiy Haidai nih a chim. Luhansk pengkulh chung i Russia kut a phan rih lo mi khua pakhat te cu Lysychansk a si i, Ukraine kut tangah a um ko rih. Asinain, hi khua zong hi nehhnu target a hung si kho mi a si. An khuahnih hi tiva nih a dan hna. “Hihnu ni 2 in 3 chungah Russia nih Sievierodonetsk hi a ningpi in an laak khawh a si sual ah cun, cuka khua ah cun miakpi le mortar an tunh colh hna lai i, Lysychansk hi faak chinchin in an vun kah cang lai,” tiah Haidai nih a chim.

Naihrawng hrang cu nichiar te a thimi kan ralkap a zat hi 60 in 100 cu an si peng, tiah Zelensky nih a chim.
Zanfatin video in biachimnak a ngeihmi ah a tu hrawnghrang cu ngakchia kongkau lei ah ai mer cang i, tutan ral kan tuk chung i a thimi ngakchia kan fale hi 243 an si cang i, 446 hma an pu, a tlaumi 139 an si. Cu nak zongin cazin hi a tamdeuh kho mi a si, a ruang cu Russia kut a phanmi khua le ram i a tlungmi thilsining hi kan cozah nih a dikdiar in kan hlathlat khawh lo caah a si, tiin Zelensky nih a chim.

Russia lei ah hranhram in kalpi a si mi Ukraine mipi lakah 200,000 hi cu ngakchia an si i, hi tluk a kaumi Russia ram ah cu a kakip lo ah an thenthek hna. Cu ti thatlonak policy an kalpinak a ruangbik cu, kan mipi fir an i timh lawng si lo in, Ukraine hrimhrim hi philh hna sehlaw, a kir zong kir kho ti hna hlah seh, ti an duh caah a si, tiin Zelensky nih a chim. Chaklei Ukraine belte ah cun, an regional governor a tha a tho ngaingai. Russia ralkap pawl hnung an tolh i, an hnung in hlei pawl kan pheh (bomb) kanh colh ve hna, tiin a chim. “Ukraine ralkap nih rinlo piin an kan kah lai ti an phan caah a si,” tiin Mykolayiv pengkulh governor Vitaliy Kim nih telegram ah a tial. Crd-Chelsea Bawi

Post Views: 14

Thawngpangtah kho taktak theih a si hoi ko hih!!

Be the first to comment

Leave a Reply Cancel reply