Ralzaam 1500 hrawng an umnak Rakhine ram Yateitong peng Setipin ralzaam hmunah a um mi pawl cu thla 2 chung facang an pek ti hna lo caah eidin an har ngai cang tiah theih asi.
Mah ralzaam hmun hi cozah Ministry of Social Welfare, Relief and Resettlement tang disaster management zohkhenhnak tangah a ummi asi.
Atu hi facang an don lo nak thla 2 deng asi cang, June 20 ah U Wai Hin Aung nih a bawmh mi hna innkhat ah (pawng 24) cio in an i phawt mi te lawng an ngei cang tiah theih asi.
Hi kong he pehtlaih in ralzaam hna a bawmchantu Ko Aung Min nih “ramdang NGO pawl bawmhnak zong a um ti lo, ICRC nih nikum September thla tiang kha cu a bawmh hna. Cozah leiin a zohkhenhtu department zong nih thla 2 deng eidin a rak pek ti hna lo caah an har ngai cang tiah a ti.
Cozah lei tuanvo ngei tu hna nih bank in phaisa kan chuah khawh rih lo caah a si tiah theih asi. Cozah nih hin innkhat ah thla 1 caah facang (pawng 40) a bawmh tawn mi asi.
Setipin ralzaam hmunah hin ralzaam dong 344, milu 1477 an um. Rakhine ramchungah ralzaam a um mi dihlak hi sing 2 deng an um i, an dihlak in eidin tha tein an hmu lo tiah theih asi.
The Chin Post
Leave a Reply